٤
١ بو اجلدن اشبو خدمت بزده ایكن مرحمته نائل اولدیغمزه نظراً اوصانمایز٢ لكن رذالته سبب اولان كیزلو شیلری رد ایده‌رك حیله ایله حركت ایتمیز و اللهك كلامنی تحریف ایتمیوب آنجق حقی اظهار ایتمكله كندی كندمزی اللهك حضورنده هر بر ادمك ضمیرینه توصیه ایدرز٣ و بزم بشارتمز اورتیلو اولسه هلاك اولانلر حقنده اورتیلودر٤ چونكه انلرده اللهك صورتی اولان مسیحك جلالی بشارتنك نوری نلره ضیا ویرمه‌سی ایچون بو دنیا الهی ایمانسزلرك ذهننی كور ایتدی٥ زیرا كندمزی دكل آنجق رب عیسی المسیحی وعظ ایدرز و عیسی ایچون كندمزی سزه قول عد ایدرز٦ زیرا ظلمتدن نور پارلامسنی امر ایدن الله كندیسی عیسی المسیحك یوزنده اللهك جلالنی بیلمك نورینی ویرمك ایچون قلبلرمزده پارلادی٧ لكن قوتك فضیلتی بزدن اولمایوب اللهدن اولمسی ایچون بو خزینه‌یه طوپراق قابلر ایچنده مالك ایز٨ هر شیده مضایقه‌ده ایز لكن بیحضور دكل ایز. مضطرب ایز لكن مأیوس دكل ایز٩ تعدّی كورورز اما متروك دكل ایز. یره اوریلورز اما هلاك اولمش دكل ایز١٠ عیسانك اولومنی دائما جسدمزده طاشورز كه عیسانك حیاتی دخی جسدمزده اظهار اولنه١١ زیرا بز كه حیاتده ایز عیسانك حیاتی دخی بزم فانی تنمزده اظهار اولنمق اوزره عیسی ایچون هر وقت اولومه تسلیم اولنورز١٢ ایمدی بزده اولوم سزده ایسه حیات عاملدر١٣ لكن ایمان ایتدم انك ایچون سویله‌دم دیو یازلدیغی اوزره همان اول ایمان روحنه مالك اولدیغمزدن بز دخی ایمان ایدر و انك ایچون سویلرز١٤ چونكه رب عیسایی دیرلدن بزی دخی عیسی ایله دیرلدوب سزڭ ایله برابر احضار ایده‌جكنی بیلورز١٥ زیرا هر شی سزڭ ایچوندر تا كه عنایت چوعالمقله اكثرك تشكری سببیله اللهك عزّتی ایچون آرته١٦ بونڭ ایچون اوصانمایز لكن بزم ظاهری ادممز فنا بولور ایسه‌ده باطنی اولان كوندن كونه یكیلنور١٧ زیرا بزم بر آن ایچون اولان خفیف مضایقه‌مز بزه غایة الغایه عظیم و ابدی بر جلال حصوله كتورر١٨ مادامكه كورینان شیلره دكل آنجق كورونمیانلره نظر قیلارز زیرا كورینانلر زمانی و كورونمیانلر ابدی‌در