١١
١ بن مسیحه مقتدی اولدیغم مثللو سز دخی بڭا مقتدی اولڭز٢ ایمدی ای برادرلر بنی هر شیده خاطركزه كتوروب سزه تسلیم ایتدیكم وجهل تعلیماتی حفظ ایتدیكڭز ایچون سزی مدح ایدرم٣ لكن هر ارككك باشی مسیح و قارینك باشی اركك اولوب مسیحك باشی دخی الله ایدیكی معلومڭز اولمسنی استرم٤ باشی اورتیلو اوله‌رق دعا ایدن یا الهامله سویلیان اركك كندی باشنی تحقیر ایتمش اولور٥ و باشی اورتیسز اوله‌رق دعا ایدن یا الهامله سویلیان هر قاری كندی باشنی تحقیر ایتمش اولور زیرا همان تراش اولمش كبی اولور٦ زیرا اگر قاری اورتنمزسه صاچی دخی كسیلسون اما اگر قارینك صاچنك كسیلمسی یا تراش اولمسی اڭا عیب ایسه اورتنسون٧ زیرا اركك اللهك صورتی و عزّتی اولمغله باشنی اورتمه‌مك كركدر قاری ایسه ارككك عزّتیدر٨ چونكه اركك قاریدن دكل آنجق قاری ارككدندر٩ و دخی اركك قاری ایچون دكل آنجق قاری اركك ایچون خلق اولندی١٠ بو اجلدن قارینك باشنده ملكلر سببندن حكومت علامتی اولمق ایجاب ایدر١١ فقط ربده قاری ارككسز اركك دخی قاریسز دكلدر١٢ زیرا قاری ارككدن اولدیغی مثللو اركك دخی قارینك واسطه‌سیله‌در لكن هر شی اللهدندر١٣ كندی كندیكزده حكم ویر ڭز قارینك اورتیسز اوله‌رق اللهه دعا ایتمسی لایقمیدر١٤ ارككك اوزون صاچی اولمسی اڭا عیب اولدیغنی طبیعت بیله سزه اوكرتمزمی١٥ و لكن قارینك اوزون صاچی اولمسی كندینه شرفدر زیرا صاچ اڭا نقاب ایچون ویرلمشدر١٦ اما اگر بر كیمسه منازعه ایتمك استر ایسه نه بزم نه ده اللهك كلیسالرینك بویله عادتی واردر.١٧ لكن شونی تنبیه ایدر ایكن سزی مدح ایتمم چونكه تجمعكزدن فائده دكل آنجق ضرر حاصل اولیور١٨ زیرا اوّلا سز كلیساده جمع اولدیغكزده ارا كزده اختلافلر اولدیغنی ایشیدیورم و بر مرتبه اینانورم١٩ زیرا اراكزده فرقه‌لرك دخی بولنمسی لازمدر تا كه اراكزده مقبول اولانلر ظاهر اوله‌‌لر٢٠ ایمدی بر یره تجمعڭز عشای ربانی‌یی ییمك ایچون دكلدر٢١ زیرا هر بریڭز طعام اثناسنده كندی طعامنی اوّلجه آلور و بری آچ قالور دیكری دخی سرخوش اولور٢٢ ییمك و ایچمك ایچون خانه‌لرڭز یوقمیدر یوقسه اللهك كلیساسنی تحقیر ایدوب محتاج اولانلری خجل‌می ایدرسڭز. سزه نه دیه‌یم. بو خصوصنده سزی مدح ایده‌یم‌می مدح ایتمم٢٣ زیرا بن سزه تسلیم ایتدیكمی رب طرفندن آلدم یعنی رب عیسی اله ویرلدیكی كیجه‌ده اتمك آلوب٢٤ شكر ایتد كدنصكره پاره‌لدی و آلڭز ییڭز. بو سزڭ ایچون پاره‌لنان جسدمدر. بونی بنی ذكر ایتمك ایچون ایلیڭز دیدی٢٥ كذلك اقشام طعامندنصكره كاسه‌یی دخی آلوب بو كاسه بنم قانمله اولان عهد جدیددر. انی هر ایچدیككزده بنی ذكر ایتمك ایچون ایلیڭز٢٦ زیرا هر دفعه بو اتمكدن ییوب بو كاسه‌دن ایچدیككزده ربك اولومنی كندیسی كلنجه‌یه‌دك اعلان ایدرسڭز٢٧ بوكا بناءً هر كیم كه لایقسز طرزله بو اتمكدن ییرسه یاخود ربك كاسه‌سندن ایچرسه ربك جسدینه و قاننه صوچلو اولور٢٨ ایمدی ادم كندینی امتحان ایتسون و بو وجهله اول اتمكدن ییسون و اول كاسه‌دن ایچسون٢٩ زیرا لایقسز طرزله ییوب ایچن ربك جسدینی فرق و تمییز ایتمدیكندن كندی علیهنه حكم ییوب ایچمش اولور٣٠ بو سببدن اراكزده بر چوق ضعیف و علیل كیمسه‌لر بولنوب نیچه‌لردخی اویورلر٣١ زیرا اگر كندی كندیمزی حكم ایتسیدك محكوم اولماز ایدك٣٢ اما حكم اولندیغمز حالده دنیا ایله برابر علیهمزه حكم اولمامق ایچون رب طرفندن تأدیب اولنورز٣٣ و الحاصل ای برادرلرم طعام ایچون جمع اولدیغكزده بری بریكزی بكلیڭز٣٤ و اگر بر كیمسه آج ایسه خانه‌ده ییسون كه حكم ایچون جمع اولمش اولمایه‌سڭز٣٥ بشقه شیلری ایسه كلدیكمده ترتیب ایدرم.