٩
١ زیرا مقدّسلر ایچون اوله‌جق اعانه خصوصنده سزه یازمه‌مه حاجت یوقدر٢ چونكه آرزوكزی بیلورم و بو بابده اخائیا كچن سنه‌دنبرو حاضردر دیو ماكدونیالولره سزڭ ایچون افتخار ایدیورم و طرفكزدن اولان غیرت اكثرینی تشویق ایلمشدر٣ لكن بزم حقكزده اولان افتخارمز بو خصوصده بیهوده اولمایوب دیدیكم كبی حاضر بولنمڭز ایچون برادرلری كوندردم٤ اولمایه كه ماكدونیالولر بنم ایله برابر كلوبده سزی حاضرلانمامش بولدقلری تقدیرده بز (دیمیه‌لم سز) بو اعتمادله اولان افتخارده محجوب اوله‌لم٥ ایمدی برادرلره رجا ایتمكی مقتضی كوردم كه اوّل یانكزه گیدوب سزڭ مقدما اخبار اولنان بركتكزی حاضرلایه‌لر شویله كه طمع صورتیله دكل آنجق بركت صورتیله حاضر اولسون٦ شونی دیرم كه قلتله اكن قلتله بیچر و بركتله اكن بركتله بیچر٧ هر كس حزن و یا مجبوریتله دكل آنجق قلبنك نیتنه كوره ویرسون زیرا الله جان و كوكلدن ویرنی‌سور٨ و الله سزه هر عنایتی آرتدرمغه قادردر تا كه هر وقتده هر شیده تام كفایتڭز اولوب هر خیر عملده آرته‌سڭز٩ نته كیم توزیع ایدوب فقرایه ویردی صلاحی الی الابد باقیدر دیو یازلمشدر١٠ و اكینجی‌یه تخم و طعام ایچون اتمك احسان ایدن سزه تخم احسان ایدوب چوغالده‌جق و صلاحكزك محصولاتنی آرتدره‌جقدر١١ تا كه بزم واسطه‌مزله اللهه شكری موجب اولان هر جومردلك ایچون هر شیده غنی اوله‌سڭز١٢ زیرا بو خدمتك اداره‌سی یالڭز مقدّسلرك نقصانلرینی تماملامایوب آنجق اللهه نیچه شكرلرك آرتمسنی موجب اولور١٣ چونكه بو خدمتك تجربه‌سی واسطه‌سیله مسیحك بشارتنه اولان اقراركرك اطاعتی و كندیلره و جمله‌یه اولان مشاركتكزك جومردلكی ایچون اللهه حمد ایدرلر١٤ و كندیلری دخی سزده اولان اللهك غایت عظیم احسانندن طولایی سزه اشتیاق ایده‌رك سزڭ ایچون دعا ایدرلر١٥ ایمدی اللهه تعریف اولنماز عطیه‌سی ایچون شكر اولسون