١٥
١ ای برادرلر سزه تبشیر ایتدیكم سزڭ دخی قبول ایدوب انده قائم بولندیغڭز بشارتی بیلدررم٢ بونڭ واسطه‌سیله دخی اگر بیهوده یره اینا نمادیڭز ایسه سزه تبشیر ایتدیكم وجهله كلامی محكم طوتدیغڭز حالده خلاص بولورسڭز٣ زیرا اوّل امرده بنم قبول ایتدیكمی سزه تسلیم ایلدم یعنی كتابلرده یازلدیغی اوزره مسیح كناهلرمز ایچون اولدی٤ و دفن اولنوب كتابلرده یازلدیغی اوزره اوچنجی كونده قیام ایتدی٥ و كیفاسه و صكره اون ایكیلره كوروندی٦ اندنصكره هما بش یوزدن زیاده برادرلره بر دفعه‌ده كوروندی بونلرك اكثری دخی شمدی‌یه قدر حیاتده اولوب بعضلری اویودیلر٧ بوندنصكره یعقوبه صكره جمله رسوللره كوروندی٨ و جمله‌سندن صكره بن سقط كبی اولانه دخی كوروندی٩ زیرا بن رسوللرك اك ادناسی ایم حتی رسول تسمیه اولنمغه لایق دكل ایم چونكه اللهك كلیساسنه تعدّی ایلدم١٠ اما هر نه ایسه‌م اللهك عنایتیله ایم و انك بڭا اظهار ایلدیكی عنایت بیهوده اولمادی لكن انلرك جمله‌سندن زیاده چالشدم فقط بن دكل آنجق بنم ایله اولان اللهك عنایتیدر١١ و الحاصل كرك بن كرك انلر بویله وعظ ایدرز سز دخی بویله ایناندیڭز١٢ و لكن مسیح اولولردن قیام ایتدی دیو وعظ اولنور ایسه سزدن بعضلری اولولرك قیامی یوقدر نصل دیرلر١٣ و اگر اولولرك قیامی یوعیسه مسیح دخی قیام ایتمه‌مشدر١٤ و اگر مسیح قیام ایتمه‌مش ایسه هم بزم وعظ ایتمه‌مز بیهوده همده سزڭ ایمانڭز بیهوده‌در١٥ بز دخی الله حقنده یالان شاهد بولنمش اولورز زیرا مسیحی احیا ایتدی دیو الله حقنده شهادت ایتدك حالبو كه اولولر حقیقةً قیام ایتمزلر ایسه انی احیا ایتمه‌مشدر١٦ زیرا اولولر قیام ایتمزلر ایسه مسیح دخی قیام ایتمه‌مشدر١٧ و اگر مسیح قیام ایتمه‌مش ایسه سزڭ ایمانڭز باطل اولوب سز دها كناهلركزده‌سڭز١٨ هم مسیحده اویویانلر دخی هلاك اولمشدر١٩ اگر مسیحه یالڭز بو عمر ایچون امید ایتمش ایسه‌ك ادملرك جمله‌سندن سفیل ایز٢٠ فقط شمدی مسیح اولولردن قیام ایدوب اویقویه وارانلرك طرفانده‌‌سی اولدی٢١ زیرا مادامكه اولوم انسان واسطه‌سیله اولدی اولولرك قیامی دخی انسان واسطه‌سیله اولور٢٢ زیرا ادمده جمله‌سی اولدكلری مثللو مسیحده دخی جمله‌سی احیا اولنه‌جقدر٢٣ لكن هر كس كندی صره‌سنده مسیح طرفانده اوله‌رق صكره انك ظهورنده مسیحه متعلق اولانلر بولنور٢٤ بعده هر ریاست و هر حكومت و قدرتی ابطال برله پدر اللهه ملكوتی تسلیم ایتد كدنصكره نهایت اوله‌جقدر٢٥ زیرا جمله دشمنلرینی كندی ایاقلری آلتنه قوینجه‌یه‌دك سلطنت ایتسه كركدر٢٦ ابطال اولنه‌جق صوك دشمن اولومدر٢٧ زیرا هر شیئی اڭا تابع ایتدی لكن هر شی تابع اولمشدر دیدیكنده هر شیئی اڭا تابع ایدن مستثنا اولدیغی آشكاردر٢٨ و هر شی اڭا تابع اولدقده او زمان الله هر شیده هر شی اوله دیو اوغل دخی بالذات هر شیئی اڭا تابع ایدنه تابع اوله‌جقدر٢٩ یوقسه اگر مطلقا اولولر قیام ایتمز ایسه اولولر ایچون وافتیز اولنانلر نه ایده‌جكلر. نه‌یه اولولر ایچون وافتیز اولنورلر٣٠ بز دخی نیچون هر ساعت مخاطره‌یه كرفتار اولورز٣١ ربمز عیسی المسیحده سزڭ حقكزده اولان افتخارم حقی ایچون هر كون اولیورم٣٢ اگر بن افسوسده انسانجه وحوش ایله جنكلشدم ایسه اولولر قیام ایتمدیكی تقدیرده بڭا نه فائده اولور. ییه‌لم و ایچه‌لم زیرا یارین اولورز٣٣ آلدانمایڭز كوتو الفت كوزل اخلاقی بوزار٣٤ صالحانه اویانڭز و كناه ایتمیڭز زیرا بعضلرده الله حقنده معلومات یوقدر. سزی اوتاندرمق ایچون سویلرم.٣٥ اما بر كیمسه اولولر نصل قیام ایدرلر و نه جنس جسدله كلورلر دیه‌جكدر٣٦ ای عقلسز سنڭ اكدیكك شی اولمینجه دیرلمز٣٧ و بر شیئی اكدیككده اوله‌جق جسدی اكمیوب آنجق بغدای اولسون و یاخود بشقه درلو اولسون چپلاق دانه‌یی اكرسین٣٨ و الله اڭا استدیكی كبی بر جسد و تخملرك هر برینه كندینه مخصوص بر جسد ویرر٣٩ هر تن بر نوع تن دكلدر آنجق انسان تنی بشقه و بهایم تنی بشقه و بالق تنی بشقه و قوش تنی بشقه‌در٤٠ و سماوی جسدلر و زمینی جسدلر وار لكن سماویلرك شرفی بشقه و زمینیلرك شرفی بشقه‌در٤١ كونشك شرفی بشقه و آیك شرفی بشقه و یلدزلرك شرفی بشقه‌در زیرا شرف جهتیله یلدز یلدزدن فرقلودر٤٢ اولولرك قیامی دخی بویله‌در. فانی اوله‌رق اكیلور فانی اولمایه‌رق قیام ایدر٤٣ ذلتده اكیلور شرفده قیام ایدر. ضعفده اكیلور قوتده قیام ایدر٤٤ حیوانی جسد اكیلور روحانی جسد قیام ایدر. حیوانی جسد وار روحانی جسد دخی وار در٤٥ بویله دخی یازلمشدر كه برنجی انسان یعنی ادم حیاته مالك ذات اولدی صكره‌كی ادم حیات ویرن روح اولدی٤٦ لكن روحانی دكل آنجق حیوانی مقدم اولوب روحانی اندنصكره اولدی٤٧ برنجی انسان یردن ترابی ایدی. ایكنجی انسان سمادن اولان ربدر٤٨ ترابی نصل ایسه ترابیلر دخی اویله‌در و سماوی نصل ایسه سماویلر دخی اویله‌در٤٩ و ترابینك صورتنی كیدیكمز مثللو سماوینك صورتنی دخی كیه‌جڭز٥٠ بونی دخی دیرم ای برادرلر تن و قان ملكوت اللهه وارث اولهماز و فانی اولان فانی اولمایانه وارث اولهماز٥١ اشته سزه بر سرّ سویلرم جمله‌مز اویومایه‌جغز اما جمله‌مز صوك صورده٥٢ بر آنده بر كوز قمپه‌سنده تبدل ایده‌جكر چونكه صور چالنه‌جقدر و اولولر فانی اولمایه‌رق دیریله‌جك بز دخی تبدل ایده‌جكر٥٣ زیرا بو فانی اولان فانی اولمایانی كیمك و بو اولومه مبتلا اولان اولومسزلكی كیمك كركدر٥٤ و بو فانی اولان فانی اولمایانی كید كدنصكره و بو اولومه مبتلا اولان اولومسزلكی كید كدنصكره او زمان اولوم غلبه‌یه غرق اولدی دیو یازلمش اولان كلام وقوع بوله‌جقدر٥٥ ای اولوم سنڭ دیكنك نره‌ده ای هاویه سنڭ غلبه‌ك نره‌ده‌در٥٦ اولومك دیكنی كناه و كناهك قوتی شریعتدر٥٧ لكن ربمز عیسی المسیح واسطه‌سیله بزه غلبه‌یی احسان ایدن اللهه شكر اولسون٥٨ ایمدی ای سوكیلو برادرلرم امكڭز ربده بیهوده اولمادیغنی بیله‌رك محكم و ثابت قدم بولنوب دائما ربك ایشنده آرتمق اوزره اولڭز