٨
١ و بتلره ذبح اولنان نسنه‌لر خصوصنده جمله‌مزك علمه مالك اولدیغمزی بیلورز. علم كبر كتورر اما محبت معمور قیلار٢ و اگر بر كیمسه بر شی بیلورم ظن ایدرسه واجب اولان علمله دها هیچ بر شی بیلمز٣ اما اگر بر كیمسه اللهی سور ایسه اول كیمسه انك عندنده معلومدر٤ ایمدی بتلره ذبح اولنان شیلری ییمك بحثنه كلنجه دنیاده بتك بر شی اولمادیغنی و بر اللهدن بشقه الله اولمادیغنی بیلورز٥ زیرا كرك كوكده كرك یرده اله تسمیه اولنانلر وار ایسه‌ده (نته كیم چوق الهلر و چوق ربلر واردر)٦ بزجه بر الله یعنی پدر واردر كه جمله كائنات اندن اولوب بز دخی انك ایله ایز و بر رب عیسی المسیح واردر كه انك واسطه‌سیله جمله مخلوقات وجوده گلوب بز دخی انك واسطه‌سیله ایز٧ اما بو علم جمله ادملرده بولنماز و بعضلری شمدی‌یه‌دك بتی بر شی ظن ایده‌رك بته ذبح اولنمش دیو ییرلر و ضمیرلری ضعیف اولمغله مردار اولور٨ لكن طعام بزی اللهه مقبول قیلماز زیرا ییدیكمز حالده فضیلتمز اولماز و ییمدیكمز حالده اكسكلكمز اولماز٩ آنجق دقت ایدیڭز كه بو سربستلكڭز ضعیفلره توڭز سببی اولماسین١٠ زیرا بر كیمسه سنڭ كبی علم صاحبنی بتخانه‌ده سفره‌ده اوتورر كوردیكی حالده اول ضعیف اولانك ضمیری بتلره ذبح اولنان شیلری ییمكه جسارتلنمرمی١١ و بویله‌جه یولنه مسیحك اولدیكی ضعیف برادر سنڭ علمك سببیله هلاك اولور١٢ بویله‌جه برادرلر علیهنده كناه ایدوب انلرك ضعیف ضمیرینی یاره‌لایه‌رق مسیحه قارشو كناه ایدرسڭز١٣ بوكا بناءً اگر طعام برادرمه توڭز اولورسه برادرمه توڭز اولمایه‌یم دیو الی‌الابد ات ییمیه‌جكم