١٣
١ اگر انسان و ملكلر لسانلریله سویلر ایسه‌م محبتم اولمادقجه چینغردایان باقر یاخود چینلایان زیل اولمش اولورم٢ و اگر بنده الهام اولوبده جمله سرّلری و جمله علمی بیلسه‌م و اگر طاغلری یرندن نقل ایتمكه مقتدر اولان كامل ایمانم اولسه محبتم اولمادقجه بر شی دگلم٣ و اگر بتون اموالمی صدقه ویرسه‌م و اگر جسدمی یانمغه تسلیم ایلسه‌م محبتم اولمادقجه بڭا بر فائده ایتمز٤ محبت تأنی ایدوب لطفله معامله ایدر. محبت حسد ایتمز. محبت اوكونمز تكبر ایتمز٥ بد معامله ایتمز. كندی فائده‌سنی اراماز حدتلنمز سوء ظن ایتمز٦ حقسزلقدن حظ ایتمیوب حقیقتله محظوظ اولور٧ هر شیئه تحمل ایدر. هر شیئه اینانور. هر شیئی امید ایدر. هر شیئه صبر ایدر٨ محبت اصلا زوال بولماز الهاملر ایسه ابطال اولنه‌جقلر. لسانلر ایسه نهایت بوله‌جقلر علم ایسه ابطال اولنه‌جقدر٩ زیرا جزئی بیلورز و الهامله جزئی سویلرز١٠ اما كامل اولان كلدیكنده اولوقت بو جزئی اولان ابطال اولنه‌جقدر١١ بن چوجوق ایكن چوجوق كبی سویلر چوجوق كبی تفكر ایدر چوجوق كبی قیاس ایدر ایدم اما ادم اولدقده چوجوغه مخصوص شیلری ترك ایتدم١٢ زیرا شمدی آیینه‌دن رمزله اما او زمان یوز یوزه كورورز. شمدی بر جزئی بیلورم اما او زمان بیلندیكم مثللو بیله‌جكم ١٣ شمدی ایسه ایمان امید محبت اوچی‌ده باقی قالور و لكن بونلرك بیوكی محبتدر.