٤
١ ایمدی بن اللهك و كندی ظهورنده و ملكوتنده دیریلری و اولولری حكم ایده‌جك اولان رب عیسی المسیحك حضورنده تنبیه ایدرم٢ كلامی وعظ ایله. وقتلو وقتسز اقدام ایله. كمال تأنی و تعلیمله تعزیر و تكدیر و نصیحت ایله٣ زیرا وقت كلوركه صحیح تعلیمه تحمل ایتمیوب آنجق قولاقلری كیجیشه‌رك كندی شهوتلرینه كوره كندیلری ایچون معلملر جمع ایده‌جكلر٤ و قولاقلرینی حقیقتدن چویروب مصاللره دونه‌جكلردر٥ اما سن هر شیده اویانق طور. مشقته تحمل ایت. مبشر ایشنی اجرا ایله. خدمتكی اتمام ایله٦ زیرا بن آرتق قربان كبی تقدیم اولنمق اوزره اولوب انتقالمك وقتی كلمشدر٧ ایو جهادی بتوردم. سفری تمام ایدوب ایمانی حفظ ایتدم٨ آرتق بنم ایچون صلاح تاجی حاضردر انی اول عادل حاكم رب اول كونده بڭا و یالڭز بڭا دكل آنجق ظهورینی سونلرك جمله‌سنه دخی ویره‌جكدر٩ یانمه تیز كلمكه سعی ایله١٠ زیرا دماس بو دنیایی سومكله بنی ترك ایدوب سلانیكه گیتدی. كریسكس غلاطیایه و تیطوس دالماتیایه كیتدیلر١١ یانمده یالڭز لوقا بولنور مرقوسی آلوب كندك ایله برابر كتور زیرا خدمت ایچون بڭا فائده‌لودر١٢ و تیخیكوسی افسوسه كوندردم١٣ طرواسده قربوسك یاننده براقدیغم یغمورلق ایله كتابلری با خصوص ترشه‌لری كلدیككده كتور١٤ باقرجی اسكندر بڭا چوق كوتولك ایتدی. رب اڭا عمللرینه كوره مجازات ایده‌جكدر١٥ اندن سن دخی صاقن زیرا بزم سوزلرمزه زیاده‌سیله قارشو طوردی١٦ اوّلكی جوابمده بنم ایله برابر كیمسه طورمایوب جمله‌سی بنی ترك ایلدیلر (بو علیهلرینه صاییلماسون)١٧ لكن رب یانمده طوروب بنی قوتلندردی تا كه بنم واسطه‌مله وعظ تماماً ایفا اولنوب جمله طائفه‌لر ایشیده بن دخی آرسلان آغزندن قورتلدم١٨ و رب بنی هر بر كوتو ایشدن قورتاروب كندی سماوی ملكوتنه سلامتله نائل ایده‌جكدر. اڭا ابد الاباد حمد اولسون آمین١٩ پریسقه ایله اكیلاسه و اونه‌سیفوروسك اهل بیتنه سلام ایله٢٠ اراستس قورنطوسده قالدی طروفیموسی دخی ملیتوسده خسته براقدم٢١ قیشدن اوّل كلمكه سعی ایله. اوبولس و پودس و لینوس و قلاودیا و جمله برادرلر سڭا سلام ایدرلر٢٢ رب عیسی المسیح روحك ایله برابر اوله. عنایت سزڭ ایله اولسون آمین.