٢
١ ایمدی هر شیدن اوّل رجا ایدرم‌كه جمله ادملر ایچون پادشاهلر ایله جمله منصبده بولنانلر ایچون نیازلر و دعالر و رجالر و شكرلر عرض اولنه٢ تا كه كمال تقوی و وقارله آسوده و راحت عمر كچوره‌لم٣ زیرا جمله ادملرك خلاصنی استبان و حقیقتی بیلمكلكه كلملرینی آرزو ایدن٤ خلاصكارمز اللهك عندنده بو ایو و مقبولدر٥ چونكه بر الله وار. الله ایله انسان اراسنده دخی بر میانجی وار بو دخی انسان اولان عیسی المسیح در كه وقت مخصوصنده شهادت اولمق اوزره كندیسنی جمله‌نك یولنه فدیه ویردی٦ بن دخی اول شهادت ایچون واعظ و رسول (مسیحده حق سویله‌یورم یالان سویله‌میورم)٧ یعنی ایمان و حقیقتده طائفه‌لرك معلمی اولمق اوزره نصب اولندم٨ ایمدی ارلرك غضب و شبهه‌دن عاری اوله‌رق پاك اللر قالدروب هر یرده دعا ایتملرینی استرم٩ كذلك نسا دخی حجاب و ادب اوزره مناسب قیافتده اوله‌رق صاچ اورملری یا آلتون یا اینجولر یا خود آغر بهالو البسه ایله دكل١٠ آنجق اهل تقوی اولمقلغی اقرار ایدن نسایه یاقشدیغی كبی ایو عمللرله كندیلرنی تزیین ایتسونلر١١ قاری كمال اطاعتله سكوت ایده‌رك اوكرنسون١٢ اما قارینك تعلیم ایتمسنه یاخود ارك اوزرینه حكومت سورمسنه اذن ویرمم آنجق سكوت اوزره اولسون١٣ زیرا اوّلا ادم صكره حوا خلق اولندی١٤ و ادم آلدانمادی آنجق قاری آلدانوب تجاوزه كرفتار اولدی١٥ اما ادب اوزره ایمان و محبت و قدسیتده دوام ایتدكلری حالده اولاد طوغورمقله خلاص بوله‌جقدر