٦
١ ایمدی بز انك ایله برابر ایشلمكده ایكن رجا ایدرز كه اللهك عنایتنی بیهوده قبول ایتمش اولمایه‌سڭز٢ (زیرا سنی مقبول وقتده دیكله‌دم و سڭا خلاص كوننده امداد ایلدم دیو بیورر. اشته شمدی مقبول وقت اشته شمدی خلاص كونیدر)٣ و بو خدمت تعییب اولنمامسی ایچون هیچ بر شیده بر كونه توڭز ویرمیز٤ فقط هر شیده چوق صبرله ثقلتلرده ضرورتلرده مضایقه‌لرده٥ ضر بلرده محبوسیتلرده اختلاللرده زحمتلر و او یقوسزلقله ییمكسزلكده٦ پاكلك و علم و تأنیله لطفله روح القدسله ریاسز محبتله٧ حقیقت كلامی و اللهك قوتیله صاغدن و صولدن صلاح سلاحلریله٨ عزّت و ذلتله بدنامی و نیك‌نامیله طوغری ایكن الدادیجیلر كبی٩ معلوم ایكن نا معلوم كبی وفات ایدنلر كبی اما اشته یاشایورز تأدیب اولنوبده اوّلدرلمیان كیمسه‌لر١٠ محزون اولوبده دائما مسرور كیمسه‌لر فقر اولوب و لكن نیچه‌لری زنكین ایدن كیمسه‌لر هیچ بر شیئی اولمایوبده هر شیئه مالك اولانلر كبی اولوب كندمزی اللهك خدمتجیلری كبی كوستررز١١ ای قورنطوسلولر آغزمز سزه آچیلمش قلبمز دخی ككشلنمشدر١٢ بزده صیقلمش دكلسڭز آنجق كندی درونكزده صیقلمشسڭز١٣ (اولادمه كبی سویلرم) بوكا مقابل سز دخی ككشلنڭز١٤ مؤمن اولمایان ایله مناسبتسز بر بویوندریغه كیرمیڭز زیرا فسق ایله صلاحك نه علاقه‌سی وار و ظلمت ایله نورك نه مشاركتی وار١٥ و بلیعال ایله مسیحك نه موافقی یاخود مؤمن اولمایان ایله مؤمنك نه حصه‌سی وار١٦ و بتلر ایله اللهك هیكلنك نه مناسبتی وار زیرا سز حی اولان اللهك هیكلی سڭز نته كیم الله انلرده ساكن اولوب ارالرنده كزه‌جكم و بن انلرك اللهی اوله‌جعم انلر دخی قومم اوله‌جقدر دیو بیوردی١٧ بونڭ ایچون رب انلرك اراسندن چیقوب آیرلڭز ناپاك شیئه طوقونمایڭز دیو بیورر١٨ و ینه هر شیئه قادر رب بن دخی سزی قبول ایدوب سزه پدر اوله‌جغم سز دخی بڭا اوغللر و قیزلر اوله‌جقسڭز دیو بیورر.