٣
١ ای عقلسز غلاطیالولر عیسی المسیح اراكزده صلب اولنمش كبی كوزلركزك اوكنده رسم اولنمش ایكن [حقیقته اطاعت ایتمه‌مك درجه‌سنده] سزی كیم اضلال ایتدی٢ سزدن یالڭز بونی اكلامق استرم روحی شریعت عمللریله‌می یوقسه دیكله‌یوب ایمان ایتمكله‌می آلدیڭز٣ بو قدر عقلسزمیسڭز. روحله باشلامش ایكن شمدی تنله‌می ختام بولورسڭز٤ بو قدر شیلری بیهوده یره‌می چكدیڭز اگر فی‌الواقع بیهوده یره ایسه٥ ایمدی سزه روحی احسان ایدوب اراكزده معجزه‌لر اجرا ایدن، شریعت عمللریله‌می یوقسه دیكله‌یوب ایمان ایتمكله‌می ایدر٦ نته‌كیم ابراهیم اللهه ایمان ایتدی و اڭا صلاح عدّ اولندی٧ حال بویله ایكن ایماندن اولانلرك ابراهیمك اولادی اولدقلرینی بیلڭز٨ و طائفه‌لری ایمانله اللهك تبریر ایده‌جكنی كتاب اوّلا بیلدیكندن ابراهیمه جمله ملتلر سنده مبارك اوله‌جقدر دیو مقدّما تبشیر ایلدی٩ ایمدی اهل ایمان اولانلر مؤمن ابراهیم ایله برابر مبارك اولورلر١٠ چونكه شریعت عمللرینه كوكنانلرك جمله‌سی لعنت آلتنده‌درلر زیرا شریعت كتابنده جمله یازلمش اولان شیلری اجرا ایتمكده هر دوام ایتمیان كیمسه ملعون اولسون دیو یازلمشدر١١ و اللهك عندنده هیچ بر كیمسه‌نك شریعتله تبریر اولنمادیغی دركاردر چونكه صالح ایمانله یاشایه جقدر١٢ شریعت ایسه ایمان طریقیله اولمایوب آنجق امرلری اجرا ایدن ادم انلرله یاشایه جقدر١٣ مسیح بزم ایچون ملعون اولوب بزی شریعتك لغتندن خلاص ایلدی (زیرا اغاج أوزرنده هر اصیلان ملعوندر دیو یازلمشدر)١٤ تا كه ابراهیمه وعد اولنان بركت عیسی المسیحده طائفه‌لره واصل اولوب ایمان واسطه‌سیله روحك وعدینه نائل اوله‌لم١٥ ای برادرلر انسانجه سویله‌یورم تصدیق اولنمش عهدی ولو انسانك بیله اولسه بر كیمسه ابطال یاخود اوزرینه علاوه ایتمز١٦ ایمدی وعدلر ابراهیمه و انك نسلنه ایدلدیلر چوقلر ایچون سویلر كبی و انك نسللرینه دیمیوب آنجق فرد ایچون سویلر كبی و سنڭ نسلكه دیور بو دخی مسیحدر١٧ لكن دیرمكه درت یوز اوتوز سنه صكره ویریلان شریعت، وعدی ابطال ایتمك اوزره الله طرفندن مسیحده اوّلدن تصدیق اولنمش اولان عهدی نسخ ایده‌مز.١٨ زیرا اگر میراث شریعتدن ایسه آرتق وعددن دكلدر حالبو كه الله انی ابراهیمه وعد طریقیله احسان ایلدی.١٩ اویله ایسه شریعت نه ایچوندر. حقنده وعد اولنان نسل ظهور ایدنجه‌یه‌دك تجاوزات سببندن علاوه اولنوب ملكلر واسطه‌سیله بر میانجینك الیله ترتیب اولندی٢٠ لكن میانجی بر طرف ایچون اولماز فقط الله بردر٢١ ایمدی شریعت اللهك وعدلرینه مخالفمیدر حاشا زیرا اگر حیات ویرمكه مقتدر اولان شریعت ویرلمش اولسه ایدی حقیقةً صلاح شریعتدن اولور ایدی.٢٢ لكن عیسی المسیحه اولان ایمانله وعدك مؤمنلره ویرلمسی ایچون كتاب جمله‌سنی كناه آلتنه قپادی٢٣ و ایمان كلمزدن اوّل كشف اولنه‌جق ایمان ایچون شریعت آلتنده قپانمش اوله‌رق محفوظ قالدق.٢٤ الحاصل شریعت مسیحه كتورمك ایچون بزم مؤدبمز اولدی كه ایماندن تبریر اولنه‌لم٢٥ لكن ایمان گلمش اولدقدنصكره آرتق مؤدبك امری آلتنده دكل ایز٢٦ زیرا عیسی المسیحده اولان ایمانك واسطه‌سیله جمله‌ڭز اللهك اولادیسڭز٢٧ زیرا سزڭ جمله‌ڭز كه مسیحه وافتیز اولندیڭز مسیحی كیمشسڭز٢٨ نه یهودی نه‌ده یونانی وار. نه قول نه حرّ وار نه اركك نه‌ده دیشی وار چونكه جمله‌ڭز عیسی المسیحده برسڭز٢٩ و اگر سز مسیحك ایسه‌ڭز بو احلدن ابراهیمك نسلی و وعد موجبنجه وارثلرسڭز.