٢
١ لكن بر دها یانكزه حزنله كلمه‌مكه كندمده قرار ویردم٢ زیرا اگر بن سزی محزون ایدر ایسه‌م بنم طرفمدن محزون ایدیلان كیمسه‌دن غیری بنی مسرور ایده‌جك كیمدر٣ و همان بونی سزه یازدمكه كلدیكمده بڭا مسرّتی موجب اوله‌جق كیمسه‌لر طرفندن محزون اولمایه‌یم چونكه بنم مسرّتم جمله كزك مسرّتی‌در دیو سزڭ جمله كزه اعتمادم واردر٤ زیرا محزون اولمڭز ایچون دكل آنجق بنم سزه اولان پك زیاده محبتمی بیلمڭز ایچون چوق مضایقه و قلب اضطرابندن و چوق كوز یاشلریله سزه یازدم٥ و اگر بر كیمسه حزنه سبب اولدی ایسه بڭا دكل آنجق بعض مرتبه (كه زیاده ثقلت ویرمیه‌یم) جمله‌كزه حزنه سبب اولدی٦ بویله كیسمه‌یه اكثر طرفندن اولان بو تكدیر كافیدر٧ شویله كه بالعكس بو مثللو كیمسه‌نك افراط درجه حزنه غرق اولمامسی ایچون انی عفو ایلیوب تسلی ایتمڭز سزا در٨ بو اجلدن اڭا محبت اثبات ایتمكزی سزدن رجا ایدرم٩ زیرا هر شیده مطیع اولوب اولمادیغكزی بیلمك اوزره دخی سزی تجربه ایچون یازدم١٠ و هر كیمه بر شی عفو ایدر ایسه ڭز بن دخی ایدرم زیرا بن دخی بر شی عفو ایتمش ایسه‌م مسیح طرفندن سزڭ ایچون عفو ایتدم١١ تا كه شیطان طرفندن غدر چكمیه‌لم چونكه انك غرضلرندن بیخبر دكل ایز.١٢ مسیحك بشارتی ایچون طرواسه واردیغمده بڭا رب طرفندن قپو آچلدی ایسه‌ده١٣ برادرم تیطوسی بولمادیغمدن روحمده راحتم بوغیدی و انلر ایله وداع ایدوب ماكدونیه‌یه كیتدم١٤ اما بزی دائما مسیحده مظفر ایدوب هر یرده بزم واسطه‌مزله انی بیلمك رایحه‌سنی اظهار ایلیان اللهه شكر اولسون١٥ زیرا كرك خلاص بولان كرك هلاك اولان كیمسه‌لر حقنده اللهك عندنده مسیحك خوش رایحه‌سی ایز١٦ بونلره اولوم ایچون اولوم رایحه‌سی و انلره حیات ایچون حیات رایحه‌سی ایز و بو ایشلره كیم مستعددر.١٧ زیرا نیچه‌لر كبی اللهك كلامنی تحریف ایدنلر دكل ایز آنجق خلوصدن و الله طرفندن كبی و اللهك حضورنده مسیحده سویلرز