١٣
١ هر كس امری آلتنده بولندیغی حكومتلره اطاعت ایتسون زیرا الله طرفندن اولمایان بر حكومت یوقدر و موجود [حكومت]لر الله طرفندن ترتیب اولنمشدر٢ بونڭ ایچون حكومته مخالفت ایدن اللهك ترتیبنه مقاومت ایتمش اولور و مقاومت ایدنلر كندی علیهلرینه حكم دعوت ایده‌جكلر٣ زیرا حكمدارلر ایو عمللر ایچون دكل آنجق كوتو عمللر ایچون قورقو درلر. حكومتدن قورقمامق استرمیسین. ایو اولانی ایشله و انك طرفندن مدح اولنه‌جقسین٤ چونكه سنڭ ایولكك ایچون الله طرفندن مأمور در لكن اگر كوتو اولانی ایشلر ایسه‌ك قورق چونكه قلیجی بیهوده یره طاشیمایور زیرا الله طرفندن مأمور اولوب كوتولك ایشلیان اوزرینه غضب اجراسی ایچون انتقام الیجیدر٥ بو اجلدن یالڭز غضب سببیله دكل آنجق ضمیر سببیله دخی تابع اولمق لازمدر٦ بو سببدن ویر كو دخی ویررسڭز زیرا همان بو شیئه مقید اوله‌رق الله طرفندن مأموردرلر٧ ایمدی جمله‌یه حقلرینی یعنی ویركو حقی اولانه ویركو كمرك حقی اولانه كمرك قورقو حقی اولانه قورقو حرمت حقّی اولانه حرمت ادا ایلیڭز٨ یكدیكر كزی سومكدن ماعدا كیمسه‌یه بر وجهله بورجلو اولمایڭز زیرا دیكرینی سون كیمسه شریعتی اتمام ایتمش اولور٩ زیرا زنا ایتمیه‌سین. قتل ایتمیه‌سین. سرقت ایتمیه‌سین. یالان شهادت ایتمیه‌سین. طمع ایتمیه‌سین و دها نه امر وار ایسه جمله‌سنی بو یعنی قوكشوكی كندك كبی سوه‌سین كلامی شاملدر١٠ محبت قو كشویه كملك ایتمز ایمدی محبت شریعتك تمامیتیدر.١١ و وقتی بیله‌رك یعنی شمدی بزم اویقودن اویانمامزك ساعتی اولدیغنی بیله‌رك بونی ایدیڭز زیرا خلاص بزه شمدی ایناندیغمز وقتده اولدیغندن یاقیندر١٢ كیجه كچدی كوندوز یاقلاشدی ایمدی ظلمت عمللرینی بر طرف ایدوب نور سلاحلرینی قوشانه‌لم١٣ كوندوزین كزر كبی حسن حركتله كزه‌لم مسخره لق و سرخوشلقده و فحشیات و فسق و فجورده و دخی نزاع و حسدده اولمایوب١٤ آنجق رب عیسی المسیحی كیڭز و شهوات ایچون جسدك قیدنده اولمایڭز