٧
١ او زمان كاهن اعظم بو شیلر فی الواقع بویله‌میدر دیدی.٢ او دخی دیدیكه ای برادرلر و پدرلر دیكله‌یڭز. پدرمز ابراهیم حرانده ساكن اولمازدن اوّل آرام نهرینده ایكن الله ذوالجلال اڭا كورینوب٣ دیاركدن و اقرباكك یانندن چیق وسكا كوستره‌جكم دیاره كل دیدی٤ او زمان كلدانیلرك دیارندن چیقوب حرانده ساكن اولدی اورادن دخی پدری وفات ایتدكدنصكره انی بوشمدی ساكن اولدیغڭز دیاره نقل ایلدی٥ و انده ایاق باصه‌جق قدر بیله اڭا میراث ویرمیوب اولادی اولمادیغی حالده انی كندیسنه و كندیسندن صكره ذریتنه ملك اولمق اوزره ویرمكه وعد ایلدی٦ و الله بو طرز اوزره سویله‌دی یعنی انڭ ذریتی دیار غربتده مسافر اولوب انی درت یوز سنه اسیر و اڭا جفا ایده‌جكلر٧ و الله شول اسیری اوله‌جقلری طائفه‌یی بن حكم ایده‌جكم و اندنصكره چیقوب بو محلده بڭا عبادت ایده‌جكلردر دیدی٨ و اڭا ختان عهدینی ویردی اودخی اسحقی تولید ایلیوب بویله‌جه انی سكزنجی كونده ختان ایلدی. اسحق یعقوبی و یعقوب اون ایكی اجدادی تولید ایلدی٩ و اجداد یوسفه حسد ایدوب انی مصره صاتدیلر لكن الله انڭ ایله ایدی.١٠ و انی جمله مضایقه‌لرندن خلاص ایده‌رك اڭا مصر مِلكی فرعونك حضورنده لطف و حكمت احسان ایتدی او دخی انی مصر و جمله كندی خانه‌سی أوزرینه ناظر نصب ایتدی١١ و بتون مصرایله كنعان دیاری اوزرینه قتلق و عظیم مضایقه كلمكله اجدادمز ذخیره بوله‌مازلر ایدی١٢ و یعقوب مصرده بغدای وار ایدیكنی ایشیتد كده برنجی دفعه اجدادمزی كوندردی١٣ و ایكنجی دفعه‌ده یوسف كندینی قارنداشلرینه بیلدردی و یوسفك نسبی فرعونه معلوم اولدی.١٤ و یوسف كوندروب كندی پدری یعقوب ایله جمله تعلقاتنی یتمش بش كشی اوله‌رق دعوت ایلدی١٥ و یعقوب مصره ایندی و كندیسی همده اجدادمز وفات ایتدیلر١٦ و شكیمه كوتوریلوب شكیمك پدری حمورك اوغللرندن ابراهیمك بر مقدار آقچه ایله صاتین آلمش ایدیكی قبره قونلدیلر١٧ اما اللهك ابراهیمه ایتدیكی وعدك زمانی یاقلاشدقده١٨ یوسفی بیلمیان بشقه بر ملِك ظهور ایدنجه‌یه دكین قوم مصرده آرتوب چوغالدی١٩ او دخی بزم ملتمز علیهنه حیله قوللانوب معصوملرینی یاشاتمامق ایچون انلری طیشاری آتدرمق درجه‌سنه‌قدر اجدادمزه جفا ایلدی٢٠ و اولوقتده موسی طوغوب اللهك نظرنده كوزل ایدی و اوچ آی پدرینك خانه‌سنده بسلند كدنصكره٢١ طیشاری آتلدیغتده انی فرعونك قیزی آلوب كندینه اوغل اولمق ایچون بسلدی٢٢ و موسی مصرلولرك هر علمنده تربیه اولنوب كلام و عملده اقتدارلو ایدی٢٣ و قرق یاشنی تكمیل ایتدكده قارنداشلری اولان بنی اسرائیلی زیارت ایتمك قلبنه گلدی٢٤ و برینك ظلم چكدیكنی كورمكله انی حمایه ایده‌رك مصرلویی قتل ایدوب مظلومك انتقامنی آلدی٢٥ و الله انلره كندی الیله خلاص احسان ایده‌جكنی قارانداشلری فهم ایدرلر ظن ایدر ایدی ایسه‌ده فهم ایتمدیلر.٢٦ و ایرتسی كون انلره نزاع ایدرلر ایكن كوریتوب ای ادملر سز قارنداشلرسڭز نیچون بری بریكزه ظلم ایدیورسڭز دیه‌رك انلری بارشدرمغه غیرت ایتدی ایسه‌ده٢٧ قوكشوسنه ظلم ایدن انی رد ایدوب سنی بزم اوزرمزه كیم رئیس و قاضی نصب ایتدی٢٨ دون مصرلویی قتل ایتدیكك كبی بنی‌ده‌می قتل ایتمك ایسترسین دیدی٢٩ و بو سوز اوزرینه موسی فرار ایده‌رك مدیان دیارنده مسافرةً اقامتله اوراده ایكی اوغل تولید ایلدی٣٠ و قرق سنه تمام اولدقده طورسینا برّیه‌سنده چالی آتشی آلونده اڭا ربك ملكی كوروندی٣١ و موسی انی كوردیكنده كورینشنه تعجّب ایده‌رك نظر قیلمق اوزره یاقلاشور ایكن اڭا٣٢ بن سنڭ اجدادكك اللهی ابراهیمك، اسحقك و یعقوبك اللهی ایم دیو ربك صداسی گلدی و موسیلرزان اولمغله نظر قیلمغه جسارت ایده‌مده٣٣ و رب اڭا ایاقلركدن ایاق قابكی چیقار زیرا طوردیغك یر مقدّس طوپراقدر٣٤ حقیقةً بن مصرده اولان قوممك جفاسنی كوروب انلرك آهنی ایشیتدم و انلری خلاص ایتمك ایچون ایندم و شمدی كل سنی مصره كوندره‌یم دیدی.٣٥ سنی كیم رئیس و قاضی نصب ایتدی دیه‌رك انكار ایتدكلری بو موسایی الله همان انی چالیده اڭا كورینان ملكك الیله رئیس و قورتاریجی ارسال ایلدی٣٦ بو ادم انلری چیقاروب مصر دیاری ایله بحر احمرده و قرق سنه برّیه‌ده معجزه‌لر و علامتلر اظهار ایلدی.٣٧ ظهور ایتدره‌جكدر انی دیكلیه‌سڭز دیان بو موسی در٣٨ طورسیناده كندیسنه سویلیان ملك ایله و اجدادمز ایله برابر برّیه‌ده اولان جماعتده اوله‌رق بزه تسلیم ایتمك اوزره حیات كلاملری آلمش اولان ذات بودر٣٩ اجدادمز اڭا مطیع اولمق استمیوب رد ایتدیلر و قلبلریله مصره كیرو دونوب٤٠ هارونه بزه اوكمزجه كیده‌جك الهلریاپ زیرا شو بزی مصر دیارندن چیقاران موسایه نه اولدیغنی بیلمیز دیدیلر.٤١ و اول كونلرده بر بوزاغی یاپدیلر و بو بته قربان تقدیم ایدوب اللرینك عمللریله مسرور اولورلر ایدی٤٢ و الله دونه‌رك انلری جنود السمایه عبادت ایتمكه تسلیم ایلدی نته‌كیم پیغمبرلرك كتابنده ای بیت اسرائیل اوغوللرینی برّیه‌ده قرق سنه بڭا ذبیحه‌لر و قربانلر تقدیم ایتدیكزمی٤٣ و مولحنك چادرینی و الهڭز رمفانك یلدیزینی یعنی سجده قیلمق ایچون شول یاپدیغڭز صورتلری طاشیدیڭز بن دخی سزی بابلدن اوته‌یه نقل ایده‌جكم دیو یازلمشدر٤٤ شهادت مسكنی برّیه‌ده اجدادمز اراسنده اید نته كیم موسایه سویلیان انی كوردیكك نمونه‌یه كوره یاپه‌سین دیو امر ایلمش ایدی٤٥ كه اجدادمز انی صره ایله قبول ایدوب یشوع ایله برابر اجدادمزك اوكندن اللهك داودك كونلرینه قدر طرد ایتدیكی طائفه‌لرك ملكی ایچنه كتوردیلر٤٦ او دخی اللهك حضورنده لطف بولوب یعقوبك اللهنه بر اقامتكاه بولمق استدی ایسه‌ده٤٧ سلیمان اڭا بر خانه بنا ایلدی٤٨ لكن متعال ال ایله یاپلمش هیكللرده ساكن اولماز ننه كیم پیغمبر رب بیورركه٤٩ سما تختم زمین دخی ایاقلرمه بصامقدر. بڭا نصل خانه بنا ایده‌جكسڭز و یا راختمك محلی نره‌سیدر٥٠ بونلرك جمله‌سنی بنم الم یاپمادیمی دیدی٥١ ای بوینی سرت و قلبی و قولاقلری ختانسز اولانلر سزدخی اجداد كزكبی دائما روح‌القدسه مخالفت ایدیورسڭز.٥٢ اجدادڭز پیغمبرلرك قنغیسنه تعدّی ایتمدی و انلر اول صالحك ظهوری حقّنده مقدما خبر ویرنلری قتل ایتدیلر سز دخی شمدی انڭ خائنلری و قاتللری اولدیڭز٥٣ سز شریعتی ملكلر ترتیباتی اوزره آلدیڭز و حفظ ایتمدیڭز.٥٤ انلر بو شیلری ایشیتملریله قلبلرنده غایتله حدتلنوب دیشلرینی انڭ علیهنده غجرداتدیلر٥٥ او ایسه روح القدسله مملو اوله‌رق سمایه طوغری كوز دیكوب اللهك جلالنی و عیسایی اللهك صاغنده طورور گوردی و اشته بن سماواتی آچیلمش و ابن الانسانی اللهك صاغنده طورور گوریورم دیدی٥٦ انلر دخی یوكسك سسله باغروب قولاقلرینی طیقادیلر و جمله‌سی بردن انڭ اوزرینه هجومله٥٧ انی شهردن طیشاری چیقاروب طاشلادیلر و شاهدلركندی البسه‌لرینی ساول نام بر نوجوانك ایاقلری یاننه قودیلر٥٨ و استیفانوس یا رب عیسی روحمی قبول ایله دیه‌رك دعا ایتمكده اولدیغی حالده انی طاشلادیلر٥٩ و دیز چوكوب یوكسك سسله یا رب بو كناهی انلره صایمه دیو فریاد ایتدی و بونی سویله‌دیكی كبی اویقویه واردی. ساول دخی انڭ قتلنه رضا ویرمش ایدی.