١
١ اللهك ارادتیله عیسی المسیحك رسولی پولس و طیموتاوس برادر اللهك قورنطوسده اولان كلیساسنه و بتون اخائیاده بولنان مقدّسلرك جمله‌سنه٢ پدرمز الله و رب عیسی المسیح طرفندن سزه عنایت و سلامت اولسون٣ ربمز عیسی المسیحك پدری الله شفقتلرك پدری و جمله تسلینك منبعی اولان الله مبارك اولسون٤ او دخی هر بر مضایقه‌ده بولنان كیمسه‌لره الله طرفندن بزم تسلی اولندیغمز تسلیله تسلی ویره‌بیلمه‌مز ایچون بزه هر بر مضایقه‌مزده تسلی ویرر٥ زیرا مسیحك الملری بزده چوغالدیغی مثللو تسلیمز دخی مسیحك واسطه‌سیله چوغالور.٦ و اگر مضایقه چكر ایسه‌ك همان بزم چكدیكمز اول الملره تحملله حصوله گلان سزڭ تسلیڭز و خلاصڭز ایچوندر و متسلی اولور ایسه‌ك سزڭ تسلیڭز و خلاصڭز ایچوندر٧ و الملره مشترك اولدیغڭز مثللو تسلی‌یه دخی مشترك اولدیغكزی بیلمكله سزڭ ایچون امیدمز قویدر٨ زیرا ای برادرلر بزه آسیاده واقع اولان مضایقه‌دن یعنی حددن زیاده طاقتك فوقنده حتی یاشامقدن بیله مأیوس اولمق درجه‌سنده صیقلمش اولدیغمزدن بیخبر بولنمكزی استمیز٩ لكن كندی نفسمزده اولوم اعلامنی آلدق تا كه كندیمزه دكل آنجق اولولری دیرلدان اللهه اعتماد ایده‌لم١٠ او بزی اولقدر بیوك بر اولومدن قورتاردی و قورتارور و بوندن بویله دخی بزی قورتاره‌جقدر دیو اڭا توكّل ایدرز١١ سز دخی بزم ایچون دعاده معاونت ایدرسڭز تا كه نیچه كیمسه‌لر وسیله‌سیله بزه اولان احسان أوزرینه نیچه‌‌لر طرفندن بزم ایچون شكر ادا اولنه١٢ زیرا افتخارمز بودر یعنی ضمیرمز شهادت ایدر كه جسمانی حكمتله دكل آنجق اللهك عنایتیله دنیاده و با خصوص سزڭ حقكزده ساده‌لكله و اللهه اولان خلوصله حركت ایلدك١٣ زیرا اوقودیغڭز یاخود تحقیقاً بیلدیككزدن و امیدمه كوره نهایته قدر دخی تحقیقاً بیله‌جككزدن غیری بر شی یازمایورز١٤ نته‌كیم رب عیسانك كوننده بزه افتخاری موجب اوله‌جغڭز مثللو بز دخی سزه افتخاری موجب اولدیغمزی بعض مرتبه قبول ایتدیڭز١٥ و بو اعتمادله ایكنجی دفعه بر نعمته نائل اولمڭز ایچون اوّلا سزه وارمق١٦ و سزدن ما كدونیه‌یه كچمك و ینه ما كدونیادن سزه كلمك و یهودیه‌یه كیتمك اوزره سزڭ طرفكزدن یوله چیقارلمق مرادنده ایدم١٧ ایمدی بو نیتمده عجبا خفتله‌می حركت ایتدم یوقسه بنده اوت اوت خیر خیر اولمق ایچون جسمانی طریق ایله‌می نیت ایتدم١٨ اما الله صادقدر كه بزم سزه اولان كلاممز اوت و خیر اولمادی١٩ زیرا بزم یعنی بنم ایله سلوانوس و طیموتاوس واسطه‌سیله ارا كزده وعظ اولنان ابن الله عیسی المسیح اوت و خیر اولمایوب آنجق كلاممز انده اوت اولدی٢٠ زیرا اللهك جمله وعدلری واسطه‌مزله اللهك جلالی ایچون انده اوت و آمیندر٢١ و بزی سزڭ ایله برابر مسیحده ثابت ایدوب بزی مسح ایدن اللهدر٢٢ و كذلك بزی مهرلدی و قلبلرمزه روحك پینی ویردی٢٣ الله بڭا شاهد اولسون‌كه سزی اسركمك ایچون دها قورنطوسه كلمدم٢٤ دكل كه سزڭ ایمانكزه تسلط ایدرز فقط سزڭ مسرّتكزه معاونت ایدرز زیرا سز ایمانله قائم سڭز.