٢
١ بوكا بناءً ای حكم ایدن ادم هر كیم ایسه‌ك معذور اوله‌مازسین چونكه غیری‌یه حكم ایتدیكك شیده كندی علیهكه حكم ایتمش اولورسین زیرا سن كه حكم ایدیورسین همان اول شیلری ایشلرسین.٢ اما بو كبی شیلری ایشلیانلر علیهنه اللهك حكمی حقیقت اوزره اولدیغنی بیلورز٣ ای بو كبی شیلری ایشلیانلر علیهنده حكم ایدوبده همان او شیلری ایشلیان ادم ظن ایدرمیسین كه سن اللهك حكمندن قورتیله‌جقسین٤ و یاخود اللهك لطفی سڭا موجب توبه اولدیغنی بیلمیه‌رك انك حدسز لطف و صبر و تحملنی تحقیرمی ایدرسین٥ * و لكن سنڭ عنادك و توبه ایتمز قلبكله غضبك و اللهك عدالتو حكمی ظهورینك گونی ایچون كندیكه غضب بر كدیررسین٦ زیرا او هر كسه عمللرینه كوره مجازات ایده‌جك٧ یعنی ایو عمللرده صبر و دوامله مجد و عزت و اولمه‌مزلكی طلب ایدنلره ابدی حیات ویره‌جك٨ اما منازعه ایدوب حقیقته اطاعت ایتمیه‌رك حقسزلغه مطیع اولانلره خشم و غضب اوله‌جقدر٩ شرّ ایشلیان هر بر ادمه اوّلا یهودی‌یه و دخی یونانی‌یه مشقت و مضایقه١٠ اما خیر ایشلیان هر كیمسه‌یه اوّلا یهودی‌یه و دخی یونانی‌یه مجد و عزت و سلامت اوله‌جقدر١١ چونكه اللهك عندنده خاطره رعایت ایتمك یوقدر١٢ زیرا شریعتسز كناه ایشلیانلر شریعتسز دخی هلاك اوله‌جقلر. و شریعت تحتنده كناه ایشلیانلر١٣ اللهك عیسی المسیح واسطه‌سیله بشارتمه كوره ادملرك سرّلرینه حكم ایده‌جكی كونده شریعت واسطه‌سیله حكم اولنه جقلر١٤ زیرا شریعتی ایشیدنلر اللهك عندنده صالح دكللر انجق شریعتی اجرا ایدنلر تبریر اولنه جقلر١٥ چونكه شریعتی اولمایان طائفه‌لر طبیعتله شریعت موجبنجه عمل ایتدكلری تقدیرده انلرك شریعتی اولمامغله كندیلری كندیلرینه شریعه اوله‌رق١٦ ضمیرلرینك شهادتیله و افكارلرینك كاه تعزیریله كاه عذر دیله‌مسیله شریعتك اثرینی كندی قلبلرنده یازیلی كوستررلر.١٧ اشته سن یهودی تسمیه اولنوب شریعته كوكنه‌رك الله ایله افتخار ایدرسین١٨ و شریعتله تعلیم اولندیغكدن ارادتنی دخی بیلوب مختلف شیلری فرق و تمیز ایدرسین١٩ و كورلرك قلاغوزی و قراكلقده اولانلرك نوری٢٠ جاهللرك معلمی و چوجوقلرك خواجه‌سی بن ایم و شریعتده اولان علم و حقیقتك صورتی بنده‌در اعتقادنده‌سین.٢١ ایمدی ای غیری‌یه تعلیم ایدن كندیكه تعلیم ایتمزمیسین. ای سرقت ایتمه‌مكی وعظ ایدن سرقت ایدرمیسین٢٢ ای زنا ایتمه دیان كندك زنا ایدرمیسین. ای بتلردن نفرت ایدن مقدّس شیلره نقض حرمت ایدرمیسین٢٣ ای شریعتله افتخار ایدن سن شریعتی تجاوز ایتمكله اللهی تحقیرمی ایدرسین٢٤ زیرا یازلدیغی اوزره سزڭ سببكزدن طائفه‌لر اراسنده اللهك اسمنه كفر اولنور.٢٥ ایمدی اگر شریعته كوره عمل ایدر ایسه‌ك ختان فائده ایدر اما اگر شریعتی تجاوز ایدر ایسه‌ك ختانك ختانسزلق اولمش اولور.٢٦ ایمدی اگر ختانسز ادم شریعتك احكامنی حفظ ایدر ایسه انك ختانسزلغی ختان‌عد اولنمازمی٢٧ و طبیعی اولان ختانسزلق شریعتی اجرا ایدوبده سن كتاب و ختانك وار ایكن شریعتی تجاوز ایدر ایسه‌ك سنی حكم ایتمزمی٢٨ زیرا ظاهراً یهودی اولان یهودی دكلدر و ظاهراً جسدده اولان ختان ختان دكلدر٢٩ انجق یهودی باطناً اولاندر و ختان دخی رسماً اولمایوب روحله اولان قلب ختانیدر و انك مدحی انساندن دكل انجق اللهدندر.