٥
١ ایمدی سوكیلو اولاد كبی اللهه مقتدی اولڭز٢ و محبتله یورویڭز نته كیم مسیح دخی بزی سووب كندینی بزم ایچون خوش رایحه اولمق اوزره اللهه تقدمه و ذبیحه تسلیم ایلدی٣ لكن مقدّسلره واجب اولدیغی اوزره زنا و هر كونه ناپاكلك یاخود طمعكارلغك اسمی بیله اراكزده آكلماسون٤ و بو ناسزا شیلر یعنی عارسزلق و سفاهت كلامی یاخود هزل بولنمایوب آنجق بالترجیح شكر عرض اولنسون٥ معلومڭز در كه هیچ بر زناكار یاخود ناپاك یاخود طمعكارك (كه بو بتپرستدر) مسیحك و اللهك ملكوتنده میراثی یوقدر٦ بیهوده سوزلرله سزی بر كیمسه آلداتماسون زیرا بو شیلر سببندن اهل عصیان اوزرینه اللهك غضبی گلور٧ ایمدی انلرك شریكلری اولمایڭز٨ زیرا بر زمان ظلمت ایدیڭز شمدی ایسه ربده نور اوله‌رق اهل نور كبی یورویڭز٩ زیرا نورك میوه‌سی هر ایولك و صلاح و حقیقتدن عبارتدر١٠ ربه مقبول اولان نه ایدیكنی تجربه ایدڭز١١ ظلمتك ثمره‌سز عمللرینه مشترك اولمایوب بالترجیح تعزیر ایدڭز١٢ زیرا انلرطرفندن كیزلو ایشلنیلان شیلری سویله‌مك بیله عیبدر١٣ اما تعزیر اولنان هر شی نور واسطه‌سیله ظاهر اولور زیرا اظهار اولنان هر شی نوردر١٤ بوكا بناءً ای اویقوده اولان اویان و اولولردن قیام ایله و مسیح سڭا ضیا ویره‌جكدر دیو بیورر.١٥ ایمدی عقلسزلر كبی دكل آنجق عقللولر كبی دقت اوزره حركت ایتمكه باقڭز١٦ و وقتی صاتین آلڭز زیرا بو كونلر فنادر١٧ بو اجلدن فهمسز اولمایوب آنجق ربك ارادتی نه اولدیغنی فهم ایدڭز١٨ و فجوره باعث اولان شرابله سرخوش اولمایڭز آنجق روحله مملو اولڭز١٩ بری بریڭز ایلهمزمور و الهی و روحانی تسبیحلرله تكلم و قلبلركزده ربه ترنم و تزمیر ایده‌رك٢٠ دائما هر شی ایچون پدر اللهه ربمز عیسی المسیحك اسمیله شكر ایدڭز٢١ بری بریكزه الله قورقوسیله مطیع اولڭز٢٢ ای زوجه‌لر كندی زوجلر كزه ربه مطیع اولور كبی مطیع اولڭز٢٣ زیرا زوج زوجه‌نك باشیدر نته كیم مسیح كلسیانك باشی و وجودك خلاصكاریدر٢٤ ایمدی كلیسا مسیحه مطیع اولدیغی مثللو زوجه‌لر دخی هر شیده كندی زوجلرینه مطیع اولسونلر٢٥ ای زوجلر كندی زوجه‌لر كزی سویڭز نته كیم مسیح دخی كلیسایی سودی و انك یولنه كندینی تسلیم ایلدی٢٦ تا كه صو ایله ییقامقده كلامله انی تطهیر ایلیوب تقدیس ایده٢٧ و لكه یا بورشق و بو مثللو شیدن عاری اوله‌رق مقدّس و لكه‌سز اولمق اوزره كلیسایی كندینه عزتلو احضار ایده٢٨ كذلك زوجلر زوجه‌لرینی كندی وجودلری كبی سومكه بورجلودرلر. كندی زوجه‌سنی سون كندی كندینی سومش اولور٢٩ زیرا بر كیمسه هیچ بر وقت كندی وجودینه بغض ایتمدی آنجق مسیح كلیسایی قایردیغی مثللو انی بسلر و قایرور٣٠ زیرا بز انك تنندن و كمیكلرندن اوله‌رق وجودینك اعضاسی ایز٣١ بو سببدن ادم پدرینی و والده‌سنی ترك ایدوب زوجه‌سنه ملاصق اوله‌رق ایكیسی یكوجود اوله‌جقدر٣٢ بو سرّ بیوكدر لكن بن مسیح و كلیسا حقنده سویله‌یورم٣٣ ایمدی سزدن هر بری كندی زوجه‌سنی همان كندی نفسی كبی سوسون زوجه ایسه كندی زوجنه حرمت ایتسون.