١
١ پولس اللهك قولی و یالاندن منزه اولان اللهك ازلی زمانلردن وعد ایدوب٢ لكن خلاصكارمز اللهك امری اوزره بڭا امانت ایلدیكی وعظ واسطه‌سیله وقت مخصوصنده كندی كلامیله اظهار ایتدیكی ابدی حیات امیدینه مبنی٣ اللهك منتخبلرینك ایمانی و تقوایه مطابق اولان حقیقتی بیلمكلك اوزره عیسی المسیحك رسولی اولوب٤ مشترك اولدیغمز ایمان حسبنجه اوز اعظم تیطوسه. پدر الله و خلاصكارمز رب عیسی المسیح طرفندن سڭا عنایت [رحمت] و سلامت اولسون.٥ بو سببدن سنی كریدده براقدم كه اكسك اولان شیلری ترتیب ایدوب سڭا اصمارلادیغم كبی هر شهرده اختیارلر تعیین ایده‌سین.٦ بر كیمسه فصورسز و بر زوجه‌نك زوجی اولوب و فجوردن طولایی تشكی اولنمامش و اطاعتسز اولمایان مؤمن اولاد صاحبی بولندیغی حالده انی تعیین ایله٧ زیرا واجبدر كه اپسقپوس اللهك كتخداسی كبی قصورسز اوله خودرأی غضبناك شرابه میال اوریجی قبیح قزانج طالبی دكل٨ آنجق مسافرپرور و ایولك سون و عاقل و صالح و مقدّس و پرهیزكار٩ تعلیمه كوره اولان صادق كلامی قوی طوتار اوله تا كه صحیح تعلیمله نصیحت ویرمكه و مخالفت ایدنلری تعزیر ایتمكه مقتدر اوله١٠ زیرا نیچه اطاعتسز لافزن و اضلال ایدیجی كیمسه‌لر خصوصا اهل ختان اولانلر وار١١ بونلرك آغزلرینی قپامق كركدر. بونلر قبیح قزانج سببندن جائز اولمایان شیلری اوكرده‌رك بتون خانه‌لر خراب ایدرلر١٢ انلردن بری كندیلرینك اصل پیغمبری اوله‌رق كریدلولر دائما یالانجی كوتو جانور شیشبوغازدر دیدی١٣ بو شهادت طوغریدر بوكا بناً ایمانلری صحیح اولوب١٤ یهودی مصاللرینه و حقیقتدن صاپان ادملرك تنبیهلرینه دقت ایتمه‌ملری ایچون انلری شدتله تعزیر ایله١٥ پاك كیمسه‌لره هر شی پاك ایسه‌‌ده ناپاك و مؤمن اولمایانلره بر شی پاك اولمادقدن بشقه هم عقللری همده ضمیرلری ناپاك اولمشدر١٦ اللهی بیلورز دیو اقرار ایدرلر ایكن انی عمللریله انكار ایدرلر و مكروه و اطاعتسز و هر ایو عمل خصوصنده مردود درلر.