٤
١ ای افندیلر سماواتده سزڭ دخی بر افندیڭز وار ایدیكنی بیله‌رك قوللر كزه حق و انصاف اوزره معامله ایدڭز.٢ دعاده دوام ایدوب انده شكر ایله اویانق طورڭز٣ و بزم ایچون دخی دعا ایلیڭز تاكه اغورینه زنجیربند اولدیغم مسیحك سرّینی سویله‌مك اوزره الله بزه كلامڭ قپوسنی آچه٤ و سویله‌مك بڭا نصل واجب ایسه انی بویله اظهار ایده‌یم٥ وقتی صاتین آله‌رق خارجده اولانلر ایله عاقلانه حركت ایدیڭز٦ هر كسه واجب اولدیغی اوزره جواب ویرمكی بیلمڭز ایچون سوزڭز طوزله تربیه اولنمش كبی دائما لطفله اولسون.٧ احوالمك كافه‌سنی سزه سوكیلو برادر و صادق خدمتجی و ربده خدمت رفیقمز اولان تیخیكوس بیلدره‌جكدر٨ مرقومی‌ده سزدن اولان صادق و سوكیلو برادر اوناسیموس ایله برابر سزه همان بونڭ ایچون یعنی احوالكزی اوكرنوب قلبلركزه تسلی ویرمك ایچون كوندردم٩ انلر بوراده اولان شیلرك جمله‌سنی سزه بیلدره‌جكدر.١٠ بنم ایله برابر محبوس اولان اریستارخوس و بارناباسك یكنی یعنی حقنده تنبیه آلدیغڭز مرقوس (سزه گلدیگی تقدیرده انی قبول ایدڭز)١١ و یوستوس دینلان یشوع سزه سلام ایدرلر. بونلر اهل ختاندن‌درلر و اللهك ملكوتی ایچون یالڭز بونلر امكداش بولنوب بڭا تسلی اولدیلر١٢ سزدن بری مسیحك قولی اپافراس سزه سلام ایدر و اللهك جمله مرادنده كامل و تمام طوره‌سڭز دیو دعا ایله دائما سزڭ ایچون جهد ایدر١٣ زیرا سزڭ ایچون و لاودیقیاده و ایراپولیسده اولانلر ایچون انك چوق غیرتی اولدیغنه شهادت ایدرم١٤ سو كیلو طبیب لوقا و دوماس سزه سلام ایدرلر١٥ لاودیقیاده اولان برادرلره و نیمفاسه و انك خانه‌سنده بولنان كلیسایه سلام ایدڭز١٦ بو رساله سزده اوقوندقدنصكره لاودیقیا كلیساسنده دخی اوقودوب سز دخی لاودیقیادن كلانی اوقویڭز١٧ و ارخیپوسه ربده آلدیغك خدمته دقت ایت كه انی اتمام ایده‌سین دیو سویلیڭز١٨ بن پولسك ال یازیسیله سلام. بندلرمی درخاطر ایدڭز. عنایت سزڭ ایله اولسون آمین.