٨
١ و اولوقت اورشلیمده اولان كلیسا علیهنده عظیم تعدّی وقوع بولمغله رسوللردن ماعدا جمله‌سی یهودیه ایله سامریه‌نك دیارلرینه طاغلدیلر٢ و بعض اهل تقوی ادملر استیفانوسی قالدروب أوزرینه بیوك ماتم ایتدیلر٣ لكن ساول خانه‌لره گیروب اركك و قاریلری سوروكلیه‌رك حبسخانه‌یه آتمقله كلیسایی خراب ایتمكده ایدی.٤ ایمدی طاغیلان كیمسه‌لر كلامی تبشیر ایده‌رك هر طرفدن كچرلر ایدی٥ فیلبس دخی سامریه شهرینه اینوب انلره مسیحی وعظ ایدر ایدی٦ و خلق فیلبسك سوزلرینی ایشیدوب اجرا ایلدیكی علامتلری كورملریله بالاتفاق انڭ سویله‌دیكلرینه دقت ایدرلر ایدی.٧ زیرا ناپاك روحلر یوكسك سسله باغره‌رق ضبط ایتدكلری چوق كیمسه‌لردن چیقوب چوق كوتروم و طوپال كیمسه‌لر دخی شفا بولورلر ایدی٨ و اول شهرده عظیم مسرّت اولدی٩ و اوته‌دنبرو اول شهرده بن بیوك بر ذات ایم دیه‌رك سحربازلق ایدوب سامریه اهالیسنی حیران قیلمش اولان سمعون نام بر كیمسه بولنور ایدی.١٠ و بیوك كوچوك جمله‌سی بو ادم اللهك عظیم قوتیدر دیه‌رك اڭا قولاق ویررلر ایدی١١ و بوكا قولاق ویرملرینك سببی خیلی زماندنبرو سحرلرله انلری حیرتده براقماسی ایدی١٢ لكن ملكوت اللهی و عیسی المسیحك اسمنه متعلق شیلری تبشیر ایدن فیلبسه ایناندقلرنده كرك ارككلر و كرك قاریلر وافتیز اولنورلرایدی١٣ سمعون كندیسی دخی ایناندی و وافتیز اولنوب فیلبسه ملازمت ایده‌رك اجرا اولنان علامتلر ایله معجزه‌لری كورمكله حیران اولور ایدی١٤ و اورشلیمده بولنان رسوللر سامریه‌لولرك اللهك كلامنی قبول ایتدیكنی ایشیتملریله انلره بطرس ایله یوحنایی كوندردیلر١٥ انلر دخی اینوب روح القدسه نائل اوله‌لر دیو انلر ایچون دعا اپتدیلر١٦ (زیرا انلرك هیچ برینك اوزرینه نازل اولمایوب آنجق رب عیسانڭ اسمنه وافتیز اولنمشلر ایدی)١٧ او زمان اوزرلرینه اللرینی قومالریله روح القدسه نائل اولدیلر١٨ سمعون دخی رسوللرك أللرینك قونلمسیله روح القدسك ویرلدیكنی كورد كده١٩ بو قدرتی بڭا دخی ویرڭز تا كه اللرمی كیمك أوزرینه قویه‌جق اولور ایسه‌م روح القدسه نائل اوله دیه‌رك انلره آقچه تقدیم ایلدی٢٠ لكن بطرس اڭا آقچه‌ك سنڭ ایله هلاك اولسون زیرا اللهك عطیه‌سی آقچه ایله تحصیل اولنور ظن ایتدك.٢١ بو شیده سنڭ حصه‌ك یا نصیبك یوقدر زیرا قلبك اللهك عندنده طوغری دكلدر٢٢ ایمدی بو كوتیلككدن توبه ایدوب ربه نیاز ایله اوله‌كه قلبكك ملاحظه‌سی سڭا عفو اولنه٢٣ زیرا سنی اود آجیلغنده و حقسزلغك بندنده گوریورم دیدی٢٤ سمعون دخی جواباً سویله‌دیكڭز شیلرڭ بری اوزرمه كلمسون دیو بنم ایچون سز ربه نیاز ایلیڭز دیدی.٢٥ انلر دخی شهادتلرینی ایفا برله ربك كلامنی سویله‌د كدنصكره سامریه‌لولرك نیچه كویلرنده بشارتی تبشیر ایده‌رك اورشلیمه عودت ایتدیلر.٢٦ و ربك ملكی فیلبسه سویلیوب دیدیكه قالق جنوبه یعنی اورشلیمدن غزّه‌یه اینن یوله گیت اوراسی چولدر٢٧ او دخی قالقوب گیتدی و اشته حبش ملِكه‌سی كنداكه‌نك كبراسندن بری اولوب جمله خزینه‌سی اوزرینه ناظر اولان حبشلو بر خادم اورشلیمه عبادت ایتمكه گلمش ایدی٢٨ و عودتنده عربه‌سنده اوتوروب اشعیا پیغمبرك كتابنی اوقویور ایدی٢٩ و روح فیلبسه خطاباً یاقلاشوب بو عربه‌یه یاپش دیدی٣٠ فیلبس دخی یاننه سكردوب اشعیا پیغمبرلرك كتابنی اوقودیغنی ایشیتمكله اوقودیغكی اكلایورمیسین دیدی٣١ اودخی بر كیمسه بڭا دلالت ایتمدكجه نصل قادر اوله‌یم دیه‌رك فیلبسه چیقوب یاننده اوتورمسنی رجا ایتدی٣٢ و كتابده اوقودیغی فصل شو ایدی‌كه قویون كبی بوغازلنمغه كوتورلدی و قوزی قیرقان كیمسه‌نك أوكنده سكوت ایلدیكی مثللو بویله‌جه آغزینی آچماز٣٣ حال تواضعنده انڭ حقی رفع اولندی و انڭ نسلنی كیم بیان ایده‌جكدر زیرا حیاتی یردن رفع اولنور٣٤ و خادم جواب ویروب فیلبسه سڭا رجا ایدرم پیغمبر بونی كیمك حقّنده سویله‌یور كندیسی حقنده‌می یوقسه دیكر بر كیمسه حقنده‌می دیدی٣٥ فیلبس دخی آغزینی آچوب بوكلامدن باشلایه‌رق اڭا عیسایی تبشیر ایلدی٣٦ و یولده كیدرلرایكن بر صویه گلدیلر خادم دخی اشته صو. وافتیز اولنمقلغمه نه مانع وار دیدی.٣٧ [فیلبس دخی اگر بتون قلبكدن ایمان ایدرسه‌ك جائز اولور دیدی و او جواباً عیسی المسیحك ابن الله ایدیكنه ایمان ایدرم دیدی].٣٨ و عربه‌نك طورمسنی امر ایدوب فیلبس ایله خادم ایكیسی بردن صویه ایندیلر و انی وافتیز ایلدی٣٩ و صودن چیقدقلرنده ربك روحی فیلبسی آنسزین كوتوردی و خادم انی آرتق كورمدی. و سوینه‌رك كندی یولنه گیتدی٤٠ فیلبس ایسه اشدودده بولندی و طولاشه‌رق قیصریه‌یه كلنجه‌یه قدر جمله شهرلرده بشارتی تبشیر ایدر ایدی.