٣
١ بو سببدن بن پولس سز طائفه‌لر ایچون عیسی المسیحك محبوسی اوله‌رق٢ اللهك بڭا سزڭ ایچون حواله اولنمش اولان عنایتنك اداره‌سنی٣ یعنی بڭا بو سرّی الهامله بیلدردیكنی شبهه‌سز ایشیتمشسڭز نته كیم اوّلا مختصرجه یازدم٤ انی اوقویوب مسیحك سرّی خصوصنده بنم وقوفمی اكلایه‌بیلورسڭز٥ بو سرّ دخی یعنی طائفه‌لرك بشارت واسطه‌سیله مسیحده میراث شریكی و همجسد و وعدینه حصه‌دار اولملری٦ شمدی انك مقدّس رسوللرینه و پیغمبرلرینه روحله كشف اولندیغی مثللو سائر عصرلرده بنی ادمه بیلدرلمدی٧ بن دخی اللهك قدرتنك فعلی اوزره بڭا ویر یلان عنایت موهبه‌سی موجبنجه اول بشارتك خدمتجیسی اولدم٨ بن جمله مقدّسلرك اك ادناسی بولندیغم حالده بو عنایت یعنی طائفه‌لر اراسنده مسیحك عقل ایرمیان غنیلكی تبشیر ایدوب٩ هر شیئی خلق ایدن اللهده ازلدن كیزلنمش اولان سرّك نظامی نه اولدیغی حقنده جمله‌یی تنویر ایتمكلك بڭا احسان اولندی١٠ شویله كه اللهك متنوع حكمتی شمدی كلیسانك واسطه‌سیله سماویاتده اولان ریاستلر و حكومتلره١١ ربمز عیسی المسیحده ایتدیكی تقدیر ازلی موجبنجه بیلدریله١٢ بزم دخی انك واسطه‌سیله كندیسنه ایمان ایده‌رك اعتماد اوزره جسارت و تقربمز وار در١٣ بو اجلدن رجا ایدرمكه سزه عزتی موجب اوله‌رق بنم سزڭ ایچون چكدیكم مضایقه‌لر سببندن فتوركتورمیه‌سڭز١٤ بو سببدن دیرم ربمز عیسی المسیحك پدرینك یعنی سماواتده و یر یوزنده بولنان هر بر قبیله‌نك انك اسمیله تسمیه اولندیغی١٥ پدرینك حضورنده دیز چوكه‌رك نیاز ایدرمكه١٦ كندی جلالنك غنیلكنه كوره كندی روحی واسطه‌سیله باطنی ادمده قوتله ثابت اولمغی١٧ و ایمان واسطه‌سیله مسیحك قلبلركزده ساكن اولمسنی احسان ایده١٨ همدخی سز محبتده كوكلنمش و تمللنمش اوله‌رق اللهك جمله كمالیله مملو اولمڭز ایچون جمله مقدّسلر ایله برابر اكلیلك و اوزونلق و درینلك و یوكسكلك نه اولدیغنی فهم ایتمكه١٩ یعنی مسیحك عقلدن اوستون اولان محبتنی اكلامغه مقتدر اوله‌سڭز٢٠ و بزده عامل اولان قدرته كوره هر خصوصده دیله‌دیكمز یا دوشوندیكمزدن غایت زیاده اجرا ایتمكه قادر اولانه٢١ عیسی المسیح واسطه‌سیله كلیساده جمله دهرلرده ابدالاباد حمد اولسون آمین.