٥
١ ایمدی مسیحك بزه احسان ایتدیكی حرّیتده ثابت قدم اولڭز و تكرار قوللق بویوندریغنه كرفتار اولمایڭز٢ اشته بن پولس سزه سویلرم كه اگر ختان اولنور ایسه‌ڭز مسیح سزه بر فائده ایتمز٣ و هر بر ختان اولنان ادمه بتون شریعتی اجرا ایتمكه بورجلو اولدیغنه ینه شهادت ایدرم٤ سزڭه شریعتله تبریر اولنمقده‌سڭز مسیحدن آیریلوب عنایتدن دوشدیڭز٥ زیرا بز ایمان واسطه‌سیله تبریر امیدینه روحله منتظر ایز٦ چونكه عیسی المسیحده نه ختان نه‌ده ختانسزلق بر شیئه یارار آنجق محبتله عامل اولان ایمان لازمدر٧ ایو سكردیور ایدیڭز سزی حقیقته اطاعت ایتمكدن كیم منع ایلدی٨ بو تحریك سزی دعوت ایدن طرفندن دكلدر٩ بر آز مایه بتون خمیری مایه‌لر١٠ غیری فكرده بولنمامڭز ایچون حقكزده ربده اعتماد وار اما سزه اضطراب ویرن هر كیم ایسه جزاسنی چكه‌جكدر١١ لكن ای برادرلر اگر بن دها ختان وعظ ایدیور ایسه‌م نیچون حالا تعدّی گوریورم. اول تقدیرده خاچك توكزی ابطال اولندی١٢ كاشكی سزی افساد ایدنلر كلیاً كسله ایدی١٣ زیرا ای برادرلر حرّیته دعوت اولندیڭز آنجق بو حرّیت تنه فرصت ایچون اولماسون لكن محبتله بری بریكزه حدمت ایدڭز١٤ چونكه بتون شریعت بر كلامده اتمام اولنور یعنی قوكشوكی كندك كبی سوه‌سین١٥ و لكن اگر بری بریكزی ایصروب ییه‌جك اولور ایسه ڭز صاقنڭز كه بری بریكزدن تلف اولمایه‌سڭز١٦ فقط دیرمكه روحله یورویڭز و تن شهوتی اجراسنده بولنمایه جقسڭز١٧ زیرا تن روحه قارشو روح دخی تنه قارشو آرزو ایدر بونلر دخی بری برینه مخالفدر شویله كه سز همان استدیكڭز شیلری یاپه‌مازسڭز١٨ اما اگر روحله دلالت اولنور ایسه‌ڭز شریعت تحتنده دكلسڭز١٩ و تنك عمللری آشكار اولوب انلر دخی زنا و فحش و ناپاكلك و فجور٢٠ و بتپرستلك و سحر و عداوت و نزاعلر و قیزقانجلق و غضب و منازعه و اختلاف و فرقه‌لر٢١ و حسد و قتل و سرخوشلقلر و مسخره‌لقلر و بونلرك امثالیدر كه اوّلدن سزه سویله‌دیكم وجه اوزره شمدی دخی سویلرمكه بویله شیلری ایشلیانلر ملكوت اللهه وارث اولمایه‌جقلردر٢٢ لكن روحك میوه‌سی محبت و مسرّت و سلامت و تأنی و لطف و خیر خواهلق و صدق و حلم و ضبط نفسدر٢٣ بو مقوله شیلره قارشو شریعت بوقدر٢٤ و مسیحك اولان كیمسه‌لر تنی انك هوسلری و شهوتلری ایله صلب ایتدیلر٢٥ اگر روحله یاشار ایسه‌ك روحله دخی یورویه‌لم٢٦ بری بریمزی تحریك ایدوب بری بریمزه حسد ایده‌رك باطل افتحاره مائل اولمایه‌لم