٢
١ و اون درت سنه صكره یتطوسی دخی برابر آلوب بارناباس ایله ینه اورشلیمه چیقدم٢ و وحی موجبنجه چیقدم و انلره طائفه‌لر اراسنده وعظ ایتمكده اولدیغم بشارتی بیان ایلدم لكن بوش یره سكرتمیه‌یم یا سكرتمش اولمایه‌یم دیو اعتبارلو اولانلره تنهاجه بیان ایلدم٣ لكن بنم ایله برابر بولنان تیطوس یونانی ایكن ختان اولنمغه مجبور اولمادی٤ بو ایسه بزی اسیر ایتمك اوزره عیسی المسیحده اولان حرّیتمزی تجسس ایتمكه كیزلوجه سیویشه‌رك ایچری كیرن ساخته برادرلر سببندن ایدی٥ لكن بشارتك حقیقتی سزده ثابت قالمسی ایچون اطاعت یولیله انلری بر ساعت بیله دیكله‌مدك٦ لكن اعتبارلو عدّ اولنانلر هر نه ایدیلر ایسه بنجه فرق یوقدر (الله انسان خاطرینه باقماز) زیرا اعتابرلو اولانلر بڭا زیاده بر شی افاده ایتمدیلر٧ لكن بالعكس ختان رسالتنده بطرسك واسطه‌سیله عامل اولان ذات طائفه‌لرده دخی بنم واسطه‌مله عامل اولدیغندن٨ ختانلولره اولان بشارتك بطرسه احاله اولندیغی مثللو ختانسزلره اولان بشارتك بڭا احاله اولندیغنی كورملری و بڭا ویریلان عنایتی اكلاملریله بز طائفه‌لره كندیلری ایسه ختانلولره كیتمك اوزره٩ دیركلر اعتبار اولنان یعقوب و كیفاس و یوحنا بڭا و بارناباسه مشاركت ایچون صاغ اللرینی ویردیلر١٠ آنجق فقرایی خاطرده طوتمه‌مزی استدیلر بن دخی همان بونڭ اجراسنه همت ایلدم١١ اما بطرس انطاكیه‌یه گلدیگی زمان تعزیره مستحق اولدیغندن انك یوزینه قارشو طوردم١٢ زیرا یعقوب طرفندن بعض كیمسه‌لز كلمزدن اقدم طائفه‌لر ایله برابر طعام ایدر ایدی لكن انلر كلدكلرنده اهل ختان اولانلردن قورقه‌رق كیرو چكیلوب آیرلدی١٣ و سائر یهودیلر دخی انك ایله برابر ریا ایتدیلر حتی انلرك ریالرینه بارناباس دخی آلداندی١٤ لكن بشارتك حقیقتنه كوره طوغری حركت ایتمدكلرینی كوردیكمده جمله‌سنك حضورنده بطرسه دیدمكه اگر سن یهودی ایكن یهودی كبی دكل آنجق طائفه كبی یاشار ایسه‌ك طائفه‌لری یهودی كبی حركت ایتمكه نصل اجبار ایدرسین١٥ بز عن اصل یهودی اولوب طائفه‌لردن كناهكار اولمایه‌رق١٦ انسان شریعت عمللریله دكل آنجق عیسی المسیحه اولان ایمان واسطه‌سیله تبریر اولنه‌جغنی بیلدیكمزدن بز دخی شریعت عمللریله دكل آنجق مسیحه اولان ایمانله تبریر اولنمق اوزره عیسی المسیحه ایمان ایتدك زیرا شریعت عمللریله هیچ بر بشر تبریر اولنماز١٧ و اگر مسیح واسطه‌سیله تبریر اولنمق استر ایكن بز كندمز دخی كناهكار بولنور ایسه‌ك مسیح كناه خدمتجیسی‌میدر حاشا١٨ زیرا اگر ییقدیغم شیلری تكرار بنا ایدر ایسه‌م كندمی قباحتلو كوستررم١٩ چونكه بن اللهه یاشامق اوزره شریعت واسطه‌سیله شریعته اولدم٢٠ مسیح ایله برابر صلب اولندم و آرتق بن یاشامایورم آنجق مسیح بنده یاشایور. شمدی ایسه تنده یاشادقجه بنی سون و كندیسنی بنم ایچون تسلیم ایدن ابن اللهه اولان ایمانله یاشارم.٢١ اللهك عنایتنی ابطال ایتمم زیرا اگر صلاح شریعت واسطه‌سیله ایسه مسیح بیهوده یره اولمشدر.