٤
١ ایمدی پدرمز ابراهیم جسد جهتیله نه بولدی دیه‌لم٢ زیرا اگر ابراهیم عمللرله تبریر اولندی ایسه فخری اولور لكن اللهك عندنده دكلدر٣ زیرا كتاب نه بیورر. و ابراهیم اللهه ایمان ایتدی و بو اڭا صلاح عد اولندی٤ اما ایشلیانه اجرت عنایت طریقیله دكل انجق بورج طریقیله صایلور٥ لكن ایشلمیوب فقط فاسقی تبریر ایدنه ایمان ایدنك ایمانی كندیسنه صلاح عد اولنور٦ نته كیم داود دخی اللهك عملسز صالح عد ایلدیكی ادمك مباركلكنی ذكر ایده‌رك٧ نه مباركدر شول ادملركه عصیانلری عفو و كناهلری ستر اولنمشدر٨ نه مباركدر شول ادم كه رب اڭا كناه صایماز دیدی٩ ایمدی بو مباركلك ختان اوزرینه‌می و یاخود كذلك ختانسزلق اوزرینه‌می اولور. زیرا ابراهیمه ایمان صلاح عد اولندی دیرز١٠ اویله ایسه نه وجهله عد اولندی ختانلومی یوقسه ختانسز اولدیغی حالده‌می. ختانلو دكل فقط ختانسز اولدیغی حالده عد اولندی١١ و ختانسز اولدیغی حالده اولان ایماننك صلاحی مهری اولمق اوزره ختان اشارتنی آلدی تا كه انلره كذلك صلاح عد اولنمق اوزره ختانسز اولوبده ایمان ایدنلرك جمله‌سنك پدری اوله١٢ و یالڭز ختانلو اولانلره دكل آنجق پدرمز ابراهیمك ختانسز اولدیغی حالده اولان ایماننك ایزلرنده یوریانلره دخی ختان پیری اوله١٣ زیرا ابراهیمه یاخود نسلنه دنیانك وارثی اولمقلق وعدی شریعت واسطه‌سیله دكل آنجق ایمان صلاحی واسطه‌سیله ویرلدی١٤ زیرا اگر اهل شریعت اولانلر وارثلر ایسه ایمان فائده‌سز و وعد لغو اولمش اولور١٥ زیرا شریعت غضب حصوله كتورر چونكه شریعت بولنمادیغی یرده تجاوز دخی یوقدر١٦ بوكا بناءً لطفله اولمق اوزره ایماندندر كه وعد بتون نسله یالڭز شریعتدن اولانلره دكل آنجق ابراهیمك ایمانندن اولانلرده دخی ثابت اوله١٧ و سنی چوق طائفه‌لره پدر تعیین ایلدم دیو یازلدیغی اوزره او كندینك ایمان ایتدیكی یعنی اولولری احیا ایدن و موجود اولمایان شیلری موجود كبی چاغران اللهك حضورنده جمله‌مزك پدریدر١٨ او دخی سنڭ نسلك بویله اوله‌جقدر دیو بیوریلان كلامه كوره چوق ملتلرك پدری اوله‌جغنه امیدك خلافنده امیدله ایمان ایلدی١٩ و ایمانده ضعیفلنمیوب تقریباً یوز یاشنده ایكن كندی جسدینك آرتق اولو كبی بولندیغنه ساره‌نك دخی رحمنك اولوكبی اولدیغنه دقت ایتمدی٢٠ و اعتقاد سزلقله اللهك وعدینه شبهه ایتمیوب خصوصا اللهه حمد ایده‌رك ایمانده قوتلنوب٢١ وعد ایتدیكنك اجراسنه دخی قادر ایدیكنی صحیحاً بیلدی٢٢ بو اجلدن اڭا صلاح عد اولندی.٢٣ و اڭا عد اولندیغی یالڭز انك ایچون یازلمادی٢٤ لكن بزم ایچون دخی یعنی ربمز عیسایی اولولردن احیا ایدنه ایمان ایدنلر ایچون عد اولنه‌جقدر٢٥ او دخی خطالرمز ایچون اله ویریلوب بزم تبریرمز ایچون احیا اولندی.