٧
١ و بڭا یازدیغڭز ماده‌لره كلنجه ار ایچون قاری‌یه طوقونمامق ایودر٢ بونڭ ایله برابر فحشیاتدن وقایه ایچون هر ادمك كندی زوجه‌سی و هر قارینك كندی زوجی اولسون٣ زوج زوجه‌سی و زوجه دخی زوجی حقنده اولان وجیبه‌سنی ایفا ایتسون٤ زوجهنك جسدی كندی حكمنده دكل آنجق زوجك حكمنده‌در كذلك زوجك جسدی كندی حكمنده دكل آنجق زوجهنك حكمنده‌در٥ بری بریكزی محروم ایتمیڭز مكركه اوروج و دعا ایله مشغول اولمق ایچون طرفینك رضاسیله موقة اوله و كندیكزی ضبط ایده‌مه‌مزلكدن طولایی شیطانك سزی اغوا ایتمه‌مسی ایچون تكرار بر یره كلڭز٦ بونی دخی امر طریقیله دكل آنجق مساعده طریقیله سویله‌رم٧ زیرا جمله ادملرك بنم كبی اولملرینی استرم لكن كیمینك بر صورت كیمینك دیكر صورتله هر برینك الله طرفندن كندینه مخصوص موهبه‌سی واردر٨ اما اولنمه‌مش اولانلره و طول قاریلره دیرمكه بنم كبی قالملری خیرلودر٩ و لكن اكركندی نفسلرینك ضبطنه مقتدر دكللر ایسه اولنسونلر زیرا اولنمك یانمقدن اولی‌در١٠ لكن اولنمش اولانلره بن دكل آنجق رب زوجهنك زوجندن آیرلمامسنی امر ایدر١١ (و لكن آیرلدیغی تقدیرده زوجسز قالسون یاخود زوجی ایله بارشسون) زوج دخی زوجه‌یی ترك ایتمسون١٢ بشقه كیمسه‌لره ایسه رب دكل بن دیرمكه اگر بر برادرك مؤمن اولمایان زوجه‌سی اولدیغی حالده او دخی كندیسی ایله برابر ساكن اولمغه راضی ایسه انی ترك ایتمسون١٣ بر زوجهنك دخی مؤمن اولمایان زوجی اولدیغی حالده او دخی كندیسی ایله برابر اقامته راضی ایسه انی ترك ایتمسون١٤ زیرا مؤمن اولمایان زوج زوجه‌سیله تقدیس اولنور و مؤمن اولمایان زوجه زوجیله تقدیس اولنور یوقسه چوجوقلر ڭز ناپاك اولور ایدی اما شمدی مقدّسدرلر١٥ لكن اگر مؤمن اولمایان آیریلور ایسه آیرلسون بو مثللو كیفیتلرده برادر یاخود همشیره اسیر دكلدر آنجق الله بزی سلامتده بولنمغه دعوت ایلدی١٦ زیرا ای زوجه نه بیلورسین بلكه زوجكی خلاص ایده‌جكسین یاخود ای زوج نه بیلورسین بلكه زوجه‌كی خلاص ایده‌جكسین١٧ فقط رب هر برینه نصل قسمت ایتدی ایسه یعنی الله هر برینی نه حالده دعوت ایتدی ایسه او حالده یوروسون و جمله كلیسالرده بویله‌جه تنبیه ایدرم١٨ بر كیمسه مختون اوله‌رق دعوت اولندی ایسه ختانسز اولماسون. بر كیمسه غیری مختون دعوت اولندی ایسه ختان اولنماسون١٩ ختان بر شی دكلدر و ختانسزلق بر شی دكلدر آنجق اللهك امرلرینك حفظی واجب‌در٢٠ هر كس نه حالده دعوت اولندی ایسه او حالده قالسون٢١ قول اوله‌رق دعوت اولندك ایسه غم چكمه لكن اگر آزاد اوله‌بیلور ایسه‌ك انی ترجیح ایله٢٢ زیرا ربده دعوت اولنان قول ربك آزادلیسیدر كذلك حرّ اوله‌رق دعوت اولنان مسیحك قولیدر٢٣ بها ایله صاتین آلندیڭز انسانه قول اولمایڭز٢٤ ای برادرلر هر كس نه حالده دعوت اولندی ایسه اللهك حضورنده او حالده قالسون٢٥ لكن باكره‌لر خصوصنده رب طرفندن بڭا امر یوقدر اما بن صادق اولمغه ربك مرحمت ایلدیكی كیمسه كبی رأی ویررم٢٦ ایمدی ظن ایدرمكه شمدیكی ضرورت سببندن بو ایو در یعنی ادمه بویله قالمق خیرلودر٢٧ زوجه‌یه باغلومیسین چوزلمكی طلب ایتمه. زوجه‌دن چوزلمشمیسین زوجه طلب ایتمه٢٨ اما اولنور ایسه كده كناه ایتمزسین باكره دخی اولنورسه كناه ایتمز لكن بو كیمسه‌لر جسدجه مضایقه چكه‌جكلردر بن ایسه سزی اسركرم٢٩ ای برادرلر بونی دیرمكه وقت قیصالمشدر قالدیكه زوجه‌سی اولانلر زوجه‌سی یوق كبی٣٠ و اغلایانلر اغلاماز كبی و سوینانلر سوینمز كبی و صاتین آلانلر مالك اولماز كبی٣١ و بو دنیایی استعمال ایدنلر افراطه استعمال ایتمز كبی اولسونلر زیرا بو دنیانك هیئتی زائل اولور٣٢ بن ایسه اندیشه‌سز اولمكزی استرم. اولی اولمایان كیمسه ربی خوشنود ایتمك ایچون ربه متعلق شیلر حقنده اندیشه ایدر٣٣ اما اولی اولان كیمسه زوجه‌سنی خوشنود ایتمك ایچون دنیایه متعلق شیلر حقنده اندیشه ایدر٣٤ زوجه ایله باكره‌نك فرقی وار اولنمه‌مش اولان جسدجه و روحجه مقدّس اولمق ایچون ربه متعلق شیلر حقنده اندیشه ایدر اما اولنمش اولان زوجنی خوشنود ایتمك ایچون دنیایه متعلق شیلر حقنده اندیشه ایدر٣٥ بونی دخی اوزركزه كمند آتمق ایچون دكل آنجق سزڭ فائده ڭز ایچون هم لایقی وجهله غائله‌سز ربه ملازمتڭز ایچون سویله‌یورم٣٦ اما اگر بر كیمسه كندی قیزی حقنده وقتی كچمش اولدیغندن نكاحنی منع ایتمسیله نا لایق معامله ایتدیكنی ظن ایدر ایسه بویله ایجاب ایتدیكی حالده استدیكنی ایتسون كناه ایتمز اولنسونلر٣٧ و لكن محبوریت تحتنده اولمایه‌رق ارادتی كندی حكمنده بولنوب قلبی ثابت اولان كیمسه كندی قیزینی الیقومغی قلبنده تصمیم ایتمش ایسه ایو ایدر٣٨ و الحاصل اولندران ایو ایدر اما اولندرمیان دها ایو ایدر٣٩ زوجه زوجك عمری اولدقجه [شریعت موجبنجه] اڭا باغلودر اما اگر زوجی وفات ایدرسه استدیكی كیمسه ایله اولنمكه مأذوندر فقط ربده اولسون٤٠ لكن بویله قالدیغی حالده بنم رأیه كوره دها مباركدر و ظن ایدرمكه بنده اللهك روحی واردر