٢٢
١ ای برادرلر و پدرلر شمدی سزه ویره‌جكم جوابی دیكله‌یڭز.٢ انلر كندیلره عبرانیجه نطق ایراد ایتدیكنی ایشیتدكلرنده دها زیاده سكوت ایتدیلر٣ او دخی دیدیكه بن قیلیقیه‌ده واقع طرسوسده طوغمش و فقط بو شهرده غمالیئلك ایاقلرنده پرورده اولمش یهودی برادم ایم و اجدادك شریعتنده دقتله تربیه اولنوب جمله كزك بوكون اولدیغی مثللو الله ایچون غیرتلو ایدم٤ و ارككلر ایله قاریلری باغلایوب حبسلره تسلیم ایده‌رك بو طریقه اولوم درجه‌سنه قدر تعدّی ایلدم٥ نصل كه كاهن اعظم ایله اختیارلرك بتون هیئتی حقمده شهادت ایدرلر چونكه انلردن برادرلره مكتوبلر دخی آلوب دمشقده بولنانلری دخی تكدیر اولنملری ایچون باغلو اوله‌رق اورشلیمه كتورمك اوزره اولطرفه كیدیور ایدم٦ و بن یولده كیدر ایكن دمشقه یاقلاشدیغمده اوكله وقتنده آنسزین اطرافمه سمادن عظیم بر نور پارلادی٧ و یره دوشدم و بڭا ای ساول ساول بڭا نیچون تعدّی ایدیورسین دیان بر صدا ایشیتدم٨ بن دخی جواباً افندی سن كیم سین دیدم او دخی بڭا بن سنڭ تعدّی ایلدیلك ناصرتلو عیسی ایم دیدی٩ اما بنم ایله برابر اولانلر نوری كوردیلر ایسه‌ده بڭا سویلیانك صداسنی ایشیتمدیلر١٠ بن دخی یا رب نه یاپه‌یم دیدم رب دخی بڭا قالق دمشقه گیت و اوراده یاپمه‌ك ایچون تعیین اولنان شیلرك جمله‌سی سڭا سویلنیله‌جكدر دیدی١١ و اول نورك ضیاسی سببیله كوره‌مز اولدیغمدن بنم ایله برابر اولانلر المدن طوته‌رق دمشقه كیردم١٢ و اوراده ساكن اولان جمله یهودیلردن حسن شهادته نائل اولمش و شریعت اوزره اهل تقوی حنانیا نامنده بر ادم١٣ گلوب یانمده طوره‌رق بڭا ساول برادر كوزلرك كورسون دیدی و بن اول ساعتده اڭا باقدم١٤ او دخی اجدادمزك اللهی كندی ارادتنی بیلمك و اول صالحی كورمك و انك آغزندن سس ایشیتمك ایچون سنی انتخاب ایلدی١٥ زیرا كوروب ایشیتدیكك شیلر حقنده جمله ادملره انك شاهدی اوله‌جقسین١٦ و شمدی نیچون تأخر ایدیورسین قالق وافتیز اول و ربك اسمنه دعا ایده‌رك كناهلركدن ییقان دیدی١٧ و بن اورشلیمه عودت ایدوب هیكلده دعا ایدر ایكن حال وجدده بولنوب انی كوردم١٨ او دخی بڭا چابك اول و عجلةً اورشلیمدن چیق زیرا بنم حقمده شهادتكی قبول ایتمیه‌جكلر دیدی١٩ بن دخی یا رب بن سڭا ایمان ایدنلری حبس ایدوب سیناغوغلرده دوكمكده اولدیغمی٢٠ و سنڭ شهیدك استیفانوسك قانی دوكیلور ایكن اوراده حاضر بولنوب انك قتلنه رضا ویردیكمی و انی اولدرانلرك لباسلرینی بكله‌مكده اولدیغمی كندیلری ایو بیلورلر دیدم ایسه‌ده٢١ بڭا جواباً گیت زیرا بن سنی اوزاق محله طائفه‌لره ارسال ایده‌جكم دیدی.٢٢ و بو سوزه قدر انی دیكله‌یوب یوكسك سسله بو مثللو ادمی یر یوزندن قالدر زیرا یاشامسی جائز دكلدر دیدیلر٢٣ ایمدی انلر باغرشه‌رق لباسلرینی آتوب هوایه توز صاچدقلری صره‌ده٢٤ بیك باشی نه سببدن طولایی علیهنه بویله باغرشدقلرینی اكلامق ایچون قامچی ایله استنطاق اولنسون دیه‌رك قلعه‌نك ایچنه كوتورلمسنی امر ایلدی٢٥ و انی قایشلرله كروب باغلادقلرنده پولس اوراده طوران یوز باشی‌یه رومالو و غیر محكوم بر ادمی دوكمك سزه جائزمیدر دیدی٢٦ یوز باشی دخی بونی ایشیتدكده گیدوب نه ایده‌جككه [دقت ایله] زیرا بو ادم رومالودر دیو بیك باشی‌یه خبر ویردی.٢٧ بیك باشی دخی پولسك یاننه گلوب اكاسن رومالومیسین بڭا سویله دیدكده اوت دیدی٢٨ و بیك باشی جواباً بن بو حمایت امتیازینی بر چوق آقچه ایله ایدندم دیدی. فقط پولس بن همان او حالده طوغدم دیدی٢٩ بونڭ اوزرینه انی استنطاق ایده‌جك اولان كیمسه‌لر درعقب انك یانندن چكلدیلر و بیك باشی انك رومالو اولدیغنه اكاه اولدیغنده انی باغلادیغی ایچون قورقدی.٣٠ و ایرتسی كون یهودیلر طرفندن نه ایچون اتهام اولندیغنك حقیقتنی بیلمك استمكله انی [باغلرندن] چوزوب باش كاهنلر ایله بتون ملت مجلسنك كلمسنی امر ایده‌رك پولسی ایندروب حضورلرینه كتوردی.