٣
١ و معلومك اوله كه صوك كونلرده فنا وقتلر كله‌جكدر٢ زیرا ادملر كندی نفسنی سویجی مالپرست مفتخر مغرور كفرباز والدینه اطاعتسز نانكور خبیث٣ مودتسز مصالحه قبول ایتمز افتراجی ضبظ نفس ایتمز آزغین صلاحی سومز٤ خائن بی پروا متكبر و اللهی سومكدن زیاده ذوق و صفا سور٥ دیندارلق صورتنی كوستروبده قوتنی انكار ایدر اوله‌جقلردر. بونلردن اجتناب ایله٦ زیرا خانه‌لره گیروب كناهلرله یوكلنمش درلو درلو شهوتلره تابع اوله‌رق٧ دائما اوكرنمكده اولوب حقیقتی بیلمكه هیچ بر وقت كله‌میان جاهل قاریلری اسیر ایدن كیمسه‌لر بونلردندر٨ اما یانیس و یامبریس موسایه قارشو طوردقلری مثللو بویله‌جه حقیقته قارشو طورور و عقللری فاسد و ایمان حصوصنده مردود كیمسه‌لردر٩ لكن دها ایلری كیتمیه‌جكلردر زیرا انلرك عقلسزلغی ظاهر اولدیغی مثللو بونلرككی دخی جمله‌یه ظاهر اوله‌جقدر١٠ اما سن بنم تعلیممی اطوارمی نیتمی ایمانمی صبرمی محبتمی تحملمی بیلورسین١١ و انطا كیه‌ده و قونیه‌ده و لیسطره‌ده بڭا واقع اولان تعدّیلره و الملره نه درلو تعدّیلر چكدیكمه واقف اولدك و رب بنی جمله‌سندن خلاص ایلدی١٢ و عیسی المسیحده تقوی اوزره عمر كچورمك استیانلرك جمله‌سی دخی تعدّی كوره‌جكدر١٣ لكن شریر ومزوّر ادملر آلداده‌رق و آلدانه‌رق كیتدكجه بدتر اوله‌جقدر١٤ سن ایسه اوكرندیكك و اعتقاد ایتدیكك شیلرده كیمدن اوكرندیككی بیله‌رك ثابت اوّل١٥ مقدّس كتابلری دخی چوجوقلقدنبرو بیلورسین و بونلر سنی عیسی المسیحده اولان ایمان واسطه‌سیله خلاص ایچون عالم ایتمكه قادردر١٦ بتون كتاب الهام الهی اولوب تعلیم و تعزیر و اصلاح ایچون و صلاح خصوصنده اولان تأدیب ایچون فائده‌لودر١٧ تا كه الله ادمی كامل و هر ایو ایش ایچون حاضرلانمش بولنه.