٢
١ زیرا ای برادرلر بزم سزڭ اراكزه كلمه‌مز بیهوده اولمادیغنی كندیڭز بیلورسڭز٢ فقط معلومڭز اولدیغی اوزره فیلیپیده مقدما اذیت چكوب شتم اولندق ایسه‌ده اللهك بشارتنی عظیم مخالفت ایچنده سزه سویله‌مكه اللهمزه متوكلاً جسارتلندك٣ زیرا بزم وعظ و نصیحتمز ضلالدن یا ناپاكلكدن یا حیله ایله اولمایوب٤ آنجق بشارتك بزه امانت اولنمسنه اللهك بزی لایق كوردیكی وجه اوزره و ادملره دكل آنجق قلبلرمزی امتحان ایدن اللهه مقبول اولمق اوزره سویلرز٥ زیرا معلومڭز اولدیغی اوزره بز مداهنه سوزلرنده و یاخود طمع بهانه‌سنده اصلا بولنمادق. الله شاهددر٦ و مسیحك رسوللری اولدیغمزدن یوك اوله‌بیلور ایكن كرك سزدن كرك غیریلردن اولسون انسان طرفندن عزت ارامادق٧ آنجق دایه كندی اولادینی قایردیغی كبی اراكزده حلیم اولدق٨ بو وجهله سزه مشتاق اولدیغمزدن سزی یالڭز اللهك بشارتنه دكل آنجق بزه سوكیلو اولدیغڭزدن جانلرمزه بیله حصه‌دار ایتمكه راضی ایدك٩ زیرا ای برادرلر بزم امكمز و زحمتمز خاطر كزده‌در چونكه سزدن برینه یوك اولمامق اوزره كیجه كوندوز ایش ایشلیوب اللهك بشارتنی سزه وعظ ایتدك١٠ سز مؤمنلر اراسنده نصل قدسیت و صلاحله و بلا عیب معامله ایتدیكمزه سز شاهدسڭز و الله شاهددر١١ نته كیم سزی كندی ملكوتنه و عزتنه دعوت ایدن اللهه لایق اولدیغی وجه اوزره حركت ایتمڭز ایچون سزدن هر برینه١٢ پدر كندی اولادینه ایتدیكی مثللو نصیحت و تسلی ویروب تنبیه ایتدیكمزی بیلورسڭز١٣ بو سببدن بز دخی طرفمزدن ایشیتدیكڭز كلام اللهی آلدیغكزده انسان كلامی كبی دكل آنجق حقیقتده بویله اولدیغی اوزره اللهك كلامی كبی (كه سز مؤمنلرده دخی ایشلمكده‌در) قبول ایتدیككزه فراغت ایتمیه‌رك اللهه شكر ایدرز١٤ زیرا سز ای برادرلر یهودیه‌ده عیسی المسیحده اولان اللهك كلیسالرینه مقتدی اولدیڭز چونكه انلرك یهودیلر طرفندن چكدكلری شیلری سز دخی كندی ملتداشلر كزدن چكدیڭز١٥ انلر رب عیسایی و [كندی] پیغمبرلرینی قتل ایدوب بزی دخی قوغدیلر و اللهه مقبول اولمایوب جمله ادملره مخالف اوله‌رق١٦ طائفه‌لره خلاص بولملری ایچون سویله‌مكدن بزی منع ایدرلر تا كه كندی كناهلرینك اولچكنی هر زمان طولدره‌لر لكن انلرك اوزرینه نهایت درجه‌ده غضب یتشمشدر.١٧ بز ایسه ای برادرلر برآز وقت كوكلله دكل آنجق دیدارله سزدن محروم بولندیغمز حالده چوق اشتیاقله یوزكزی كورمكه زیاده غیرت ایتدك١٨ بو اجلدن بز خصوصا بن پولس بر ایكی دفعه طرفتكزه كلمك استدك ایسه‌ده شیطان بزی منع ایلدی١٩ زیرا امیدمز یاخود مسرّتمز یاخود افتخار تاجمز كیمدر. ربمز عیسی المسیح ظهور ایتدكده انك حضورنده همان سز دكلمیسڭز٢٠ زیرا بزم عزتمز و مسرّتمز سزسڭز.