١١
١ كاشكی عقلسزلغمه بر آز تحمل ایده ایڭز و ینه بڭا تحمل ایدڭز٢ زیرا سزڭ ایچون اللهك غیرتیله غیرتلو ایم چونكه سزی بر اره یعنی مسیحه پاك باكره عرض ایتمك ایچون نشانلادم٣ اما قورقارم كه ییلان كندی حیله‌سیله حوایی آلداتدیغی مثللو بویله‌جه سزڭ ذهنڭز دخی مسیحده اولان خلوصدن افساد اولنه‌جقدر٤ زیرا اگر بری گلوب بزم وعظ ایتمدیكمز بشقه بر عیسی وعظ ایده‌جك اولورسه یاخود آلمادیغڭز بشقه بر روح و یا قبول ایتمدیكڭز دیكر بر بشارت آله‌جق ایسه ڭز بویله كیمسه‌یه ایو تحمل اید ایدیڭز٥ زیرا اك مشهور رسوللردن هیچ بر نقصانم یوقدر ظن ایدرم٦ و كلامده جاهل ایسه‌مده علمده دكل ایم و لكن هر شیده هر وجهله سزه بیان اولندق٧ اللهك بشارتنی سزه بلا عوض تبشیر ایتدیكمده یوكسلمڭز ایچون كندمی آلچاقلتمامله كناه می ایتدم٨ سزڭ خدمتڭز ایچون سائر كلیسالردن علوفه آله‌رق انلری صویدم٩ و سزڭ یانكزده ایكن محتاج اولدم ایسه‌ده كیمسه‌یه ثقلت ویرمدم زیرا ماكدونیادن گلان برادرلر نقصانمی تماملادیلر و هر شیده سزه بار اولمقدن كندمی حفظ ایتدم و ایده‌جكم١٠ مسیحك حقیقتی بنده‌دركه اخائیا سمتلرنده بو افتخارمدن بن محروم قالمایه‌جغم١١ نیچون. سزی سومدیكم ایچونمیدر. الله بیلور١٢ اما فرصت ارایانلرك فرصتنی كسمك ایچون و افتخار ایتدكلری شیده بزم كبی بولنملری ایچون یاپمقده اولدیغم شیئی همان یاپه‌جغم١٣ زیرا بو مقوله كیمسه‌لر ساخته رسوللر اولوب مسیحك رسوللری صورتنه كیرن حیله‌باز عمله‌در١٤ بو ده عجایب دكل زیرا شیطان كندیسی نور ملكی صورتنه كیرر١٥ ایمدی انك خدمتجیلری دخی صلاح خدمتجیلری صورتنه كیررلر ایسه بیوك بر شی دكلدر انلرك عاقبتی عمللرینه كوره اوله‌جقدر١٦ تكرار دیرم بنی كیمسه عقلسز ظن ایتمسون. و هیچ اولماز ایسه همان عقلسز كبی بنی قبول ایدڭز تا كه بن دخی بر آز افتخار ایده‌یم.١٧ بو سویله‌دیكمی ربه كوره دكل آنجق بو افتخار جسارتیله عقلسزلقدن كبی سویله‌یورم١٨ مادامكه چوق كیمسه‌لر تن جهتیله افتخار ایدرلر بن دخی افتخار ایده‌جكم١٩ زیرا سز عقللو اولمغله عقلسزلره خوشنودیله تحمل ایدرسڭز٢٠ زیرا اگر بر كیمسه سزی اسیر ایدر ایسه بر كیمسه مالكزی ییر ایسه بر كیمسه سزدن بر شی آلورسه بر كیمسه تكبر ایدر ایسه بر كیمسه یوز كزه اورور ایسه تحمل ایدرسڭز٢١ تعییب طریقیله سویله‌یورم كویا كه بز ضعیف ایدك اما بر كیمسه‌نك جسورانه حركت ایتدیكی شیده (عقلسزلقله سویلرم) بن دخی جسورانه حركت ایدرم٢٢ انلر عبرانی‌میدر بن دخی. اسرائیللومیدر بن دخی. ابراهیم نسلندنمیدر بن دخی٢٣ مسیحك خدمتجیلریمیدر (عقلی یوق كبی سویلرم) بن دها زیاده. امكده زیاده‌سیله. ضر بلرده حددن زیاده. محبسلرده زیاده‌سیله. اولوم تهلكه‌لرنده دفعاته بولندم.٢٤ یهودیلر طرفندن بش كره قرقدن برر اكسك دكنك ییدم.٢٥ قامچیله اوچ دفعه دوكلدم بر دفعه طاشلاندم اوچ دفعه كمی ایله قره‌یه دوشدم. بر كون بر كیجه انكینده قالدم٢٦ چوق دفعه یولجیلقده ایرماقلر تهلكه‌لرنده حرامیلر تهلكه‌لرنده ملتم طرفندن تهلكه‌لرده طائفه‌لر طرفندن تهلكه‌لرده شهرده تهلكه‌لرده چولده تهلكه‌لرده دكزده تهلكه‌لرده ساخته برادرلر اراسنده تهلكه‌لرده بولندم٢٧ امك و زحمتده چوق دفعه او یقوسزلقده آجلق و صوسزلقده چوق دفعه ییمكسزلكده صوغوقده و چپلاقلقده بولندم٢٨ خارجی شیلردن ماعدا هر كون اوزرمه بریكان جمله كلیسالرك اندیشه‌سیدر٢٩ كیم ضعیفلنورده بن ضعیفلنمم. كیم سورچرده بنم یوركم یانماز٣٠ افتخار ایتمك لازم كلسه ضعیفلكمه متعلق شیلرله افتخار ایدرم٣١ الی‌الابد مبارك و ربمز عیسی المسیحك پدری اولان الله یالان سویله‌مدیكمی بیلور٣٢ دمشقده اریتاس ملِكك والیسی بنی طوتمق قصدیله دمشقلولرك شهرینی تحت محافظه‌یه آلدی٣٣ بن‌ده پنجره‌دن بر زنبیلله حصاردن اشاغی ایندریلوب اللرندن قورتلدم.