٢٨
١ و سالماً چیقدیغمزده اول اطه‌نك اسمی مالطه ایدیكنی اكلادق.٢ و باربارلر بزه فوق العاده مروت كوستردیلر شویله كه یاغان یاغمور و صوغوق سببندن آتش یاقوب جمله‌مزی قبول ایتدیلر٣ و پولس چوق چالی دیوشیروب آتش أوزرینه قودیغنده صیجاقدن بر انكرك چیقوب انك النه یاپشدی٤ و باربارلر جانوری انك الندن صارقلمش كوردكلرنده بری برینه بو ادم البته قاتل اولملیدركه دكزدن قورتلدی ایسه‌ده عدالت انی یاشامغه براقمادی دیرلر ایدی٥ او دخی جانوری آتشه سیلكوب بر ضرر كورمدی٦ انلر انك شیشه‌جكنه و یاخود آنسزین اولو دوشه‌جكنه بكله‌دیلر ایسه‌ده بر چوق بكله‌د كدنصكره اڭا بر ضرر اولمادیغنی كوردكلرنده ظنلرندن دونوب الهدر دیدیلر.٧ و اطه‌نك بیوكی بولنان پوبلیوس نام كیمسه‌نك اول جوارلرده چفتلكلری بولنمغله بزی قبول ایدوب اوچ كون مروتله مسافر ایلدی٨ و پوبلیوسك پدری حما ایله قانلو اسهاله طوتیله‌رق یاتمقده ایكن پولس یاننه واردی و دعا ایده‌رك اللرینی انك أوزرینه قومغله اڭا شفا ویردی٩ و بو واقعه اوزرینه اطه‌ده بولنان سائر خسته‌لر دخی گلوب شفا بولورلر ایدی١٠ انلر دخی بزه زیاده‌سیله اكرام ایتدیلر و كیده‌جكمز وقت بزه لازم اولان شیلری تدارك ایتدیلر.١١ و اوچ آی صكره اول اطه‌ده قیشلامش و علامتی دیوسكوری اولان اسكندریه‌لو بر كمی ایله آچلدق١٢ و سیراقوسایه واصل اولوب اوچ كون قالدق١٣ اورادن دخی طولاشه‌رق رجیومه واصل اولوب بر كون صكره لدوس اسمكله ایكنجی كون پوتیولی‌یه كلدك١٤ و اوراده بعض برادرلر بولدق. انلر دخی یانلرنده یدی كون قالمامزی رجا ایتدیلر و بویله‌جه رومایه كلدك١٥ اورادن دخی برادرلر خبرمزی آلدقلرنده بزی استقبال ایچون تا اپیوس بازارینه و اوچ خانلرده دكین چیقدیلر. و پولس انلری كوردیكنده اللهه شكر ایدوب جسارتلندی.١٦ و رومایه كلدیكمزده [یوز باشی محبوسلری سرداره تسلیم ایتدی] پولسه كندینی حفظ ایدن عسكر ایله آیریجه اقامت ایتمكه رخصت ویرلدی١٧ و اوچ كون صكره پولس یهودیلرك معتبراننی دعوت ایلدی و انلر جمع اولدقده انلره ای برادرلر بن قومه یاخود اجدادمزك آیینلرینه مخالف بر شی ایتمه‌مش اولدیغم حالده اورشلمیدن رومالولرك اللرینه محبوس اوله‌رق تسلیم اولندم١٨ بونلر دخی نبی استتطاق ایدوب بنده قتله مستحق هیچ بر سبب بولنمادیغنه مبنی صالیویرمك استدیلر١٩ لكن یهودیلر مخالفت ایتدكلرنده هر نه قدر ملتمك علیهنده شكایت ایده‌جك بر شیئم یوق ایدی ایسه‌ده قیصره رفع دعوی ایتمكه مجبور اولدم٢٠ ایمدی بو سببه مبنی كوروشوب سویلشمك مرامیله سزی دعوت ایتدم زیرا اسرائیلك امیدی ایچون بو زنجیرله باغلو ایم دیدی٢١ انلر دخی اڭا بز سنڭ حقكده نه یهودیه‌دن مكتوب آلدق نه‌ده برادرلردن بری گلوب سنڭ حقّڭده بر كوتو شی خبر ویرمش یا سویله‌مشدر٢٢ لكن نه افكارده اولدیغكی سندن ایشیتمك استرز زیرا هر یرده بو فرقه‌یه مخالفت ایدلدیكی معلوممزدر دیدیلر٢٣ و اڭا بر كون تعیین ایدوب چوق كیمسه‌لر یاننه مسكننه گلدیلر و صباحدن اقشامه قدر موسانك توراتی ایله پیغمبرلردن عیسایه متعلق شیلر حقنده انلری الزام ایدوب ملكوت اللهه دائر شهادت ایده‌رك انی بیان ایدر ایدی٢٤ و سویلنیلان شیلره بعضلری ایناندیلر بعضلری اینانمادیلر٢٥ و بری بری ایله اتفاق ایتمیوب طاغلمق اوزره ایكن پولس بر سوز سویلدی یعنی روح القدس اشعیا پیغمبر واسطه‌سیله اجدادمزه خطاباً٢٦ بو قومه گیت و دیكه ایشیتمكله ایشیده‌جكسڭز اما اكلامایه‌جقسڭز و باقه‌رق باقه‌جقسڭز اما كورمیه‌جكسڭز٢٧ زیرا بو قومك قلبی قاتیلاشوب قولاقلریله آغرجه ایشیدرلر و كوزلرینی دخی قاپادیلر اولمایه‌كه كوزلریله كوروب و قولاقلریله ایشیده‌رك قلباً فهمله رجوع ایده‌لر بن دخی انلره شفا ویره‌یم دیه‌رك ایو بیوردی٢٨ ایمدی سزه معلوم اولسون كه اللهك خلاصی طائفه‌لره ارسال اولندی انلر دخی دیكله‌یه‌جكلردر٢٩ و بو شیلری سویله‌دكدن صكره یهودیلر بری بری ایله چوق مباحثه ایده‌رك كیتدیلر.٣٠ و پولس استیجار ایتدیكی خانه‌ده تمام ایكی سنه اقامت ایده‌رك یاننه كلانلرك جمله‌سنی قبول برله٣١ ملكوت اللهی وعظ ایده‌رك رب عیسی المسیحه متعلق شیلری بلا مانع و كمال جسارتله تعلیم ایدر ایدی.