١
١ اللهك ارادتیله عیسی المسیحك رسولی پولس و طیموتاوس برادر قولوسیده بولنان مقدّسلره و مسیحه مؤمن برادرلره٢ سزه پدرمز الله و رب عیسی المسیح طرفندن عنایت و سلامت اولسون٣ دائما سزڭ ایچون دعا ایدوب سزڭ عیسی المسیحه اولان ایمانكزی و جمله مقدّسلره اولان محبتكزی ایشیتمش اوله‌رق٤ ربمز عیسی المسیحك پدری اللهه٥ سماواتده سزڭ ایچون حفظ اولنان امیددن طولایی شكر ایدرز اول امید حقنده دخی بشارتك حقیقت كلامیله اوّلدن ایشیتدیڭز٦ بو بشارت دخی بتون دنیایه واصل اولدیغی مثللو سزه‌ده واصل اولدی و انی ایشیتدیكڭز و اللهك عنایتنه حقیقت اوزره واقف اولدیغڭز كوندنبرو سزده میوه‌دار اولدیغی كبی انده دخی میوه‌داردر٧ نته كیم سو كیلو خدمت رفیقمز و سزڭ ایچون مسیحك صادق خدمتجیسی اپافراسدن اوكرندیڭز٨ كندیسی دخی سزڭ روحده اولان محبتكزی بزه بیلدردی٩ بو اجلدن بز دخی ایشیتدیكمز كوندنبرو سزڭ ایچون فراغت ایتمیه‌رك دعا و نیاز ایدرز كه هر حكمت و روحانی فهمله انك ارادتنی بیلمكده مكمل اوله‌سڭز١٠ و هر خیر عملده میوه‌دار اوله‌رق و اللهی بیلمكده ترقی ایده‌رك ربه لایقی وجهله هر خصوصده انك رضاسی اوزره یورویه‌سڭز١١ و انك جلیل قدرتنه كوره مسرّتله كمال صبر و تحملده جمله قوتله قوتلنوب١٢ بزی نورده اولان مقدّسلرك نصیبنه حصه‌دار اولمغه لایق قیلان پدره شكر ایده‌سڭز١٣ اول كه بزی ظلمت تسلطندن خلاص ایدوب كندی سوكیلو اوغلنك ملكوتنه نقل ایلدی١٤ انده دخی قانی واسطه‌سیله فدیه‌یه یعنی كناهلرك عفوینه مالك ایز١٥ كندیسی دخی كورونمز اولان اللهك صورتی و جمله مخلوقاتك ایلكیدر١٦ زیرا سماواتده و زمین اوزرنده كورونان و كورونمیان شیلرك جمله‌سی كرك تختلر كرك سلطنتلر كرك ریاستلر كرك حكومتلر انك الیله خلق اولندی. بتون كائنات انك واسطه‌سیله و انك ایچون خلق اولنمشدر١٧ او دخی كافه‌سندن اوّلدر و كافه‌سی انكله قائمدر١٨ ابتدا اودر و اولولردن قیام ایدنلرك ایلكی اوله‌رق جسدك یعنی كلیسانك باشی اودر تا كه هر خصوصده تقدم ایدن او اوله١٩ زیرا هر بر كمالك انده ساكن اولمسی٢٠ و خاچنك قانیله صلح ایده‌رك انك واسطه‌سیله كرك زمین اوزرنده كرك سماواتده بولنانلرك جمله‌سنی كندیسی ایله بارشدرمسی پدره خوش كوروندی٢١ و سزی بر زمان شریر عمللرله افكارده اجنبی و دشمن ایكن٢٢ شمدی كندی بشریتی جسدنده اولوم واسطه‌سیله بارشدردی تا كه سزی كندی حضورینه مقدّس و لكه‌سز و قصورسز احضار ایده٢٣ بو شرطله كه ایمانده تمللنمش و متین اولوب ایشیتدیكڭز و كوك آلتنده جمله مخلوقاته وعظ اولنان و بن پولس خدمتجیسی بولندیغم بشارتك امیدندن قملدانمامش اوله‌سڭز٢٤ شمدی سزڭ ایچون اولان الملرمده مسرور اوله‌رق مسیحك مضایقه‌لرینك نقصاننی جسدی اولان كلیسا ایچون كندی تنمده تكمیل ایدیورم٢٥ بوكا دخی بن سزڭ ایچون الله طرفندن بڭا ویریلان اداره‌یه كوره خدمتجی اولدم تا كه اللهك كلامنی٢٦ یعنی دهرلردن و عصرلردنبرو مخفی طوتیلوبده شمدی انك مقدّسلرینه اظهار اولنان سرّی تماماً وعظ ایده‌یم٢٧ الله انلره طائفه‌لر اراسنده بو سرّك جلالنك غنیلكی نه اولدیغنی بیلدرمكی مراد ایلدی بو دخی درونلر كزده جلال امیدی اولان مسیحدر٢٨ بز دخی هر كسی عیسی المسیحده كامل احضار ایتمك ایچون هر كسه نصیحت ویره‌رك و هر كسه كمال حكمتله تعلیم ایده‌رك انی وعظ ایدرز٢٩ بونڭ ایچون بن دخی درونمده قوّتله ایشلیان انك تأثیرینه كوره جهد ایده‌رك چالشورم.