٤
١ لكن روح آشكاره سویلركه صوك وقتلرده بعض كیمسه‌لر ضمیرلری داغلانمش اولان یالانجیلرك مراتیلكیله ایماندن ارتداد ایدوب٢ اضلال ایدیجی روحلره و جنلر تعلیماتنه دقت ایده‌جكلر٣ اول یالانجیلر كه اولنمكدن منع ایدرلر و مؤمنلرك و حقیقتی بیلنلرك تشكرله استعمالی ایچون اللهك خلق ایلدیكی طعاملردن اجتناب ایتمكی تنبیه ایدرلر٤ چونكه اللهك هر بر مخلوقی ایودر و تشكرله آلندیغی تقدیرده رد اولنه‌جق هیچ بر شی یوقدر٥ زیرا اللهك كلامیله و دعا ایله تقدیس اولنور٦ برادرلره بو شیلری اخطار ایتمكله ایمانك و تابع اولدیغك ایو تعلیمك سوزلریله پرورده اولنوب عیسی المسیحك ایو بر خدمتجیسی اولورسین٧ اما قبیح و قوجه قاری مصاللرندن اجتناب ایدوب كندیكی تقوایه ادمان ایله٨ زیرا تن ادمانی آز شیئه فائده‌لو اولوب تقوی ایسه هر شیئه فائده‌لودر چونكه انده شمدیكی و كله‌جك حیاتك وعدی وار٩ بو كلام صادق و هر وجهله قبوله شایاندر١٠ زیرا بوكا بناءً جمله ادملرك خصوصا مؤمنلرك خلاصكاری اولان حی اللهه امید ایتدیكمزدن هم امك چكر همده تحقیر اولنورز١١ بو شیلری تنبیه و تعلیم ایله١٢ هیچ كیمسه كنجلككی تحقیر ایتمسون لكن كلام و اطوار و محبت و ایمان و عفتده مؤمنلره اورنك اول١٣ بن كلنجه‌یه‌دك اوقومغه و نصیحته و تعلیمه مقید اوّل١٤ سنڭ اوزركه اختیارلرك ال قومسیله برابر الهام واسطه‌سیله ویرلمش و سنده بولنان موهبه‌یی اهمال ایتمه١٥ ترقی ایتمكلكك جمله‌یه ظاهر اولمق اوزره بو شیلری مطالعه ایله بو شیلرده مشغول اوّل١٦ كندیكه و تعلیمه دقت ایدوب انلرده دوام ایله زیرا بونی یاپمغله هم كندیكی همده سنی دیكلیانلری خلاص ایده‌جكسین.