١٢
١ ای برادرلر روحانی موهبه‌لر حقنده بیخبر اولمكزی استمم.٢ بیلورسڭز كه طائفه‌لر ایكن كوتورلدیكڭز كبی دلسز بتلره جلب اولنور ایدڭز٣ انك ایچون سزه بیلدررمكه بر كیمسه اللهك روحیله سویلیه‌رك عیسی ملعوندر دیمز و بر كیمسه روح القدسله اولمانیجه عیسی ربدر دیه‌مز٤ مختلف موهبه‌لر دخی وار ایسه‌ده روح بردر٥ و مختلف خدمتلر وار ایسه‌ده رب بردر٦ و مختلف عمللر وار ایسه‌ده جمله‌ده جمله‌نك عاملی همان اللهدر٧ لكن هر كسه روحك اظهاری منفعت ایچون احسان اولنور٨ كیمینه روحك واسطه‌سیله حكمت كلامی و كیمینه همان اول روحه كوره علم كلامی٩ دیكرینه دخی همان اول روحله ایمان و اخرینه همان اول روحله شفا ویریجی موهبه‌لر١٠ و غیریسنه معجزه‌لر اجراسی و دیكرینه الهامله سویله‌مك اخرینه دخی روحلرك فرق و تمییزی و غیریسنه مختلف لسانلر و دیكرینه لسانلر ترجمه‌سی بخش اولنور١١ و بونلرك جمله‌سنك عاملی همان اول روح وحید اولوب كندی مرادینه كوره هر كسه آیروجه توزیع ایدر١٢ زیرا نصلكه جسد بر و اعضاسی چوق اولوب بو بر جسدك جمله اعضاسی دخی چوق ایسه‌ده ینه بر جسددر مسیح دخی بویله‌در١٣ چونكه بز كرك یهودی كرك یونانی كرك قول كرك حرّ جمله‌مز بر روحله بر جسد اولمق اوزره وافتیز اولندق جمله‌مز دخی بر روحدن ایچورلدك١٤ چونكه جسد دخی بر عضو دكل آنجق چوق اعضادر١٥ اگر ایاق بن ال اولمادیغم ایچون جسددن دكل ایم دیر ایسه انك ایچون جسددن دكلمیدر١٦ و اگر قولاق بن كوز اولمادیغم ایچون جسددن دكل ایم دیر ایسه بونڭ ایچون جسددن دكلمیدر١٧ اگر بتون جسد كوز اولسیدی ایشیتمك نرهده اولور ایدی و اگر كافه‌سی قولاق اولسیدی قوقلامق نرهده اولور ایدی.١٨ شمدی ایسه الله اعضانك هر برینی استدیكی وجهله جسدده قودی١٩ و اگر جمله‌سی بر عضو اولسیدی جسد نرهده اولور ایدی٢٠ اما شمدی اعضا چوق ایسه‌ده جسد بردر٢١ و كوز اله سڭا محتاج دكل ایم یاخود ینه باش ایاقلره سزه محتاج دكل ایم دیه‌مز٢٢ حتی جسدك زیاده ضعیف عدّ اولنان اعضاسی اك زیاده لازمدر٢٣ و جسدك آز شرفلو عدّ ایتدیكمز اعضاسنه دها زیاده شرف ویررز و كوزل اولمایان اعضامزك دها زیاده كوزللكی اولور٢٤ اما كوزل اعضامز ایچون احتیاج یوقدر. لكن الله نقصانی اولانه دها زیاده شرف ویره‌رك جسدی امتزاج اوزره ترتیب ایلدی٢٥ تا كه جسدده اختلاف اولمایوب اعضا اتفاق اوزره بری برینه همت ایده‌لر٢٦ و اعضادن بری الم چكدیكی حالده اعضانك جمله‌سی برابر الم چكر و اعضادن بری شرفلو اولدیغی حالده اعصانك جمله‌سی برابر فرحلانور٢٧ ایمدی سز مسیحك جسدی و آیری آیری اعضاسی سڭز٢٨ الله دخی كلیساده اوّلا رسوللر ثانیاً الهامه مالك اولانلر ثالثاً معلملر اندنصكره معجزه‌لر اندنصكره شفابخش موهبه‌لر و معاونتلر و اداره‌لر و مختلف لسانلر تعیین ایلدی٢٩ جمله‌سی رسول‌می. جمله‌سی الهامه مالك‌می. جمله‌سی معلم‌می. جمله‌سی معجزات صاحبی‌می٣٠ جمله‌سی شفابخش موهبه‌لر صاحبمییدر. جمله‌سی لسانلر سویلرمی. جمله‌سی ترجمه ایدرمی٣١ ایمدی اك ایو موهبه‌لره رغبت ایدڭز و ینه سزه دها اعلا بر یول كوستره‌یم.