٢٣
١ و پولس ملت مجلسنه دقتله نظر ایدوب ای برادرلر بن بو كونه دكین اللهك حضورنده كلیاً خالص ضمیرله حركت ایلدم دیدی.٢ كاهن اعظم حنانیا دخی انك یاننده طورانلره آغزینه اورملرینی امر ایتدی٣ او زمان پولس اڭا ای بادانه‌لو دیوار سنی الله اوره‌جقدر. سن شریعت موجبنجه نبی محاكمه ایتمكه اوتورر ایكن خلاف شرع اوله‌رق بڭا اورملرینی‌می امر ایدیورسین دیدی.٤ و یاننده طورانلر اللهك كاهن اعظمنه‌می شتم ایدرسین دیملریله٥ پولس ای برادرلر انك كاهن اعظم ایدیكنی بیلمیور ایدم زیرا قومكك رئیسنه كوتو سویله‌میه‌سین دیو یازلمشدر دیدی٦ و پولس انلرك بر قسمی صادوقیلر و دیكری فریسیلر اولدیغنی بیلمكله مجلسده ای برادرلر بن فریسی اوغلی فریسی ایم. اولولرك قیامی امیدندنطولایی محاكمه اولنیورم دیو ندا ایتدی٧ و بونی سویله‌دیكنده فریسیلر ایله صادوقیلر اراسنده منازعه ظهور ایدوب جمهور ایكی فرقه اولدی.٨ زیرا صادوقیلر قیامت و ملك و روح یوقدر دیرلر فقط فریسیلر ایكیسینیده اقرار ایدرلر٩ و بیوك كورلتی وقوع بولدی و فریسیلر طرفنك علماسی قالقوب بو ادمده بر كوتولك بولمایورز اما اگر اڭا بر روح یا بر ملك سویله‌دی ایسه [اللهه قارشو جنك ایتمیه‌لم] دیه‌رك منازعه ایدرلر ایدی١٠ و چوق ولوله وقوعنده پولس انلر طرفندن پاره‌لنور دیو بیك باشی خوف ایتمسیله اینوب انلرك ایچلرندن انی قاپوب قلعه‌یه كتورملرینی عسكره امر ایتدی.١١ و ایرتسی كیجه رب انك یاننده طوروب ای پولس جسور اول زیرا اورشلیمده بنم حقمده شهادت ایتدیكك كبی روماده دخی اویله شهادت ایتملیسین دیدی١٢ و كوندوز اولدقده یهودیلردن بعضیسی اتفاق ایده‌رك پولسی اولدرمینجه برشی ییوب ایچمیه‌جڭز دیو كندیلرینی لعنت التنه قودیلر١٣ و بو یمینله اتفاق ایدنلر قرق كشیدن زیاده ایدی١٤ و بونلر باش كاهنلرك و اختیارلرك یاننه گیدوب پولسی اولدرمینجه هیچ بر شی طاتمایه جغز دیو كندی كندمزی عظیم لعنت التنه قودق١٥ و شمدی سز ملت مجلسی ایله برابر انك حقنده اولان شیلری زیاده دقتله تفتیش ایتمك بهانه‌سیله یارین یانكزه اشاغی كتورسون دیو بیك باشی‌یه خبر ویرڭز بز دخی او واصل اولمازدن اوّل انی اولدرمكه حاضر ایز دیدیلر١٦ اما پولسك همشیره زاده‌سی بو حیله‌یی ایشیتمكله واروب قلعه‌یه كیره‌رك پولسه خبر ویردی١٧ پولس دخی یوز باشیلرك برینی یاننه چاغروب بو جوانی بیك باشی‌یه كوتور زیرا اڭا بر افاده‌سی واردر دیدی١٨ او دخی انی آلوب بیك باشی‌یه كوتوره‌رك محبوس پولس نبی چاغروب بو جوانك سڭا افاده‌سی اولدیغی ایچون یانكه كتورممی رجا ایلدی دیدی.١٩ بیك باشی دخی انی الندن طوتوب تنها بر محله چكلدی و بڭا ویره‌جكك خبر نه‌در دیو سؤال ایلدی٢٠ او دخی یهودیلر پولسك حقّنده دها دقتله بر شی تفتیش ایتمك بهانه‌سیله انی یارین ملت مجلسنه ایندره‌سین دیو سڭا رجا ایتمكه اتفاق ایتدیلر٢١ اما سن انلره راضی اولمایه‌سین زیرا بونلردن انی اولدرمینجه ییوب ایچمه‌مكه كندیلرینی لعنت التنه قومش قرقدن زیاده ادم انی پوصوده بكلیورلر و شمدی حاضر بولنه‌رق سنڭ امركه منتظردرلر دیدی٢٢ ایمدی بیك باشی اول جوانه بو شیلری بڭا بیان ایتدیككی كیمسه‌یه سویله‌مه دیو تنبیه ایتدكدنصكره انی صالیویردی.٢٣ و یوز باشیلردن ایكی كشی چاغروب كیجه ساعت اوچده قیصریه‌یه كیتمك اوزره ایكی یوز پیاده و یتمش سواری و ایكی یوزمزراقلو حاضرلایڭز٢٤ و پولسی بیندروب سلامتله والی فلیكسه كوتورملری ایچون حیوانلر دخی تدارك ایدڭز دیدی٢٥ و بر وجه آتی بر مكتوب یازدی٢٦ قلاودیوس لیسیاس دولتلو والی فلیكسه سلام ایدر٢٧ بو ادم یهودیلر طرفندن طوتیلوب اولدرملك اوزره ایكن رومالو اولدیغنی اوكرندیكمده عسكر ایله یتشوب انی قورتاردم.٢٨ و انك حقّنده ایتدكلری شكایتك سببنی اكلامق مقصدیله انی انلرك ملت مجلسنه ایندردیكمده٢٩ قتله یا زنجیره مستحق بر جرمی اولمایوب آنجق كندی شریعتلرینه متعلق مسئله‌لردن طولایی اندن شكایت اولندیغنی اكلادم٣٠ و [یهودیلرك] بو ادمه حیله ترتیب ایده‌جكلری بڭا بیان اولنمغله انی درحال سڭا كوندردم و دعوا حیلره دخی انك علیهنده اولان شیلری سنڭ حضوركده افاده ایتملرینی امر ایتدم. عافیتده اولڭز.٣١ اولوقت عسكرلر كندیلره امر اولندیغی وجه اوزره پولسی آلوب كیجه‌لین انتپاتریسه كوتورد كدنصكره٣٢ ایرتسی كون انك ایله برابر كیتمك ایچون سواریلری براغوب قلعه‌یه عودت ایتدیلر٣٣ بونلردخی قیصریه‌یه واصل اولوب مكتوبی والی‌یه تسلیمله پولسی دخی اڭا تقدیم ایتدیلر٣٤ والی دخی مكتوبی اوقویوب قنغی ایالتدن اولدیغنی سؤال ایتدی و قیلیقیه‌دن اولدیغنی اكلامغله٣٥ دعوا جیلرك دخی كلدكده سنی دیكلرم دیوب هیرودسك سراینده حفظ اولتمسنی امر ایتدی.