٣
١ بن دخی ای برادرلر سزه روحانیلره كبی سویلیه‌مدم آنجق جسمانیلره كبی مسیحده چوجوقلره كبی سویله‌دم٢ سزه طعام دكل آنجق سود ویردم زیرا دها تحملنه قادر دكل ایدیڭز و شمدی بیله دها قادر دكلسڭز٣ چونكه دها جسمانیسڭز زیرا اراكزده حسد و نزاع [و تفرقه‌لر] بولندیغی حالده جسمانی دكلمیسڭز و انسانجه حركت ایتمیورمیسڭز٤ زیرا بری بن پولسك ایم و دیكری بن اپوللوسك ایم دیدیكنده جسمانی دكلمیسڭز٥ ایمدی پولس كیم و اپوللس كیمدر آنجق ربك هر برینه احسان ایتدیكنه كوره ایمان ایتمكزه واسطه اولان خدمه‌در٦ بن دیكدم اپوللس صولادی لكن الله یتشدردی٧ شویله كه دیكن بر شی دكل و صولایان دخی بر شی دكلدر اما یتشدران اللهدر٨ دیكن و صولایان دخی بردر لكن هر بری كندی امكنه كوره كندی اجرینی آله‌جقدر٩ زیرا بز الله ایله امكداش ایز. سز اللهك تارلاسی اللهك بناسی‌سڭز١٠ الله طرفندن بڭا احسان اولنان عنایته كوره ماهر بر معمار كبی تمل براقدم. اوزرینه دیكر بر كیمسه دخی بنا یاپار فقط هر كس نصل بنا یاپدیغنه دقت ایتسون١١ زیرا براغیلان تملدن یعنی عیسی المسیحدن ماعدا بر تمل براقمغه هیچ بر كیمسه مقتدر اولماز١٢ و لكن اگر بر كیمسه بو تمل اوزرینه آلتون كومش ذیقیمت طاشلر اغاج اوت قامش بنا ایدرسه١٣ هر كسك ایشی آشكار اوله‌جق زیرا اوّل كون انی بیان ایده‌جكدر چونكه آتشله میدانه چیقار و هر برینك ایشی نه مقوله اولدیغنی آتش امتحان ایده‌جكدر١٤ اگر بر كیمسه‌نك بنا ایتدیكی ایش قالورسه اجرینی آله‌جق١٥ اگر بر كیمسه‌نك ایشی یانار ایسه ضرر كوره‌جك اما كندیسی آتشدن كچر كبی قورتیله‌جقدر١٦ سز اللهك هیكلی اولوب درونكزده اللهك روحی اقامت ایتدیكنی بیلمزمیسڭز١٧ اگر بر كیمسه اللهك هیكلنی بوزارسه الله انی بوزه‌جقدر زیرا اللهك هیكلی مقدّسدر اول هیكل دخی سزسڭز١٨ بر كیمسه كندی كندینی آلداتماسون. اگر اراكزده بر كیمسه بو عالمده كندینی اهل حكمت عدّ ایدرسه اهل حكمت اولمق ایچون سفیه اولسون١٩ زیرا دنیانك حكمتی اللهك عندنده سفاهتدر نته‌كیم حكمت صاحبلرینی كندی حیله‌لرنده طوتان اودر٢٠ و ینه رب حكمت صاحبلرینك افكاری باطل اولدیغنی بیلور دیو یازلمشدر٢١ و الحاصل بر كیمسه انسانله افتخار ایتمسون٢٢ زیرا هر شی سزڭدر كرك پولس كرك اپوللوس كرك كفاس كرك دنیا كرك حیات كرك اولوم كرك حاضر شیلر كرك اوله‌جق شیلر جمله‌سی سزڭدر٢٣ سز ده مسیحك سڭز مسیح دخی اللهكدر.