٢
١ و سزی خطا و كناهلرده اولمش ایكن الله دیرلتدی٢ انلرده سز بر زمان بو دنیانك كیدشنه كوره هوا حكومتنك رئیسنه یعنی اطاعتسزلق اوغللرنده شمدی عامل اولان روحه كوره حركت ایدر ایدیڭز٣ بونلرك اراسنده بزم جمله‌مز دخی بر زمان تنمزك شهوتلرنده یورویوب تن و افكارك مرادلرینی اجرا ایده‌رك سائرلر كبی طبیعتله اهل غضب ایدك٤ لكن الله مرحمتده غنی اولمغله بزه كوستردیكی كندی عظیم محبتندن ناشی٥ بز خطالرده اولو بولندیغمز حالده بزی مسیح ایله برابر دیرلتدی (عنایتله خلاص بولمشسڭز)٦ و بزی انك ایله برابر احیا ایدوب سماویاتده عیسی المسیح ایله اوتورتدی٧ تا كه عیسی المسیحده بزه ابراز ایلدیكی لطف ایله كندی عنایتنك فضیلتی غنیلكنی كله‌جك عصرلرده اظهار ایده٨ زیرا ایمان واسطه اوله‌رق عنایتله خلاص بولدیڭز بو دخی سزدن اولمایوب اللهك عطیه‌سیدر٩ عمللردن دكلدر كه كیمسه افتخار ایتمیه١٠ زیرا بز انلرده یورومه‌مز اوزره اللهك مقدّما حاضرلادیغی ایو عمللر ایچون عیسی المسیحده خلق اولنمش اوله‌رق انك عملی‌ایز١١ ایمدی خاطركزه كتورڭز كه سز بر وقت تنجه طائفه‌لر اولوب و تنده ال ایله اجرا ایدیلوبده ختانلو عدّ اولنان طرفندن ختانسز عدّ اولنور ایدیڭز١٢ او زمان مسیحسز اولوب اسرائیل ملتنه اجنبی و وعدك عهدلرندن غریب بولنه‌رق بر امیده مالك اولمایوب دنیاده اللهسز ایدیڭز١٣ شمدی ایسه عیسی المسیحده سز كه بر وقت اوزاق ایدیڭز مسیحك قانیله یاقین اولدیڭز١٤ زیرا بزم سلامتمز اودر چونكه او ایكیسنی برلشدروب١٥ كندی تنیله اورته دیواری یعنی عداوتی ییقمغله نظاملرله امرلرك شریعتنی نسخ ایلدی تا كه سلامت حصوله كتوره‌رك ایكیسنی كندنده بر یكی انسان خلق ایده١٦ و كندی خاچیله عداوتی هلاك ایتمش اوله‌رق انك واسطه‌سیله ایكیسنی بر جسدده الله ایله بارشدره١٧ و گلوب سز اوزاق اولانلره همده یاقین اولانلره سلامتی تبشیر ایلدی١٨ زیرا ایكیمزك بر روحده پدره یاقلاشمسی انك واسطه‌سیله‌در١٩ بوكا بناءً بوندن بویله غریب و مسافر اولمایوب آنجق مقدّسلرك ملتداشلری و اللهك اهل بیتندن‌سڭز٢٠ سز رسوللرك و پیغمبرلرك تملی اوزرینه بنا اولندیڭز بونك‌ده كوشه طاشی بالذات عیسی المسیح در٢١ كه بتون بنا انده تركیب اولنمغله ربده مقدّس بر هیكل اولمق اوزره بیومكده‌در٢٢ و انده سز دخی روحله اللهك مسكنی اولمق اوزره برابر بنا اولنیورسڭز