٦
١ ایمدی نه دیه‌لم. عنایتك آرتمسی ایچون كناهده دوام ایده‌لم‌می.٢ حاشا بز كناهه نسبتله اولمش بولندیغمز حالده آرتق انده نصل یاشایه‌بیلورز٣ بزدن عیسی المسیحه وافتیز اولنانلرك انك اولومنه وافتیز اولندقلرینی بیلمزمیسڭز٤ ایمدی اولومه اولان وافتیزك واسطه‌سیله انك ایله برابر دفن اولندق تا كه مسیح پدرك جلالیله اولولردن احیا اولندیغی كبی كذلك بز دخی یكی حیاتده یورویه‌لم٥ زیرا اگر اولومنك مشابهتنده كندیسی ایله یك وجود اولدق ایسه قیامتی مشابهتنده دخی اوله‌جغز٦ زیرا آرتق كناهه قوللق ایتمه‌مك اوزره كناه جسدی ابطال اولنمسی ایچون بزم اسكی ادممز انك ایله برابر صلب اولندیغنی بیلورز٧ چونكه كناهه اولمش اولان ادم كناهدن تبریه اولنمش اولور٨ و اگر مسیح ایله برابر اولدك ایسه انك ایله برابر یاشایه جغمزه دخی اینانورز٩ چونكه مسیح اولولردن احیا اولندقدن صكره تكرار اولمیه‌جنكی و آرتق اولوم اڭا مسلط اولمایه جغنی بیلورز.١٠ زیرا انك اولمسی بر كره كناه ایچون اولمك اولوب یاشامسی دخی الله ایچون یاشامقدر١١ كذلك سز دخی كندیلركزی كناهه اولو اما ربمز عیسی المسیحده اللهه دیری عد ایلیڭز١٢ ایمدی فانی جسدلركزده شهوتلرنجه اڭا اطاعت ایتمڭز ایچون كناه سلطنت ایتمسون١٣ اعضاكزی دخی حقسزلغك آلتلری اوله‌رق كناهه تسلیم ایتمیڭز اما كندیلركزی اولولردن حیات بولانلركبی اللهه و اعضاكزی صلاح آلتلری اوله‌رق اللهه تسلیم ایدڭز١٤ زیرا شریعت تحتنده اولمایوب عنایت تحتنده بولندیغكزدن كناه اوزركزه مسلط اولمایه جقدر.١٥ ایمدی نه دیه‌لم شریعت تحتنده اولمایوب عنایت تحتنده بولندیغمز ایچون كناه ایشلیه‌لم‌می. حاشا١٦ بیلمز میسڭز كه كندیكزی اطاعت ایچون هر كیمه قول اولمق اوزره تسلیم ایدر ایسه ڭز اطاعت ایتدیكڭز كیمسه‌یه یا اولومی موجب اولان كناهه و یاخود صلاحی موجب اولان اطاعته قول‌سڭز١٧ اما اللهه شكر اولسون كه كناهك قوللری ایدیڭز ایسه‌ده سزه تسلیم اولنان تعلیمك صورتنه قلبدن اطاعت ایلدیڭز١٨ و كناهدن آزاد اولدقدنصكره صلاحه قول اولدیڭز.١٩ تنكزك ضعیفلكی سببندن انسانجه سویله‌یورم. زیرا اعضاكزی عصیان ایچون ناپاكلك و عصیانه قول اولمق اوزره تسلیم ایتمش اولدیغڭز وجهله شمدی دخی اعضاكزی قدسیت ایچون صلاحه قول اولمق اوزره تسلیم ایدڭز٢٠ زیرا كناهك قوللری بولندیغڭز زمان صلاحدن آزاد ایدیڭز٢١ اما شمدی اوتاندیغڭز شیلردن او زمان نه ثمره كوردیڭز زیرا انلرك نتیجه‌سی اولومدر٢٢ لكن شمدی كناهدن آزاد اولوب اللهه قول اولدیغڭز حالده ثمره‌ڭز وار یعنی قدسیت و نتیجه‌سی دخی ابدی حیاتدر٢٣ زیرا كناهك ویردیكی اجرت اولومدر اما اللهك موهبه‌سی ربمز عیسی المسیح واسطه‌سیله ابدی حیاتدر.