١
١ پولس و سیلوانوس و طیموتاوس پدرمز الله و رب عیسی المسیحده اولان سلانیكلولر كلیساسنه٢ سزه پدرمز الله و رب عیسی المسیح طرفندن عنایت و سلامت اولسون٣ ای برادرلر لایق اولدیغی اوزره دائما سزڭ ایچون اللهه شكر ایتمكه بورجلو ایز چونكه ایمانڭز زیاده‌سیله نما بولوب جمله كزدن هر برینك یكدیكرینه اولان محبتی آرتمقده‌در٤ شویله كه بز كندیمز تحمل ایتدیكڭز جمله تعدّی و مضایقه‌لركزده اولان صبرڭز و ایمانكزدن طولایی اللهك كلیسالرنده سزڭ ایله افتخار ایدرز٥ بو دخی یولنده اذیت چكمكده اولدیغڭز ملكوت اللهه نائل اوله‌جغكزه اللهك عادل حكمنك دلیلیدر٦ زیرا اللهك عندنده عدالته مطابقدر كه سزی تضییق ایدنلره مضایقه ادا ایده٧ و سز مضایقه چكنلره بزم ایله برابر رب عیسی كندی قوتنك ملكلریله سمادن ظهور ایدوب٨ اللهی بیلمیانلردن و ربمز عیسی المسیحك بشارتنه اطاعت ایتمیانلردن آتش آلویله انتقام آله‌جغی وقتده راحت احسان ایلیه٩ رب كندی مقدّسلرنده معزز و جمله مؤمنلرده (چونكه سزه اولان شهادتمزه ایمان اولندی) حیرتبخش اولمق اوزره كلدیكنده١٠ انك حضورندن و قوتنك جلالندن بونلر اول كونده ابدی هلاك حكمی چكه‌جكلردر١١ بوكا نظراً دخی دائما دعا ایدرزكه اللهمز سزی بو دعوته لایق قیله و خیر ایچون هر بر رضاسنی و ایمانك عملنی قوّتله اكمال ایلیه١٢ تا كه ربمز عیسی المسیحك اسمی سزده سز دخی اللهمز و رب عیسی المیسحك عنایتنه كوره انده تعزیز اولنه‌سڭز