١
١ پولس و سیلوانوس و طیموتاوس پدر الله و رب عیسی المسیحده اولان سلانیكلولر كلیساسنه. سزه [پدرمز الله و رب عیسی المسیح طرفندن] عنایت و سلامت اولسون.٢ دعالرمزده سزی ذكر ایده‌رك جمله‌ڭز حقنده اللهه دائما شكر ایدرز٣ و ایمانكزك ایشنی و محبتكزك امكنی و ربمز عیسی المسیحه اولان امیدكزك صبرینی پدرمز اولان اللهك حضورنده فراغت ایتمیه‌رك ذكر ایدرز٤ چونكه ای اللهك سوكیلولری اولان برادرلر سزڭ انتخابكزی بیلورز٥ زیرا بشارتمز سزه یالڭز كلامله دكل آنجق قوّتله و روح القدسله و كامل اعتقادله گلدی نته كیم اراكزده سزڭ ایچون نصل اولدیغمزی بیلورسڭز٦ سز دخی چوق مضایقه اراسنده روح القدس مسرّتیله كلامی قبول ایتمش اوله‌رق بزه و ربه مقتدی اولدیڭز٧ شویله كه سز ماكدونیاده و اخائیاده جمله مؤمنلره نمونه اولدیڭز٨ زیرا ربك كلامی سزڭ طرفكزدن یالڭز ماكدونیا ایله اخائیاده شایع اولمایوب آنجق هر یرده دخی اللهه اولان ایمانڭز شایع اولمسیله بر شی سویله‌مه‌مزه حاجت قالمادی٩ چونكه اراكزه كلمه‌مز نصل اولدیغنی و حی و حق اولان اللهه عبادت ایتمك١٠ و اولولردن احیا ایتدیكی اوغلی یعنی كله‌جك غضبدن بزی خلاص ایدن عیسایی سمادن بكلمك اوزره سزڭ بتلردن اللهه نصل رجوع ایتدیككزی كندیلری حقمزده خبر ویریورلر