٦
١ بویوندروق آلتنده بولنان جمله قوللر كندی افندیلرینی جمله احترامه مستحق عدّ ایتسونلر تا كه اللهك اسمنه و تعلیمنه كفر اولنمایه٢ و مؤمن افندیلری اولانلر برادر اولدقلری ایچون انلری تحقیر ایتمسونلر آنجق مؤمن و سو كیلو و ایولك ایتمكلكه حصه‌دار اولدقلری ایچون دها زیاده قوللق اینسونلر. بو شیلری تعلیم و نصیحت ایله٣ بر كیمسه بشقه درلو تعلیم ایدوب ربمز عیسی المسیحك صحیح سوزلرینه و تقوایه كوره اولان تعلیمه قائل اولماز ایسه٤ او متكبردر بر شی بیلمز آنجق مباحثه و نزاع لفظیله معلول اولمشدر. بونلردن دخی حسد و نزاع و كفرلر و سوء‌ظن٥ و عقلی فاسد و حقیقتدن بعید و تقوایی كار ظن ایدن ادملرك بوش مباحثه‌لری حاصل اولور. بو مقوله كیمسه‌لردن صاقن٦ لكن قناعتله اولان تقوی بیوك كاردر٧ زیرا دنیایه برشی كتورمدك و اندن بر شی كوتوره‌میه‌جكمز آشكاردر٨ ایمدی ییه‌جكمز و اورتنه‌جكمز وار ایكن بونلره قناعت ایده‌لم٩ اما زنكین اولمق قصدنده بولنانلر اغوایه و طوزاغه و چوق سفیه و مصر شهوتلره دوشرلر انلر دخی ادملری هلاكه و خرابیته غرق ایدرلر١٠ زیرا مالپرستلك جمله كوتو شیلرك اصلی اولوب بعض كیمسه‌لر اڭا طمع ایتمكله ایماندن صاپوب چوق الملره مبتلا اولدیلر.١١ لكن ای الله ادمی سن بو شیلردن فرار ایدوب صلاح و تقوی و ایمان و محبت و صبر و حمله‌سعی ایت١٢ ایمانك ایو جهادنده جاهد اول. چوق شاهدلر اوكنده ایو اقراری اقرار ایتمش اوله‌رق دعوت اولندیغك ابدی حیاتی طوت١٣ جمله‌یه حیات ویرن اللهك حضورنده و پونطوسلو پیلاطوسك اوكنده ایو اقرارله شهادت ایدن عیسی المسیحك حضورنده سڭا تنبیه ایدرمكه١٤ بو امری ربمز عیسی المسیحك ظهورینه دكین لكه‌سز و قصورسز حفظ ایده‌سین١٥ بونی دخی مبارك و قدیر و حید و ملِك الملوك و رب الارباب١٦ اولمه‌مزلكه یالڭز مالك و یاقلاشلماز نورده ساكن اولان ذات وقت مخصوصنده اظهار ایده‌جكدر. ادملرك هیچ بری انی كورمه‌مش و كوره‌مز. اڭا عزت و قدرت ابدیه اولسون آمین.١٧ بو دنیاده زنكین اولانلره تنبیه ایله كه متكبر اولمایوب بقاسز زنكینلكه دكل آنجق تمتع ایچون غنیلك اوزره بزه هر شیئی احسان ایدن [حی] اللهه توكل ایتسونلر١٨ ایولك ایده‌رك ایو عمللرده غنی اولوب جومرد و الی آچیق اولسونلر١٩ و حقیقی حیاته نائل اولمق اوزره آخرت ایچون كندیلرینه ایو تمل حاضرلاسونلر.٢٠ ای طیموتاوس امانتی حفظ ایدوب ناپاك و باطل لفظلردن و كذباً علم تسمیه اولنان شیئڭ معارضه‌لرندن اجتناب ایله٢١ كه بوكا بعض كیمسه‌لر ذاهب اولمغله ایماندن صاپدیلر. عنایت سنڭ ایله اولسون آمین.