٤
١ لكن دیرمكه وارث صبی اولدقجه هر شیئڭ صاحبی ایسه‌ده قولدن هیچ بر فرقی اولمایوب٢ پدرینك تعیین ایتدیكی وقته دكین وصیلر و كتخدالرك امری آلتنده‌‌در٣ كذلك بز دخی صبی بولندیغمز وقت دنیانك اركانی آلتنده قوللقده ایدك٤ لكن وقتك تمامیتی كلنجه الله كندی اوغلنی قاریدن طوغمش و شریعت تحتنه كیرمش اوله‌رق ارسال ایلدی٥ تا كه اوغللغه نائل اولمه‌مز ایچون شریعت تحتنده اولانلری خلاص ایده٦ و اوغللر اولدیغكزدن الله سزڭ قلبلركزه كندی اوغلنك ابا پدر ندا ایدن روحنی ارسال ایلدی.٧ ایمدی آرتق قول دكل آنجق اوغل‌سین و اگر اوغل ایسه‌ك مسیحك واسطه‌سیله دخی اللهك وارثی‌سین٨ لكن او زمان اللهی بیلمز ایكن ذاتاً اله اولمایانلره قوللق ایدر ایدیڭز٩ شمدی ایسه سز اللهی بیلمش و باخصوص الله طرفندن بیلنمش ایكن نصل شول ضعیف و فقیر اركانه تكرار قوللق ایتمك استیه‌رك انلره دونرسڭز١٠ كونلر و آیلر و وقتلر و سنه‌لره رعایت ایدرسڭز١١ سزڭ ایچون قورقارم كه اوغوركزده چكدیكم امك بیهوده كیده‌جكدر١٢ ای برادرلر سزه رجا ایدرم بنم كبی اولڭز زیرا بن دخی سزڭ كبی اولدم سز بڭا بر وجهله غدر ایتمدیڭز١٣ معلومكزدر كه ایلك دفعه سزه تن ضعیفلكیله بشارتی تبشیر ایلدم١٤ سز دخی تنمده اولان تجربه‌می تحقیر و اندن اكراه ایتمیوب بالعكس بنی اللهك بر ملكی كبی، عیسی المسیح كبی قبول ایتدیڭز١٥ ایمدی سزڭ مباركلكڭز نه در زیرا سزڭ ایچون شهادت ایدرمكه ممكن اولسه ایدی كوزلركزی چیقاروب بڭا ویرر ایدیڭز١٦ ایمدی سزه حقیقتی سویله‌دیكم ایچون دشمنكزمی اولدم١٧ سزڭ غیرتكزی چكیورلر ایسه‌ده خیر ایچون اولمایوب آنجق سز كندیلرینك غیرتنی چكه‌سڭز دیو سزی تفریق ایتمك استرلر١٨ اما ایو شیئه غیر تلو اولمق یالڭز یانكزده بولند بغم وقت دكل آنجق هر وقت ایودر١٩ ای چوجوقلرم مسیح سزده صورتلننجه‌یه دكین سزڭ ایچون ینه آغری چكمكده اوله‌رق٢٠ شمدی یانكزده بولنمق وسسمی دكشدرمك استر ایدم زیرا سزڭ حقكزده شبهه‌ده‌ایم٢١ ای شریعت تحتنده اولمق استیانلر بڭا سویله‌یڭز شریعتی دیكله‌مزمیسڭز٢٢ زیرا ابراهیمك ایكی اوغلی وار ایدی بری جاریهدن و دیكری حرّه‌دن دیو یازلشمدر٢٣ لكن جاریهدن اولان تن حسبیله حرّه‌دن اولان ایسه وعدله طوغدی٢٤ و بو شیلر رمز طریقیله تفسیر اولنور زیرا بونلر شول ایكی عهددر كه بری طورسینادن اولوب او دخی قوللق ایچون طوغوران هاجردر٢٥ زیرا هاجر عربستانده بولنان طورسینا اولوب شمدیكی اورشلیمه مشابهدر و كندی اولادی ایله برابر قوللق ایدیور٢٦ اما جمله‌مزك والده‌سی اولان یوقاریكی اورشلیم حرّه‌در٢٧ زیرا ای طوغورمایان عاقر سن شاد اول ای آغری چكمه‌مش اولان یوكسك سسله ندا ایله زیرا متروكه‌نك اولادی زوجی اولانك اولادندن زیاده اوله‌جقدر دیو یازلمشدر٢٨ ایمدی بز ای برادرلر اسحق كبی وعد اولادی ایز٢٩ لكن او زمان تن حسبیله طوغان روح حسبیله طوغانه تعدّی ایتدیكی مثللو شمدی دخی بویله‌در٣٠ لكن كتاب نه بیورر. جاریه ایله اوغلنی چیقار زیرا جاریه‌نك اوغلی حرّه‌نك اوغلی ایله برابر میراث آلمایه‌جقدر.٣١ و الحاصل برادرلر بز جاریه‌نك دكل آنجق حرّه‌نك اولادی ایز.