١٢
١ واقعا افتخار ایتمك بڭا فائده ایتمز. ایمدی ربك رؤیالرینه و وحیلرینه كله‌یم٢ مسیحده بر ادم بیلورم بو ادم (جسدده‌می بیلمم یوقسه جسددن خارج‌می بیلمم الله بیلور) اون درت سنه مقدم آنسزین اوچنجی كوكه آلندی٣ و بویله بر ادمی بیلورم (جسدده می جسددن خارج‌می بیلمم الله بیلور)٤ آنسزین جنته آلنوب تعبیر اولنماز و سویله‌مسی ادمه جائز اولمایان سوزلر ایشیتدی٥ بویله بر كیمسه حقنده افتخار ایده‌جكم اما كندی حقمده ضعیفلكلرمدن غیری بر شی ایچون افتخار ایتمیه‌جكم٦ زیرا افتخار ایتمك استیه‌جك اولور ایسه‌مده عقلسز اولمایه‌جغم چونكه حقیقتی سویلیه‌جكم لكن بر كیمسه بنی كوردیكندن یا بندن ایشیتدیكی شیدن زیاده بڭا اعتبار ایتمسون دیو صاقنورم٧ و وحیلرك كثرتندن ناشی تكبر ایتمیه‌یم دیو تنمده بر دیكن یعنی بنی تعجیز ایتمك ایچون بر شیطان ملكی ویرلدی كه تكبر ایتمیه‌یم٨ بونڭ بندن دفعی حقنده ربه اوچ دفعه رجا ایتدم ایسه‌دم٩ بڭا بنم عنایتم سڭا كافیدر زیرا قوتم ضعیفلكده تكمیل اولور دیدی. ایمدی خوش خاطرله ضعیفلكلرمدن طولایی افتخار ایتمكی ترجیح ایدرم تا كه مسیحك قوتی بنم اوزرمده ساكن اوله.١٠ بو اجلدن مسیح ایچون ضعیفلكلره ستملره ضرورتلره تعدّی‌یه و مضایقه‌لره راضی ایم چونكه ضعیف اولدیغم زمان قوتلو ایم.١١ [افتخار ایتمكله] عقلسز اولدم. بنی سز مجبور ایتدیڭز زیرا هیچ بر شی دكل ایسه‌مده اك مشهور رسوللردن بر نقصانم اولمادیغی ایچون بن طرفكزدن توصیه اولنملو ایدم١٢ واقعا علامتلر معجزه‌لر و قوتلو ایشلرله اراكزده رسول علامتلری كمال صبرله اجرا اولندی١٣ زیرا سز سائر كلیسالردن به خصوصده اشاغی قالدیڭز. شو قدر واركه بن كندم سزه ثقلت ویرمدم. بو حقسزلغی بڭا عفو ایدكر.١٤ اشته اوچنجی كره یانكزه كلمكه حاضر ایم و سزه ثقلت ویرمیه‌جكم زیرا سزده اولانی دكل آنجق سزی ارارم چونكه اولادك والدین ایچون دكل اما والدینك اولاد ایچون مال جمع ایتمسی ایجاب ایدر١٥ و اگر چه بن سزی زیاده سودكجه آز سویلیور ایسه‌مده جانلر ڭز ایچون جان و كوكلدن صرف ایده‌جكم هم صرف اولنه‌جغم١٦ لكن فرض ایده‌لم كه بن سزه ثقلت ویرمدم آنجق فنباز اولمغله سزی حیله ایله طوتدم١٧ سزه كوندردیكم كیمسه‌لرك بری واسطه‌سیله سزدن استفاده‌می ایتدم١٨ تیطوسه رجا ایتدم و انك ایله برابر اول برادری كوندردم ایسه عجبا تیطوس سزدن استفاده ایتدیمی. بز همان بر روحده همان بر طریقده یورومدكمی.١٩ ینه سزه تبریۀ ذمت‌می ایدیورز ظن ایدرسڭز. اللهك حضورنده مسیحده سویله‌یورز و بو شیلرك جمله‌سی ای سوكیلولر سزڭ معموریتڭز ایچوندر٢٠ زیرا قورقارم كه كلدیكمده سزی استدیكم حالده بولمایه‌جغم بن دخی سزه استمدیكڭز حالده بولنه‌جغم و نزاغلر و حسدلر و غضب و منازعه و غیبت و غمازلق و تكبر و اختلال بولنه‌جق٢١ و ینه كلدیكمده اللهم بنی یانكزده تذلیل ایده‌جك و مقدما كناه ایتمش اولوب ایتدكلری ناپاكلك و زنا و فجوردن توبه ایتمه‌مش چوق كیمسه‌لر ایچون محزون اوله‌جغم.