٥
١ لكن ای برادرلر زمانلره و وقتلره دائر سزه یازمقلغم ایجاب ایتمز٢ زیرا كندیڭز ایو بیلورسڭز كه ربك گونی كیجه خرسزی كبی گلور٣ چونكه سلامت و امنیت وار دیدكلرنده اولوقت حامله قاری‌یه آغری گلدیگی كبی ناكاه اوزرلرینه هلاك یتشه‌جك و قورتلمایه جقلردر٤ سز ایسه ای برادرلر قراكلقده دكلسڭز كه اولكون اوزركزه خرسز كبی كلسون٥ زیرا سز جمله ڭز نور اوغللری و كوندوز اوغللری سڭز كیجه‌دن یاخود قراكلقدن دكل ایز٦ حال بویله ایكن سائرلری كبی او یومایه لم آنجق اویانق طوروب آییق اوله‌لم٧ زیرا او یویانلر كیجه‌لین اویورلر و سرخوش اولانلر كیجه‌لین سرخوش اولورلر٨ اما بز كوندوز اوغللری ایمان و محبت زرهنی و خلاص امیدی اولان مغفری كیمش اوله‌رق آییق اوله‌لم٩ زیرا الله بزی غضب ایچون دكل آنجق بزم یولمزه اولن ربمز عیسی المسیح واسطه‌سیله خلاصه نائل اولمق ایچون تعیین ایلدی١٠ تا كه كرك اویانق كرك اویور بولنور ایسه‌ك انك ایله برابر حیاتده اوله‌لم١١ بو اجلدن ایده‌كلدیكڭز كبی بری بریكزه تسلی ویروب یكدیكر كزی معمور ایلیڭز.١٢ ای برادرلر اراكزده چالشانلری و ربده اوزركزه مأمور اولان و سزه نصیحت ویرنلری طانیوب١٣ انلره ایشلری ایچون محبت اوزره زیاده‌سیله اعتبار ایتمكزی رجا ایدرز. بری بریڭز ایله مسالمتده اولڭز١٤ و ای برادرلر سزه رجا ایدرز كه نظامسز كیمسه‌لره نصحیت ویره‌سڭز. یوركسزلری جسارتلندروب ضعیفلره دستكیر اوله‌سڭز. جمله حقنده تأنی ایده‌سڭز١٥ صاقنڭز كیمسه كیمسه‌یه كملكه مقابل كملك ایتمسون بالعكس دائما كرك بری بریكزه كرك جمله‌یه ایولك ایتمكه سعی ایدڭز١٦ دائما مسرور اولڭز١٧ فراغت ایتمیه‌رك دعا ایدڭز١٨ هر شیده شكر ایدڭز زیرا عیسی المسیحده حقكزده اللهك ارادتی بودر١٩ روحی سوكندرمیڭز٢٠ الهاملری تحقیر ایتمیڭز٢١ هر شیئی تجربه ایدوب ایو اولانی قوی طوتڭز٢٢ هر نوع شرّدن اجتناب ایدڭز٢٣ و سلامت منبعی اولان الله كندیسی سزی تمامیله تقدیس ایلیه و روحڭز و جانڭز و جسدڭز كاملاً ربمز عیسی المسیحك ظهورینه بلا قصور حفظ اولنه٢٤ سزی دعوت ایدن صادق اولوب اجرا دخی ایده‌جكدر.٢٥ ای برادرلر بزم ایچون دعا ایدڭز٢٦ جمله برادرلره مقدّس اوپشله سلام ایدڭز٢٧ سزه رب حقی ایچون یمین ویررم كه بو رساله جمله مقدّس برادرلره اوقونسون٢٨ ربمز عیسی المسیحك عنایتی سزڭ ایله اولسون آمین.