٨
١ ایمدی ای برادرلر اللهك ماكدونیا كلیسالرینه احسان ایتدیكی عنایتی سزه بیلدررز٢ چونكه عظیم مضایقه تجربه‌سنده مسرّتلرینك طاشقینلغی و شدتلو فقیر لكلری غنی جومردلكلرینك آرتمسنه باعث اولدی٣ زیرا شهادت ایدرمكه قدرتلرنجه و قدرتلرندن زیاده استكلو اوله‌رق٤ بو احسانلری و مقدّسلر ایچون اولان خدمتك اشتراكنی قبول ایتمه‌مزی چوق نیازلرله رجا ایتدیلر٥ و مأمل ایتدیكمز درجه‌ده دكل آنجق كندی كندیلرینی اوّلا ربه همده اللهك ارادتیله بزه دخی تسلیم ایتدیلر٦ حتی اقدمجه باشلامش اولدیغی مثللو بو احسانی دخی سزده اكمال ایتمسنی تیطوسدن رجا ایتدك٧ لكن هر خصوصده ایمانده و كلامده و علمده و هر بر غیرتده و سزدن بزه اولان محبتده ایلرولدیكڭز مثللو بو عنایتده دخی ایلرولیه‌سڭز٨ امر ایدر كبی دكل آنجق غیریلرك جهدی سبیله و سزڭ محبتكزك خلوصنی تجربه ایتمك اوزره سویله‌یورم٩ زیرا ربمز عیسی المسیحك عنایتنی بیلورسڭز كه زنكین ایكن سزڭ ایچون فقیر اولدی تا كه سز انك فقیر لكیله زنكین اوله‌سڭز١٠ و بو خصوصده رأیمی ویر یورم زیرا بو سزه فائده‌لودر كه كچن سنه‌دنبرو یالڭز اجراسنه دكل آنجق نیت ایتمكه دخی اقدمجه باشلامشسڭز١١ شمدی ایسه اجراسنی اكمال ایدڭز شویله كه نیت ایتمكه آرزو بولندیغی مثللو مالك اولدیغكزه كوره اكمال دخی اوله١٢ زیرا اگر اوّلا آرزو وار ایسه بر ادمك مالك اولمادیغنه كوره دكل آنجق اولدیغنه كوره ویرمسی مقبولدر١٣ زیرا مراد غیریلره راحت و سزه ثقلت اولمسی دكل آنجق مساوات طریقیله١٤ شمدیكی وقتده سزڭ فضله ڭز انلرك نقصانی انلرك فضله‌سی دخی بر وقت سزڭ نقصانڭز ایچون اولمسیدر١٥ تا كه چوق دیو شیرانه آرتمادی و آز دیو شیرانه اكسلمدی دیو یازلدیغی اوزره مساوات اوله١٦ لكن سزڭ ایچون بو جهدی تیطوسك قلبنه القا ایدن اللهه شكر اولسون١٧ زیرا رجایی قبول ایتمكله برابر زیاده غیرتی حسبیله كندی ارادتیله طرفكزه عزیمت ایتدی١٨ و جمله كلیسالر اراسنده بشارتده مدحی بولنان و بوندن فضله ربك عزّتی و سزڭ آرزوڭز ایچون خدمت ایلدیكمز احسانی كوتورمك اوزره١٩ كلیسالر طرفندن بزه یولداش انتخاب اولنان برادری انك ایله برابر كوندردك٢٠ و بو بابده صاقنورز كه خدمت ایتدیكمز بو احسان حقنده بر كیمسه بزی توبیخ ایتمیه٢١ چونكه یالڭز ربك حضورنده دكل آنجق انسان حضورنده دخی ایو شیلر قیدنده ایز.٢٢ و چوق دفعه چوق شیلرده تجربه ایله غیر تلو بولدیغمز و شمدی دخی سزه اولان زیاده اعتمادندنناشی دها زیاده غیر تلو بولنان برادرمزی انلر ایله برابر كوندردك٢٣ تیطوس حقنده ایسه بنم شریكم و سزڭ ایچون امكداشمدر برادرلرمز ایسه كلیسالر طرفندن كوندریلانلر و مسیحك شرفی‌درلر٢٤ ایمدی سزڭ محبتكزك و بزم سزڭ حقكزده اولان افتخارمزك برهاننی انلره و كلیسالرك حضورنده بیان ایدڭز