٢
١ و بن دخی ای برادرلر سزه كلدیكمده اللهك شهادتنی كلام یاخود حكمت فضیلتیله خبر ویرمك ایچون كلمدم٢ زیرا اراكزده عیسی المسیحدن بلی صلب اولناندن غیری بر شی بیلمه‌مكه قرار قیلدم.٣ و بن ضعیفلك و قورقوده و چوق دتره‌مه ایله یانكزده بولندم٤ و كلامم و وعظم [انسان] حكمتنك اقناع ایدیجی سوزلریله دكل آنجق روحك و قدرتك برهانیله ایدی٥ تا كه ایمانڭز انسان حكمتیله دكل آنجق اللهك قدرتیله اوله٦ لكن كامللرك اراسنده حكمت سویلرز و لكن بو عالمك حكمتنی یاخود بو عالمك زوال بولور رئیسلرینك حكمتنی دكل٧ آنجق اللهك مخفی اولان حكمتنی یعنی اللهك عزتمز ایچون ازلدن تقدیر ایلدیكنی سرّ ایله سویلرز٨ انی دخی بو عالمك رئیسلرینك هیچ بری بیلمدی زیرا اگر بیلسه‌لر ایدی رب الجلالی صلب ایتمزلر ایدی٩ فقط یازلدیغی كبی كوز كورمدیكی و قولاق ایشیتمدیكی و ادمك فكرینه كلمدیكی یعنی اللهك كندینی سونلره حاضرلادیغی شیلری١٠ الله كندی روحی واسطه‌سیله بزه كشف ایلدی زیرا روح هر شیئی اللهك درین شیلرینی بیله تفتیش ایدر١١ چونكه انسانك امورینی انسانده اولان كندی روحندن غیری قنغی ادم بیلور كذلك اللهك امورینی اللهك روحندن ماعدا هیچ كیمسه بیلمز١٢ بز ایسه دنیانك روحنه دكل آنجق اللهدن اولان روحه مالك اولدق تا كه الله طرفندن بزه احسان اولنان شیلری بیله‌لم١٣ بو شیلری دخی روحانی شیلری روحانی شیلر ایله مقایسه ایده‌رك انسانی حكمتك تعلیم ایتدیكی سوزلرله دكل آنجق روح القدسك تعلیم ایتدیكی سوزلرله سویله‌رز١٤ لكن طبیعی انسان اللهك روحنك شیلرینی قبول ایتمز زیرا بونلرك تمییزی روحانی اولدیغندن كندینه سفاهتدرلر و ادراكنه اقتداری یوقدر١٥ اما روحانی كیمسه هر شیئی تمییز ایدر ایسه‌ده كندیسی هیچ بری طرفندن تمییز اولنماز١٦ زیرا ربك فكرینی كیم بیلدی كه اڭا تعلیم ایده اما بز مسیحك فكرینه مالك ایز