٣
١ ایمدی یهودینك فضیلتی نه در یاخود ختانك فائده‌‌سی نه در.٢ هر وجهله چوقدر خصوصا كه اللهك كلاملری انلره امانت اولندی.٣ زیرا اگر بعضلری ایمان ایتمدیلر ایسه‌نه اولور. انلرك ایمان ایتمه‌ملری اللهك صداقتنی ابطال‌می ایده‌جكدر٤ حاشا لكن الله حق اولوب هر ادم یالانجی اولسون نته كیم سوزلركده عادل و محاكمه كده غالب اوله‌سین دیو یازلمشدر ٥ و لكن اگر بزم حقسزلغمز اللهك عدالتنی اظهار ایدر ایسه نه دیه‌لم. جزا ویرن الله حقسزمیدر (انسانجه سویله‌یورم)٦ حاشا بویله اولسه الله دنیایه نصل حكم ایده‌جكدر.٧ زیرا اگر اللهك حقیقتی بنم یالانم واسطه‌سیله كندی عزتی ایچون زیاده‌لشدی ایسه آرتق بن نیچون كناهكار كبی حكم اولنیورم.٨ و شر ایشلیه‌لم كه خیركله نیچون دیمیه‌لم نصل كه بویله دیمش ایز دیو بعضلر طرفندن ذم اولنیورز. بونلرك حكمی حقدر.٩ ایمدی نه دیه‌لم فضیلتمز وارمی. اصلا یوقدر زیرا هم یهودیلری همده یونانیلری جمله‌سی كناه التنده‌در دیو بالاده تهمتلو چیقاردق.١٠ نته كیم بر صالح یوق بر بیله یوقدر١١ فهم ایدن یوق اللهی ارایان یوقدر١٢ جمله‌سی ضلالته دوشوب هپ فاسد اولدیلر خیر ایشلیان یوقدر بر كشی بیله یوقدر١٣ بوغازلری آچیق قبردر. دیللریله حیله ایدوب دوداقلری التنده صاغر ییلانلر زهری واردر١٤ آغزلری لعنت و مرارتله طولودر١٥ ایاقلری قان دوكمكه چابكدر.١٦ طریقلرنده خرابیت و مشقت بولنوب١٧ سلامت طریقنی بیلمدیلر١٨ كوزلری اوكنده الله قورقوسی یوقدر دیو یازلمشدر.١٩ لكن بیلورز كه شریعت هر بیوردیغنی شریعت تحتنده بولنانلره بیورر تا كه هر آغز قپانوب بتون دنیا اللهك حضورنده صوچلو اوله٢٠ زیرا انك حضورنده شریعت عمللری واسطه‌سیله هیچ بر بشر تبریر اولنماز چونكه شریعت واسطه‌سیله كناهی بیلمك اولور.٢١ لكن شمدی شریعتدن و پیغمبرلردن شهادت اولنه‌رق٢٢ اللهك تبریری یعنی عیسی المسیحه اولان ایمان واسطه‌سیله اللهك تبریری ایمان ایدنلرك جمله‌سی ایچون [و جمله‌سی أوزرینه] شریعتسز اظهار اولندی چونكه فرق یوقدر٢٣ زیرا جمله‌سی كناه ایشلیوب ایشلیوب اللهك عزتندن محروم قالملریله٢٤ عیسی المسیحده اولان فدیه واسطه‌سیله انك لطفندن مجاناً تبریر اولنورلر٢٥ كه اللهك تحملی وقتنده سابقا ایشلنلمش كناهلردن صرف نظر ایتمسیله كندی عدالتنی بیان ایچون٢٦ یعنی شمدیكی زمانده كندی عدالتنی بیان ایچون الله انی قاننه اولان ایمان واسطه‌سیله كفارت دیو اظهار ایلدی كه كندیسی عادل اولوب عیسایه ایمان ایدنی تبریر ایده٢٧ ایمدی افتخار نره‌ده‌در. ابطال اولندی. قنغی قاعده واسطه‌سیله. عمللر قاعده‌سی واسطه‌سیله‌می خیر آنجق ایمان قاعده‌سی واسطه‌سیله٢٨ ایمدی قرار قیلارز كه ادم شریعت عمللری اولمقسزین ایمان واسطه‌سیله تبریر اولنور٢٩ و یاخود الله یالڭز یهودیلرك اللهی می و طائفه‌لرك دخی دكلمیدر. بلی كذلك طائفه‌لركدر٣٠ چونكه ختانی ایمانله و ختانسزلغی ایمان واسطه‌سیله تبریر ایدن الله بردر٣١ ایمدی ایمان واسطه‌سیله شریعتی ابطال‌می ایدرز حاشا آنجق شریعتی ثابت قیلارز.