٣
١ الحاصل ای برادرلرم ربده مسرور اولڭز. سزه ینه بو شیلری یازمق بڭا زحمت اولمایوب سزه موجب امنیتدر٢ كلبلردن صاقنڭز. شریر عمله‌دن صاقنڭز. ساخته ختاندن صاقنڭز٣ زیرا اهل ختان بز ایز كه اللهه روحله عبادت ایدوب عیسی المسیحده افتخار ایده‌رك تنه اعتماد ایتمیز٤ واقعا تنه اعتماد ایتمكه سببم وار. اگر بشقه بر كیمسه تنجه اعتماده سببم وار ظننده بولنورسه بنم دها زیاده وار٥ سكزنجی كونده ختان اولندم. اسرائیل نسلندن بنیامین سبطندن عبرانیلردن طوغمش عبرانی اوله‌رق شریعت حسبیله فریسی ایدم٦ غیرت خصوصنده ایسه كلیسایه تعدّی ایتمكده اولوب شریعتدن اولان صلاحده قصورسز ایدم٧ لكن بڭا كار اولان شیلری مسیح ایچون ضرر عدّ ایتدم٨ فی‌الواقع بن عیسی المسیح ربمی بیلمه‌نك فضیلتی ایچون هر شیئی دخی ضرر یرینه عدّ ایدرم و انك ایچون هر شیئی ضایع ایتمش اولوب انلری هیچ حكمنده صایارم٩ تا كه مسیحی قزانوب شریعتدن اولان كندی صلاحمه دكل آنجق مسیحه اولان ایمان واسطه‌سیله یعنی ایمان طریقیله الله طرفندن اولان صلاحه مالك اوله‌رق انده بولنه‌یم١٠ و بن انی و انك قیامتنك قوتنی و اولومنه مشابه قیلنه‌رق الملرینك مشاركتی بیلمكله١١ بر وجهله اولولرك قیامنه واصل اوله‌یم١٢ دكل كه آرتق نائل اولدم یاخود حالا كامل اولدم فقط عیسی المسیح بنی نه ایچون طوتدی ایسه انی طوتمغه سعی ایدرم١٣ ای برادرلر بن كندمی واصل اولمش عدّ ایتمیورم لكن بر شی وار یعنی آرقه‌ده قالان شیلری اونودوب ایلریده اولان شیلره اوزانه‌رق١٤ اللهك عیسی المسیحده اولان عالی دعوتنك مسابقت نشانی ایچون منزله طوغری سكردرم١٥ ایمدی بز جمله كامل اولانلر بو افكارده اوله‌لم و اگر بر شیئڭ حقند غیری افكارده بولنور ایسه ڭز الله سزه بونی دخی كشف ایده‌جكدر١٦ فقط واصل اولدیغمز درجه‌ده همان بر قانون اوزره حركت ایده‌لم همان بر افكارده اوله‌لم١٧ ای برادرلر بڭا مقتدی اولڭز و بزم سزه اورنك اولدیغمز كبی بویله یوروینلره دقتله نظر ایدڭز١٨ زیرا چوق یوروینلر واردر كه حقلرنده چوق كره سزه سویله‌دم و شمدی دخی آغلایه‌رق سویلرم كه مسیحك خاچنك دشمنلریدرلر١٩ انلرك عاقبتی هلاك و الهلری قارنلریدر و عزتلری عیبلرنده‌در افكارلری دخی دنیوی اموره‌در٢٠ اما بزم وظنمز سماده اولوب اورادن دخی خلاصكار رب عیسی المسیحه منتظر ایز٢١ او دخی موجداتك كافه‌سنی كندینه تابع ایتمكه مقتدر اولدیغی قوّتله بزم ادنا جسدمزی كندی مشرف جسدینه بكزر اولمق اوزره تبدیل ایده‌جكدر.