٤
١ الحاصل ای برادرلر سزه رب عیسی ایله رجا و نصیحت ایدرزكه نه وجهله حركت ایتمه ڭز و اللهه مقبول اولمڭز واجب اولدیغی حقنده بزدن آلدیغكزه كوره دها زیاده ترقی ایده‌سڭز٢ زیرا رب عیسی طرفندن سزه نه تنبیهلر ویردیكمزی بیلورسڭز٣ زیرا اللهك ارادتی بودر یعنی مقدّس اولمكزدر كه زنادن صاقنمغله٤ سزدن هر بری اللهی بیلمیان طائفه‌لر كبی هوای شهوتله دكل٥ آنجق قدسیتله و عفتله كندی جسدینه مالك اولمغی بیلسون٦ بری بو ماده‌ده برادری حقنده حدّی تجاوز ایدوب غدر ایتمسون زیرا سزه اوّلدن سویلیوب شهادت ایتدیكمز اوزره بونلرك جمله‌سی ایچون رب انتقام آلیجیدر٧ زیرا الله بزی ناپاكلكه دكل آنجق قدسیته دعوت ایلدی٨ بو اجلدن تحقیر ایدن كیمسه انسانی دكل آنجق بزه كندی روح القدسنی ویرن اللهی تحقیر ایدر٩ قارنداش محبتی خصوصنده ایسه سزه یازمقلغم ایجاب ایتمز زیرا بری بریكزی سومكی الله طرفندن كندیڭز اوكرنمشسڭز١٠ چونكه بونی سز بتون ماكدونیاده اولان جمله برادرلره كوستریورسڭز لكن ای برادرلر سزه رجا ایدرز كه بو خصوصده دها زیاده ترقی ایده‌سڭز١١ و سزه تنبیه ایتدیكمزه كوره آسوده حال اوزره یاشایوب كندی اموركزله مشغول اوله‌رق كندی اللركزله ایشلمكه غیرت ایده‌سڭز١٢ تا كه خارجده اولانلره حسن حركتله معامله ایدوب بر شیئه محتاج اولمایه‌سڭز١٣ ای برادرلر اویویانلر حقنده بیخبر اولمكزی استمم تا كه امیدلری اولمایان سائرلری كبی محزون اولمایه‌سڭز١٤ زیرا اگر عیسانك اولوب قیام ایتدیكنه ایمان ایدر ایسه‌ك كذلك عیساده اویویانلری دخی الله انك ایله برابر كتوره‌جكدر١٥ زیرا بز ربك ظهورینه دكین حیاتده باقی قالانلر اویویانلره تقدم ایتمیه‌جكمزی سزه ربك كلامیله خبر ویررز١٦ زیرا رب بالذات بر ندای امرله باش ملكك صداسی و اللهك صوریله سمادن نزول ایده‌جكدر و مسیحده وفات ایتمش اولانلر اوّلا قیام ایده‌جكلردر١٧ اندن بز حیاتده باقی قالانلر انلر ایله برابر ربی استقبال ایچون بولوتلرده هوایه رفع اولنه‌جغز و بویله‌جه دائما رب ایله برابر بولنه‌جغز١٨ ایمدی بو سوزلرله بری بریكزه تسلی ویرڭز.