٥
١ ایمدی بز ایمانله تبریر اولنمش اولمغله ربمز عیسی المسیحك واسطه‌سیله اللهك عندنده سلامته مالك ایز٢ انك واسطه‌سیله دخی ایمانله عنایته نائل اولدق كه انده ثابت اولمش اوله‌رق اللهك جلالنك امیدیله افتخار ایدرز٣ و یالڭز بو دكل آنجق مشقتلرده دخی افتخار ایدرز زیرا بیلورز كه مشقتدن صبر٤ و صبردن تجربه و تجربه‌‌دن دخی امید حاصل اولور٥ امید ایسه اوتاندرماز زیرا بزه ویریلان روح القدس واسطه‌سیله اللهك محبتی قلبلرمزه دوكلمشدر٦ چونكه بز دها ضعیف حالده ایكن مسیح فاسقلر ایچون وقتنده فدای جان ایتدی٧ زیرا صالح كیمسه ایچون فدای جان ایدن نادر بولنور لكن كریم بر ادم ایچون بلكه بر كیمسه فدای جان ایتمكه جسارت ایدر.٨ اما بز دها كناهكار ایكن مسیحك بزم ایچون فدای جان ایتمسیله الله بزه اولان كندی محبتنی اظهار ایدر٩ ایمدی انك قانیله شمدی تبریر اولندیغمز تقدیرده نه قدر زیاده انك واسطه‌سیله غضبدن خلاص بوله‌جغز١٠ زیرا اگر دشمن ایكن اوغلنك اولومی واسطه‌سیله الله ایله صلح اولدق ایسه صلح اولدقدن صكره نه قدر زیاده انك حیاتیله خلاص بوله‌جغز١١ و یالڭز بو دكل فقط شمدی صلح اولمامزه سبب اولان ربمز عیسی المسیحك واسطه‌سیله الله ایله افتخار ایدرز.١٢ ایمدی نصل كه بر ادمك واسطه‌سیله دنیایه كناه و كناهك واسطه‌سیله اولوم گیردی ایسه بو وجهله دخی جمله‌سی كناه ایشلدكلرندن اولوم جمله انسانلره كچدی١٣ زیرا شریعته‌دك دنیاده كناه وار ایدی فقط شریعت یوغیكن كناه عد اولنماز١٤ و لكن اول كله‌جك ذاتك نمونه‌سی اولان ادمك تجاوزینه بكزر كناه ایشلمیانلر اوزرینه دخی ادمدن موسایه وارنجه‌یه‌دك اولوم سلطنت ایتدی١٥ لكن خطا نصل ایسه موهبه بویله دكلدر زیرا اگر برینك خطاسیله چوقلر اولدیلر ایسه دها زیاده اللهك عنایتی و بر ادمك یعنی عیسی المسیحك عنایتیله اولان عطیه چوقلر أوزرینه زیاده‌لشدی.١٦ و عطیه كناه ایدن بر فردك سببیله اولان واقعه‌یه بكزه‌مز زیرا حكم بر خطادن محكومیت ایچون اولدی اما موهبه چوق خطالردن تبریر ایچون اولدی١٧ زیرا اگر برینك خطاسندن ناشی اولوم برینك سببیله سلطنت ایتدی ایسه نه قدر زیاده عنایت و صلاح عطیه‌سنك فیضنی آلانلر برینك یعنی عیسی المسیحك واسطه‌سیله حیاتده سلطنت ایده‌جكلر١٨ ایمدی بو تقدیرده برینك خطاسی سببیله جمله ادملره نصل حكم تعلق ایتدی ایسه بویله‌جه برینك صلاحی واسطه‌سیله دخی جمله ادملره تبریر حیات تعلق ایتدی١٩ زیرا بر ادمك اطاعتسزلغی سببیله چوقلر كناهكار اولدیغی كبی برینك اطاعتیله دخی چوقلر صالح اوله‌جقلردر٢٠ و خطانك آرتمسی ایچون شریعت ارایه گیردی لكن كناهك آرتدیغی یرده عنایت زیاده‌سیله آرتدی٢١ تا كه گناه اولومله سلطنت ایتدیكی مثللو عنایت دخی ربمز عیسی المسیح واسطه اوله‌رق صلاحله ابدی حیات ایچون سلطنت ایده.