١
١ عیسی المسیحده اولان حیاتك وعدینه كوره اللهك ارادتیله عیسی المسیحك رسولی پولس سوكیلو اوغلم طیموتاوسه٢ پدر الله و ربمز عیسی المسیح طرفندن عنایت و مرحمت و سلامت اولسون٣ كیجه كوندوز دعالرمده سنی بردوام ذكر ایده‌رك٤ و كوز یاشلركی خاطرمده طوته‌رق پرسرور اولمه‌م ایچون سنی كورمك آرزوسنده ایم٥ اوّلا بیوك والده‌ك لویسده و والده‌ك اونیكه‌ده ساكن اولوب سنده دخی بولندیغنه اعتماد ایتدیكم اول ریاسز ایمانی خاطرمه كتوردیكمده اجدادمدن اوكرندیكمه كوره پاك ضمیرله عبادت ایتدیكم اللهه شكر ایدرم٦ بو سببدن سڭا اخطار ایدرم كه اوزركه اللرمك قونلمسیله سنده اولان اللهك موهبه‌سنی تشویق ایده‌‌سین٧ زیرا الله بزه قورقاقلق روحنی دكل آنجق قوت و محبت و تام عقل روحنی ویردی٨ بوكا بناءً ربمزك شهادتندن و بن محبوسندن طولایی اوتانمه فقط بشارت ایچون مشقتده اللهك قوتنه كوره حصه‌دار اول.٩ او بزی خلاص ایدوب مقدّس دعوتله دعوت ایلدی بو دخی عمللرمزه كوره دكل آنجق كندینك تقدیرینه كوره و ازلی زمانلزدن عیسی المسیحده بزه احسان اولنوب١٠ شمدی ایسه اولومی ابطال ایدوب بشارتك واسطه‌سیله حیات و اولمه‌مزلك ظهوره كتورمش اولان خلاصكارمز عیسی المسیحك ظهوریله بیان اولنان عنایته كوره اولدی١١ بن دخی بو بشارتك واعظی و رسولی و طائفه‌لرك معلمی نصب اولندم١٢ بو سببدن بو مشتقلری دخی چكیورم و لكن اوتانمام زیرا كیمه ایمان ایتدیكمی بیلورم و امانتمی اول كونه قدر حفظه قادر ایدیكنه اعتماد ایدرم١٣ بندن ایشیتدیكك صحیح سوزلرك اصل صورتنی عیسی المسیحده اولان ایمان و محبتله حفظ ایله.١٤ بزده ساكن اولان روح القدس واسطه‌سیله اول ایو امانتی حفظ ایله.١٥ آسیاده اولانلرك جمله‌سی فیغلوس و هرموغینس ارالرنده اوله‌رق بندن یوز چویردكلرینی بیلورسین١٦ رب اونیسیفورسك خانه‌سنه مرحمت ایده زیرا بنی چوق دفعه مستریح ایلدی و زنجیر مدن اوتانمایوب١٧ بالعكس رومایه وصولنده بنی چوق غیرتله ارایوب بولدی.١٨ رب اڭا اول كونده رب طرفندن مرحمت بولمسنی احسان ایلیه و افسوسده بڭا نه قدر خدمت ایتدیكنی پك ایو بیلورسین.