٢
١ ایمدی اگر مسیحده بر تسلی بر محبت مسرّتی بر روح مشاركتی و شفقت و مرحمت وار ایسه٢ هم افكار و یكدل اولوب همان محبتڭز بر و تفكر ڭز بر اولسون٣ هیچ بر شی منازعه یا باطل افتخار اوزره اولمایوب آنجق تواضع ایله بری بریكزی كندی نفسكزدن افضل طوته‌رق مسرّتمی اتمام ایدڭز٤ هر بریڭز یالڭز كندی امورینه دكل بشقه‌لرك امورینه دخی باقسون٥ عیسی المسیحده بولنان افكار همان سزده دخی بولنسون٦ اول كه الله صورتنده بولندیغی حالده اللهه مساوی اولمغی شكار صایمادی٧ لكن كندینی تخلیه ایدوب قول صورتنی آله‌رق انسان مشابهتنده اولدی٨ و شكلده انسان كبی بولنوب اولومه حتی خاچ اولومنه مطیع اولمغه تنزل ایلدی٩ بو اجلدن دخی الله انی غایتله ترفیع ایدوب اڭا هر اسمدن اعلا بر اسم ویردی١٠ تا كه سماده و یر یوزنده و یر آلتنده بولنانلرك كافه‌سی عیسانك اسمنه دیز چوكوب١١ پدر اللهك مجدی ایچون عیسی المسیح رب ایدیكنی هر لسان اقرار ایده١٢ بوكا نظراً ای سو كیلولرم هر وقت اطاعت ایتدیكڭز مثللو یالڭز حاضر بولندیغمده دكل آنجق دها زیاده شمدی غائبده اولدیغمده كندی خلاصكزی قورقو و دتره‌مه ایله اتمام ایلیڭز١٣ زیرا سزده كرك استمكی و كرك ایشلمكی رضاسنه كوره ایشلیان اللهدر١٤ هر شیئی قیل و قال و مجادله اولمقسزین اجرا ایلیڭز١٥ تا كه حیات كلامنی قوی طوته‌رق دنیاده نورلر كبی ارالرنده ضیادار اولدیغڭز عكسی و فاسد نسلك اورته‌سنده عیبسز و صافدرون اوله‌رق اللهك قصورسز اولادی اوله‌سڭز١٦ شویله كه بنم دخی بوشنه سعی ایتمدیكمه و بیهوده یره امك چكمدیكمه مسیحك كوننده افتخارم اوله١٧ لكن ایمانكزك قربانی و خدمتی اوزرینه كندم تقدیم اولنور ایسه‌مده سوینوب جمله ڭز ایله برابر مسرور اولورم١٨ كذلك سز دخی سوینوب بنم ایله برابر مسرور اولڭز١٩ ایمدی احوالكزی بیلوب بنم دخی فر حلانمقلغم ایچون طرفكزه طیموتاوسی یاقینده كوندره‌جكمی رب عیساده امید ایدرم٢٠ زیرا سزڭ احوالكزه خالصانه مقید اوله‌جق بشقه یكدل بر كیمسه‌م یوقدر٢١ چونكه جمله‌سی عیسی المسیحك امورینی دكل آنجق كندی امورلرینی ارایورلر٢٢ لكن انك تجربه‌سنی یعنی اوغل پدره ایتدیكی كبی بشارت ایچون بنم ایله برابر خدمت ایتدیكنی بیلورسڭز٢٣ ایمدی حالمك نه اوله‌جغنی تحقیق ایتدیكم كبی درحال انی كوندرمكی امید ایدرم٢٤ فقط كندم دخی یاقینده كله‌جكمه ربه اعتمادم وار٢٥ اما برادرم و امكداشم و سلاحداشم همدخی سزڭ طرفكزدن كوندرلمش و احتیاجمه خدمت ایتمش اولان اپافرودیتوسی سزه كوندرمكی لازم عدّ ایتدم٢٦ زیرا او سزڭ جمله كزه حسرت چكمكده اولوب انك خسته اولدیغنی ایشیتدیكڭز ایچون زیاده‌سیله مكدر اولدی٢٧ واقعا اولوم درجه‌سنه خسته اولدی لكن الله اڭا و یالڭز اڭا دكل آنجق كدر اوزرینه كدر اولماسون دیو بڭا دخی مرحمت ایلدی٢٨ بو سببدن سزانی كورمكله ینه مسرور اولمڭز ایچون و بنم حزنم دخی دها خفیف اولمسی ایچون دها زیاده عجله ایله كوندردم٢٩ سز دخی انی ربده كمال مسرّتله قبول ایدوب بویله كیمسه‌لری احترامه شایان عدّ ایدڭز٣٠ زیرا بڭا اولان خدمتكزك نقصاننی كمال ایتمك اوزره نفسنی مخاطره‌یه قویه‌رق مسیحك ایشی ایچون اولوم درجه‌سنه یاقلاشدی